ئىسپانىيەدىكى «خانلىق مادرىد» كۇلۇبى 22- ئىيۇل بايانات ئېلان قىلىپ، فىرانسىيەنىڭ «موناكو» كۇلۇبىدا توپ ئوينايدىغان جامىس رودىرگىرىسنىڭ «خانلىق مادرىد» كوماندىسىغا ئەزا بولغانلىقىنى جاكارلىدى. گەرچە «خانلىق مادرىد» كۇلۇبى جامىس رودىرگىرىس ئۈچۈن قانچىلىك كوماندا ئالمىشىش ھەققى تۆلىگەنلىكىنى ئاشكارىلىمىغان بولسىمۇ، بىراق ئىسپانىيەدىكى «ماكا گېزىتى» نىڭ خەۋىرىگە قارىغاندا، «خانلىق مادرىد» كۇلۇبى جامىس رودىرگىرىس ئۈچۈن «موناكو» كۇلۇبىغا 80 مىليون ياۋرو تۆلىگەن، بۇنىڭ بىلەن جامىس رودىرگىرىس «خانلىق مادرىد» كۇلۇبى تارىخىدىكى كوماندا ئالمىشىش ھەققى 3- يۇقىرى ماھىر بولۇپ قالغان.
جامىس رودىرگىرىس 1991- يىلى 12- ئىيۇل كولومبىيەدىكى كۇكۇتادا تۇغۇلغان، ئۈچ ياش ۋاقتىدا دادىسى ۋىلسون ئۇلارنى تاشلاپ كەتكەچكە، ئاپىسى پىلار رۇبىئو ئۇنى بېقىپ چوڭ قىلغان. ئۇ پۇتبولچى تاغىسى ئارلىي رودىرگىرىسنىڭ تەسىرىدە كىچىكىدىن پۇتبولغا ئىشتىياق باغلىغان، 2005- يىلى كولومبىيەنىڭ «ئىنۋىگادو» كوماندىسىغا، 2008- يىلى 280 مىڭ ياۋرولۇق كوماندا ئالمىشىش ھەققى بىلەن ئارگېنتىنانىڭ «بانفىلد» كوماندىسىغا، 2010- يىلى 5 مىليون 100 مىڭ ياۋرولۇق كوماندا ئالمىشىش ھەققى بىلەن پورتۇگالىيەنىڭ «پورتو» كوماندىسىغا ئەزا بولغان. 2010- يىلىدىن 2013- يىلىغىچە بولغان ئۈچ يىلدا «پورتو» كوماندىسىغا ۋاكالىتەن 105 مەيدان مۇسابىقىگە قاتنىشىپ 32 توپ كىرگۈزگەن، 2013- يىلى 45 مىليون ياۋرولۇق كوماندا ئالمىشىش ھەققى بىلەن فىرانسىيەنىڭ «موناكو» كوماندىسىغا ئەزا بولغان. «موناكو» كوماندىسىغا ئەزا بولغان بىر يىلدا كوماندىغا ۋاكالىتەن 38 مەيدان مۇسابىقىگە قاتنىشىپ 10 توپ كىرگۈزگەن.
بۇ يىللىق دۇنيا لوڭقىسى پۇتبول مۇسابىقىسىدە كولومبىيە كوماندىسىنىڭ سەككىز كۈچلۈك كوماندا قاتارىغا كىرىشىگە ئالاھىدە كۈچ چىقارغان ھەم ئالتە توپ كىرگۈزۈپ، «ئالتۇن كەش» مۇكاپاتىغا ئېرىشكەن. دۇنيا لوڭقىسى پۇتبول مۇسابىقىسىدىن كېيىن، «خانلىق مادرىد» بىلەن «بارسېلونا» كۇلۇبى ئۇنى تالاشقان بولسىمۇ، بىراق ئۇنىڭ «خانلىق مادرىد» كوماندىسىدا توپ ئويناش ئارزۇسى بولغاچقا، «بارسېلونا» كۇلۇبىنىڭ تەكلىپىنى رەت قىلىپ، «خانلىق مادرىد» كوماندىسىغا ئەزا بولدى. ئۇ 2010- يىلى رەسمىي نام چىقىرىشقا باشلاپ «خانلىق مادرىد» كوماندىسىغا ئەزا بولغانغا قەدەر، ئۇنىڭ قىممىتى تەخمىنەن 16 ھەسسە ئاشتى.