خۇ جىنتاۋ ، ۋۇ باڭگو ، ۋېن جياباۋ ، لى چاڭچۈن ، شى جىنپىڭ ، لى كېچياڭ ، خې گوچياڭ ، جۇ يۇڭكاڭ يېپىلىش مۇراسىمىغا قاتناشتى جيا چىڭلىن رىياسەتچىلىك قىلدى

    شىنخۇا ئاگېنتلىقى، بېيجىڭ، 13 – مارت تېلېگراممىسى. جۇڭگو خەلق سىياسىي مەسلىھەت كېڭىشى مەملىكەتلىك 11 – نۆۋەتلىك كومىتېتىنىڭ 4 – يىغىنى قارالمىلىرىنى مۇۋەپپەقىيەتلىك تاماملاپ، 13 – مارت چۈشتىن بۇرۇن ‹‹خەلق››سارىيىدا يېپىلدى. يىغىندا خەلق سىياسىي مەسلىھەت كېڭىشىنىڭ ھەر دەرىجىلىك تەشكىلاتلىرى، سىياسىي كېڭەشكە قاتناشقان ئورۇنلار ۋە سىياسىي كېڭەش ئەزالىرىنىڭ يولداش خۇجىنتاۋ باش شۇجىلىقىدىكى ج ك پ مەركىزىي كومىتېتىنىڭ ئەتراپىغا زىچ ئۇيۇشۇپ، جۇڭگوچە سوتسىيالىزم ئۇلۇغ بايرىقىنى ئېگىز كۆتۈرۈپ، دېڭ شياۋپىڭ نەزەرىيەسى ۋە ‹‹ئۈچكە ۋەكىللىك قىلىش›› مۇھىم ئىدىيەسىنى يېتەكچى قىلىپ، ئىلمىي تەرەققىيات قارىشىنى چوڭقۇر ئەمەلىيلەشتۈرۈپ، كۆتۈرەڭگۈ ئالغا ئىنتىلىش روھى، راستچىل، ئەمەلىيەتچىل خىزمەت پوزىتسىيەسى بىلەن كۈچنى توپلاپ،تەرەققىياتنى بىرلىكتە پىلانلاپ، ‹‹12 – بەش يىل››دىكى نىشان – ۋەزىپىلەرنى ئورۇنداپ، ئومۇميۈزلۈك ھاللىق جەمئىيەت بەرپا قىلىشنىڭ يېڭى غەلىبىسىنى قولغا كەلتۈرۈش ئۈچۈن تىرىشىپ كۈرەش قىلىشى چاقىرىق قىلىندى.

    مەملىكەتلىك سىياسىي كېڭەشنىڭ رەئىسى جيا چىڭلىن يېپىلىش يىغىنىغا رىياسەتچىلىكقىلدى.

    خۇ جىنتاۋ، ۋۇ باڭگو، ۋېن جياباۋ، لى چاڭچۈن، شى جىنپىڭ، لى كېچياڭ، خې گوچياڭ، جۇ يۇڭكاڭ قاتارلىقلار رەئىس سەھنىسىدىن ئورۇن ئالدى.

    يېپىلىش يىغىنى چۈشتىن بۇرۇن سائەت 9 دا باشلاندى. جيا چىڭلىن جۇڭگو خەلق سىياسىي مەسلىھەت كېڭىشى مەملىكەتلىك 11 – نۆۋەتلىك كومىتېتىنىڭ 4 – يىغىنىغا قاتنىشىشقا تېگىشلىك ئەزا 2260 كىشى بولۇپ، بۈگۈن قاتناشقىنى 2129 كىشى، بۇنىڭ قانۇندا بەلگىلەنگەن سانغا توشىدىغانلىقىنى جاكارلىدى.

    يىغىندا، سىياسىي كېڭەش مەملىكەتلىك 11 – نۆۋەتلىك كومىتېتى 4 – يىغىنىنىڭ دائىمىي كومىتېتنىڭ خىزمەت دوكلاتى توغرىسىدىكى قارارى، سىياسىي كېڭەش مەملىكەتلىك 11 – نۆۋەتلىك كومىتېتى تەكلىپ كومىتېتىنىڭ سىياسىي كېڭەش مەملىكەتلىك 11 – نۆۋەتلىك كومىتېتى 4 – يىغىنىنىڭ تەكلىپ تەكشۈرۈش ئەھۋالى توغرىسىدىكى دوكلاتى، سىياسىي كېڭەش مەملىكەتلىك 11 – نۆۋەتلىك كومىتېتى 4 – يىغىنىنىڭ سىياسىي قارارى ماقۇللاندى.

