| ئۈرۈمچى شەھىرىدە 8 مىليون يۈەن قىممىتىدىكى ساختا مال كۆيدۈرۈلدى |
ساختا ماللار كۆيدۈرۈلمەكتە
يېقىندا ، ئاپتونوم رايونلۇق سۈپەت نازارەتچىلىك سىستېمىسى ‹‹ قوش زەربە بېرىش ›› مەخسۇس تۈزەش ھەرىكىتىنى قانات يايدۇرۇپ ، ئۈرۈمچى شەھىرىدە ساختا ماللارنى كۆيدۈرۈپ ، ساختا ماللارغا زەربە بېرىش پائالىيتىنى ئويۇشتۇردى . 11 – مارت ، ئۈرۈمچى شەھىرى كۆكتاغ رايونى ئەخلەت مەيدانىدا ، 8 مىليون يۈەن قىممىتىدىكى ساختا مال كۆيدۈرۈلدى .
ئاپتونوم رايونلۇق سۈپەت نازارەتچىلىك ئىدارىسىنىڭ شۇجىسى مەمەت تۇردى مۇنداق دېدى : سۈپەت نازارەتچىلىك سىستېمىسىنىڭ ساختا ماللارنى يىغىپ يوقىتىش ھەرىكىتىدە ، ئىلى ، ئاقسۇ ، ئۈرۈمچى قاتارلىق پۈتۈن شىنجاڭدىكى 13 ئورۇندا ، مۇھىت ئاسراشنى مۇھىم ئورۇنغا قويغان ئاساستا ، جەمئىي 8 مىليون 435 مىڭ يۈەن قىممىتىدىكى ساختا مال يوقىتىلدى .
ئىگىلىنىشىچە ، ئاپتونوم رايونىمىزنىڭ بۇ قېتىملىق ساختا ماللارغا زەربە بېرىش ھەرىكىتى ، دۆلەتلىك سۈپەت نازارەتچىلىك باش ئىدارىسىنىڭ ‹‹بىلىم – مۈلۈك ھوقۇقىغا دەخلى- تەرۇز قىلىش ھەرىكەتلىرىگە ۋە ساختا ماللارنى سېتىش ھەرىكەتلىرىگە زەربە بېرىش ›› ئۇقتۇرۇشىنىڭ روھىغا ئاساسەن ، ئىشلەپچىقىرىش ساھەسىدىكى بىلىم – مۈلۈك ھوقۇقىغا دەخلى – تەرۇز قىلغان ، ساختا ماللارنى ساتقان قىلمىشلارغا زەربە بەرگەن بولۇپ ، بۇ ھەرىكەت بۇلتۇر 11–ئايدىن باشلانغان .
ھازىرغىچە ، ئاپتونوم رايونلۇق سۈپەت نازارەتچىلىك سىستېمىسى ئىلگىرى – كېيىن بولۇپ 971 ئىدارە ۋە مەيدانغا قارىتا تۈزەش ئېلىپ بېرىپ ، سۈپەتسىز مال سېتىش ۋە ياساشقا مۇناسىۋەتلىك دېلودىن 207 نى تەكشۈرۈپ بىر تەرەپ قىلغان . ئىگىلىنىشىچە ، بۇ دېلوغا 4 مىليون 240 مىڭ يۈەنگە چېتىشلىق بولۇپ ، نۆۋەتتە ، ساختا مال ياساش ئۇۋىسىدىن تۆتى بىتچىت قىلىنغان .
| [ئاپتورى: مەنبەسى: ۋاقتى: 2011-3-14 20:24:11 ئۇقۇلۇشى: 154 قېتىم] |
|
