سۇمۇرغ تورىنىڭ 3-ئاينىڭ 15-كۈندىكى خەۋىرى، يىن ئەپەندىم لې تۇ ساياھەت تورىدىن بىر مېھمانخانىنىڭ ياتىقىنى تىزىملاتقاندىن، ئۆزىنىڭ شەخسىي ئۇچۇرلىرىنى ئىزدەش ماتورىدا پەيدا بولۇپ قالغانلىقىنى بايقىغان. شۇنىڭ بىلەن ئۇ « شەخسىي ئۇچۇرلىرىمنى مەزكۇر تور بېكەت ئاشكارىلىۋەتكەن بولسا كېرەك» دەپ ئويلاپ، مەزكۇر تور بېكەت ئۈستىدىن سوتقا ئەرز سۇنغان. تۈنۈگۈن چاڭ پىڭ سوت مەھكىمىسى مەزكۇر دېلوغا سوت ئېچىپ قاراپ چىقتى.
يىن ئەپەندى ئادۋوكات بولۇپ، ئۇ مۇنۇلارنى بىلدۈردى:«بۇلتۇر 10-ئايدا مەن مەزكۇر تور بېكەت ئارقىلىق بېيجىڭدىكى بىر مېھمانخانىنىڭ ياتىقىنى تىزىملاتقان ئىدىم، شۇنىڭدىن كېيىن كاللامغا بىر ئوي كېلىپ، مەن ئۆزۈمنىڭ يانفون نومۇرۇمنى ئىزدەش ماتورىغا كىرگۈزۈپ ئىزدەپ باقسام، كۆز ئالدىمدا مېھمانخانا ياتىقى تىزىملاتقاندىكى تالون قاتارلىق ئۇچۇرلار پەيدا بولدى، بۇ ئۇچۇرلار مېنىڭ يانفون نومۇرۇم، ئېسىم-فامىلەم، ئېلخەت ئادرېسىم قاتارلىقلار ئىدى. مەن مەزكۇر تور بېكەت قاراشلىق شىركەتكە بېرىپ، شەخسىي ئۇچۇرلىرىمنى ئېلان قىلىشنى توختىتىشنى تەلەپ قىلغان ۋاقتىدا، مەزكۇر تور بېكەت ئۆزىنىڭ باش بېتىدىكى مەخسۇس ئورۇنغا ئىككى ئات بايانات ئېلان قىلىپ، مەندىن كەچۈرۈم سورىدى، ئەمما مېنىڭ روھىي زىيىنىم ئۈچۈن ئاران بىر يۈەن خەلق پۇل بەردى».
ئەمما مەزكۇر شىركەت مۇنداق قارىدى:« مەزكۇر ئۇچۇرلار ئىزدەش ماتورىدىن تېپىلغان، ئۇنىڭ ئۈستىگە بۇ ئۇچۇرلارغا ئالاقىدار نۇرغۇن ئۇلىنىش ئادرېسلىرى بار، بۇ بىزنىڭ بۇ ئۇچۇرلارنى ئاشكارىلىۋەتمىگەنلىكىمىزنى ئىسپاتلايدۇ. شىركىتىمىزنىڭ تور بېكىتىگە كېرىپ، ئابونت نامى ياكى ھېساب نومۇرى بىلەن شىفىرنى كىرگۈزۈش ئارقىلىق ئاندىن ئالاقىدار ئۇچۇرلارنى كۆرگىلى بولىدۇ، ئەگەر بۇلارنىڭ بىرى خاتا بولسا، ئالاقىدار ئۇچۇرلارنى كۆرگىلى بولمايدۇ. بۇ ۋەقە يۈز بەرگەندىن كېيىن يىن ئەپەندىمنىڭ تور بېكىتىمىزدىكى بارلىق ئۇچۇرى ئۆچۈرۈلدى».
شىركەت يەنە مۇنداق قارىدى:« يىن ئەپەندىم بولسا ئادۋوكات، ئادۋوكاتلىق كەسپىي تور بېكەتلىرىدە ئادۋوكاتلارنىڭ يانفون نومۇرلىرىنى تەكشۈرگىلى بولىدى. شۇڭلاشقا، يىن ئەپەندىمنىڭ يانفون نومۇرىنى مەخپىي ئۇچۇر دائىرىسىگە كىرگۈزۈش توغرا ئەمەس». يىن ئەپەندىم بۇ توغرىسىدا مۇنۇلارنى بىلدۈرگەن:«مېنىڭ ئالاھىدە ئاممىغا ئالاقىلىشىش ۋاسىتىلىرىمنى ئاشكارىلىشىم ئالاھىدە ئەھۋال، ئەمما شىركەت مېنىڭ ئۇچۇرلىرىمنى ھەممە كىشىگە ئاشكارىلىۋەتتى». نۆۋەتتە، سوت مەھكىمىسى ئىككى تەرەپنىڭ مەسىلىسىنى ھەل قىلىۋاتقان بولۇپ، ئىككى تەرەپ تېخىچە ئورتاق تونۇش ھاسىل قىلالمىغانىكەن.