    جيا چىڭلىن مۇنداق دېدى: بۇ قېتىمقى يىغىن ج ك پ مەركىزىي كومىتېتى، مەملىكەتلىك خەلق قۇرۇلتىيى دائىمىي كومىتېتى، گوۋۇيۈەننىڭ غەمخورلۇق قىلىشى، ئەھمىيەت بېرىشى ۋە ئالاقىدار تارماقلارنىڭ زور كۈچ بىلەن قوللىشى، ئەزالارنىڭ ئورتاق تىرىشچانلىقى ئارقىلىق مۇۋەپپەقىيەتلىك ئېچىلىپ، مول نەتىجە قولغا كەلتۈرۈلدى، بۇ دېموكراتىيە، كۆپنىڭ ئەقىل – پاراسىتى ۋە كۈچ – قۇۋۋىتى جارى قىلدۇرۇلغان يىغىن، راستچىل، ئەمەلىيەتچىل، كىشىلەرنى ئىتتىپاقلاشتۇرىدىغان، رىغبەتلەندۈرىدىغان يىغىن، يېڭى سەپەرنى باشلايدىغان، كىشىنى جاسارەت بىلەن ئىلگىرىلەشكە ئۈندەيدىغان يىغىن بولدى. يىغىن مەزگىلىدە، ئەزالار دۆلەت ۋە خەلققە يۈكسەك مەسئۇل بولۇش روھى، مەسئۇلىيىتىنى جان – دىلى بىلەن ئادا قىلىش پوزىتسىيەسى، راست گەپ قىلىش، ئوبدان تەكلىپ بېرىش ئىستىلى بىلەن، ھۆكۈمەت خىزمىتىدىن دوكلات، ‹‹خەلق ئىگىلىكى ۋە ئىجتىمائىي تەرەققىياتنىڭ 12 – بەش يىللىق يىرىك پىلان تېزىسى(لايىھە)›› قاتارلىقلارنى زىچ چۆرىدەپ، ئىقتىسادىي تەرەققىيات ئۇسۇلىنى ئۆزگەرتىش ۋە ئىقتىسادىي قۇرۇلمىنى تەڭشەشنى تېزلىتىش، خەلق تۇرمۇشىنى كاپالەتلەندۈرۈش ۋە ياخشىلاش، سوتسىيالىستىك مەدەنىيەتنى گۈللەندۈرۈش ۋە راۋاجلاندۇرۇش قاتارلىق مۇھىم مەسىلىلەرگە ئېتىبار بېرىپ، قىممىتى ۋە ۋەزنى بار نۇرغۇن پىكىر – تەكلىپ بېرىپ، خەلق سىياسىي مەسلىھەت كېڭىشىدىن ئىبارەت بۇ سىياسىي تەشكىلات ۋە دېموكراتىيە شەكلىنىڭ خاس ئەۋزەللىكىنى تولۇق گەۋدىلەندۈرۈپ، سىياسىي كېڭەش ئەزالىرىنىڭ دۆلەت ئىشىغا كۆڭۈل بۆلىدىغان، خەلق تۇرمۇشىغا ئەھمىيەت بېرىدىغان روھىي قىياپىتىنى جانلىق نامايان قىلدى.

    جيا چىڭلىن مۇنداق دېدى: پىلان تۈزۈلدى، نىشان بېكىتىلدى. مۇھىم ھالقا ئەمەلىيلەشتۈرۈشنى چىڭ تۇتۇپ، بىر ياقىدىن باش چىقىرىپ يېڭى ۋەزىيەت يارىتىشتا. يولداش خۇ جىنتاۋ باش شۇجىلىقىدىكى ج ك پ مەركىزىي كومىتېتى ئەتراپىغا زىچ ئۇيۇشۇپ، دېڭ شياۋپىڭ نەزەرىيەسى ۋە ‹‹ئۈچكە ۋەكىللىك قىلىش›› مۇھىم ئىدىيەسىنى يېتەكچى قىلىپ، ئىلمىي تەرەققىيات قارىشىنى چوڭقۇر ئەمەلىيلەشتۈرۈپ، باش شۇجى خۇ جىنتاۋنىڭ ‹‹ئىككى يىغىن››مەزگىلىدە قىلغان مۇھىم سۆزى، زۇڭلى ۋېن جياباۋ بەرگەن ھۆكۈمەت خىزمىتىدىن دوكلات، 12 – بەش يىللىق يىرىك پىلان تېزىسى، شۇنداقلا باشقا مۇھىم ھۆججەتلەرنىڭ روھىنى ئۆگىنىپ، ئىزچىللاشتۇرۇپ، بۇ قېتىمقى يىغىننىڭ ھېلىلا ماقۇللانغان سىياسىي قارارىنى ئەستايىدىل ئەمەلىيلەشتۈرۈپ، ئىتتىپاقلاشتۇرغىلى بولىدىغان بارلىق كۈچلەرنى ئىتتىپاقلاشتۇرۇپ، مۇجەسسەملىگىلى بولىدىغان بارلىق ئەقىل – پاراسەتنى مۇجەسسەملەپ، ئۇرغۇتقىلى بولىدىغان بارلىق ھاياتىي كۈچنى ئۇرغۇتۇپ، 12 – بەش يىللىق يىرىك پىلان ۋە ئومۇميۈزلۈك ھاللىق جەمئىيەت بەرپا قىلىش ئۇلۇغ نىشانىغا، جۇڭخۇا مىللەتلىرىنىڭ بۈيۈك گۈللىنىشىدىن ئىبارەت پارلاق كەلگۈسىگە قاراپ باتۇرانە ئالغا باسايلى.

    ج ك پ مەركىزىي كومىتېتى، گوۋۇيۈەننىڭ ئالاقىدار تارماقلىرىنىڭ مەسئۇللىرى يېپىلىش مۇراسىمىغا سىرتتىن قاتناشتى. چەت ئەللەرنىڭ ئېلىمىزدە تۇرۇشلۇق ئەلچىلىرى تەكلىپكە بىنائەن يېپىلىش مۇراسىمىنى چەتتىن ئاڭلىدى.

    يىغىن ھەيۋەتلىك دۆلەت شېئىرى ساداسى ئىچىدە يېپىلدى.