ئەخمەق پادىشاھ
(چۆچەك)
ئۆتكەن زاماندا بىر ئەخمەق پادىشاھ بولغان ئىكەن،كىشىلەر ئۇنىڭ زۇلۇمىدىن قورقۇپ،نېمە بۇيرىسا شۇنى قىلىدىكەن.كۈنلەرنىڭ بىرىدە بۇ پادىشاھ بىر ئادەمگە يولۇقۇپتۇ. ئۇنىڭدىن:
-سەن نېمە قىلىدىغان ئادەم؟ - دەپ سوراپتىكەن، ئۇ ئادەم قورقۇپ كېتىپ:
- مەن تاغ كۆتىرىدىغان ئادەم،- دەپ جاۋاپ بېرىپتۇ.
بۇنى ئاڭلىغان پادىشا:
-ئۇنداق بولسا،ئوردىنىڭ ئالدىدىكى تاغنى يۆتكە،- دەپتۇ.
ئۇ ئادەم:- ماقۇل،-دەپتۇ.
پادىشاھ:- ساڭا نېمە لازىم؟-دەپتىكەن.
- ماڭا ھېچ نېمە لازىم ئەمەس،پەقەت بىر يىلدا بىر قېتىم تاغ يۆتكەيمەن، شۇنڭغىچە يەتكىدەك كىيىم-كېچەك،يېمەك-ئىچمەكلىرىمنى يەتكۈزۈپ بەرسىڭىز بولىدۇ، - دەپتۇ ھېلىقى ئادەم.
پادىشاھ:-نېمە يېسەڭ، نېمە كىيسەڭ ئىختىيار ئۆزەڭدە، ئوردىدىن يەتكۈزۈپ بېرىدۇ،-دەپتۇ.شۇنداق قىلىپ، بىر يىل پادىشاھنىڭ كىيىملىرىنى كىيىپ، تامىقىنى يەپ يۈرۈپتۇ. يىل توشقاندىن كېيىن،پادىشاھ پۈتۈن يۇرتنى ئوردا ئالدىغا يىغىپ:
- ھازىر تاغ كۆتىرىدىغان باتۇرنىڭ كۈچىنى كۆرۈڭلار!-دەپ جار ساپتۇدە، كېيىن باتۇرغا قاراپ:
- قېنى،تاغنى كۆتەر!-دەپتىكەن، ھېلىقى ئادەم تاغنىڭ باغرىغا يۈگرۈپ بېرىپ تاغقا دۈمبىسىنى يۆلەپ تۇرۇپتۇ.
پادىشا:- كۆتەر!..- دەپتۇ يەنە.
ھېلىقى ئادەم:-سىز باشلىق بولۇپ،تاغنى دۈمبەمگە ئارتىپ قويۇڭلار،ئاندىن ئۆزەم ئورنىدىن يۆتكىۋېتىمەن،-دەپتىكەن.
پادىشاھ:- بىز قانداق ئارتىمىز؟-دەپتۇ.
شۇ چاغدا ھېلىقى ئادەم:-سىلەر توپلىشىپ كۆتىرەلمىگەن تاغنى مەن يالغۇز قانداق كۆتۈر ىمەن؟-دەپ جاۋاپ بېرىپتۇ.
رەتلەپ، نەشىرگە تەييارلىغۇچى:
قاراقاش ناھىيەلىك ئەدەبىيات-سەنئەتچىلەر بىرلەشمىسىدىن
تۇرسۇن ئابدۇللا بەگيار
|
