برازىلىيىنىڭ سان-پاۋلو شەھىرىگە جايلاشقان دۇنيادىكى ئەڭ چوڭ زەھەرلىك يىلان تەتقىقات ئورنى بولغان Instituto Butantan تەجرىبىخانىسىغا يېقىندا ئوت كېتىپ ، نەچچە ئون يىلدىن بۇيان يىغىپ ساقلانغان 80 مىڭغا يېقىن يىلان ئەۋرىشكىسى ۋە مىڭدىن ئارتۇق چايان ، ئۆمۈچۈك ئەۋرىشكىلىرى پۈتۈنلەي كۆيۈپ كۈلگە ئايلىنىپ كەتتى .
مەزكۇر تەجرىبىخانىدا دۇنيانىڭ ھەرقايسى جايلىرىدىن يىغىپ كېلىنگەن بارلىق تۈردىكى زەھەرلىك يىلان ، زەھەرلىك ئۆمۈچۈك ۋە چايانلارنىڭ ئەۋرىشكىلىرى ساقلىنىپ تەتقىق قىلىنىدىغان بولۇپ ، بەزى ئەۋرىشكىلەرنىڭ تارىخى ھەتتا بىر ئەسىردىن ئاشقان . تەتقىقاتچىلار بۇ قېتىمقى ئوت ئاپىتى ئىنسانىيەتنىڭ زەھەرلىك يىلان-چايانلار ھەققىدىكى بارلىق قىممەتلىك ماتېرىياللىرى ۋە بايلىقى ، شۇنداقلا يېڭى زەھەرگە قارشى دورىلارنىڭ بالدۇرراق مەيدانغا كېلىش پۇرسىتىنى پۈتۈنلەي يوققا چىقىرىۋەتتى ، دەپ قارىدى .
