ئۈرۈمچى شەھەرلىك تەرەققىيات ۋە ئىسلاھات كومىتېتى 16-دېكابىر شەھەر سۇ بىلەن تەمىنلەش پاكىت ئاڭلاش يىغىنى چاقىرىپ ، شەھەرلەردىكى سۇ باھاسىنى تەڭشەش لايىھەسىنى ئېلان قىلىپ ، جەمئىيەتتىن ئاشكارا پىكىر ئالىدىغانلىقىنى ئېيتقان .

شەھەرنىڭ سۇ باھاسىنى تەڭشەش لايىھەسىدە ، ئۈرۈمچى شەھىرىدىكى ئۇنىۋېرىسال ئوتتۇرىچە سۇ باھاسىنىڭ ھەر بىر كۇب مېتىرى 2.34 يۈەنگە تەڭشىلىدىغان بولۇپ ، ھازىرقى باھادىن 0.98 يۈەن ئۆستۈرۈلۈپ ، ئۆسۈش نىسبىتى %72.06 بولىدىكەن . ھازىرقى ئالتە تۈرلۈك سۇ باھاسىغا ئاساسەن ، شەھەر تۇرۇبا سۈيى باھاسىنىڭ تەڭشىلىشى تۆۋەندىكىدەك : (1) ئاھالىلەر تۇرمۇشتا ئىشلىتىلىدىغان ھەربىر كۇب مېتىر سۇنىڭ باھاسى 1.16 يۈەندىن 1.66 يۈەنگە تەڭشىلىدىكەن . (2) سانائەتتە ئىشلىتىلىدىغان ھەر بىر كۇب مېتىر سۇنىڭ باھاسى 1.28 يۈەندىن 2.70 يۈەنگە تەڭشىلىدىكەن . (3) سودا ، مۇلازىمەت كەسپىدە ئىشلىتىلىدىغان ھەر بىر كۇب مېتىر سۇنىڭ باھاسى 2.24 يۈەندىن 4.44 گە تەڭشىلىدىكەن .

(4) كۆكەرتىش ، مۇھىت ئاسراش ، ئوت ئۆچۈرۈشكە ئىشلىتىلىدىغان ھەر بىر كۇب مېتىر سۇنىڭ باھاسى 0.70 يۈەندىن 1.66 يۈەنگە تەڭشىلىدىكەن . (5) ئاساسىي قۇرۇلۇشلارغا ئىشلىتىلىدىغان ھەر بىر كۇب مېتىر سۇنىڭ باھاسى 3.34 يۈەندىن 6.63 يۈەنگە تەڭشىلىدىكەن . (6) ئالاھىدە ئىشلارغا ئىشلىتىلىدىغان ھەر بىر كۇب مېتىر سۇنىڭ باھاسى 8.50 يۈەندىن 16.86 يۈەنگە تەڭشىلىدىكەن .

ئىگىلىنىشىچە ، بۇ قېتىملىق پاكىت ئاڭلاش يىغىنىغا ئاممىۋى تەشكىلاتلارنىڭ ھاۋالىسى ، كەسپىي ئورۇنلاشنىڭ تەۋىسيەسى ۋە باھا باشقۇرۇش تارماقلىرىنىڭ تەكلىپى بىلەن ئىستېمالچى ، تىجارەتچى ، مۇتەخەسىس ، ئالىملاردىن بولۇپ جەمئىي 22 ئادەم قاتناشقان . يىغىن ئىشتىراكچىلىرى 15-دېكابىر ئۇلانباي سۇ ئامبىرى ، سەيۋوپو كۆلى ، گەنچۈەنباۋ « 500 » سۇ ئامبىرى ۋە سۇ بىلەن تەمىنلەش ئورۇنلىرىغا بېرىپ ئۈرۈمچى شەھىرىنىڭ سۇ بايلىقى ۋە سۇ بىلەن تەمىنلەش ئەھۋالىغا قارىتا تەكشۈرۈش ئېلىپ بارغان .