كەتمەن ساداسى

版权声明：转载时请以超链接形式标明文章原始出处和作者信息及本声明
logs/38090989.html

بىر جېنىڭغا مىڭ جانان پىدا


ساداقەتجان ھاجى


 ( ئاللاھ بىردۇر.
قۇدرىتى چەكسىزدۇر.
رەھمىتى چەكسىزدۇر.
ھەممىنى كۆرۈپ تۇرىدۇ.
ھەممىنى بىلىپ تۇرىدۇ... )


بىر زەررەڭدە مىڭ قۇچاق نۇر بار،
بىر قۇچاقتا مىڭ قۇياش تەپتى.
زەررىلىرىڭ قۇچاقلاپ مېنى،
يۈرىكىمگە مۇھەببەت سەپتى.

بىر بەرگىڭدە مىڭ دەستە غۇنچە،
بىر غۇنچەڭدە باردۇر مىڭ بوستان.
ئىلھام ئېلىپ غۇنچىلىرىڭدىن
يازماقتىمەن دەستىلەپ داستان.

بىر چوغۇڭدا مىڭ دۆۋە گۈلخان،
بىر دۆۋەڭدە مىڭ تاغ لاۋاسى.
ئۆزۈڭ سالدىڭ كۆڭلۈمگە ئوتنى،
ئۆزۈڭدىدۇر دەرتنىڭ داۋاسى.

بىر تىنىقىڭ مىڭ تۈننى ئۆرتەر،
بىر تېڭىڭدىن تۇغۇلار مىڭ كۈن.
ئۆرتەشلىرىڭ قىلىدۇ ھەرئان
دىل بېغىمدىن زۇلمەتنى سۈرگۈن.

بىر جىلۋەڭدە مىڭ جان جۇلاسى،
بىر جېنىڭغا مىڭ جانان پىدا.
ۋەسلىڭنى دەپ بىر دەقىقىدە
مىڭ مەرتىۋە قىلىمەن نىدا.

بىر كۆزۈڭدە مىڭ كۆڭۈل زاھىر.
بىر كۆڭلۈڭدە مىڭ تىلسىم ئايان.
يەتمەك ئۈچۈن ۋەسلىڭگە ئاخىر،
ھىجرانىڭغا ئىزدەيمەن پايان.

2001- يىل 6- ئاي.
(«تارىم» 2002-يىل 9-سان)
&&&&&&&&&&&&&