ئىككى غەزەل-ئەنۋەر ئابلا سەلكىن

سەلكىن01

  ئىككى غەزەل
  
ئەنۋەر ئابلا سەلكىن

  1
سېنىڭ كۈلپەتلىرىڭ كۆيگەن ۋىسالنىڭ سايىسى بولدى،
كۆيۈك باغرىمنى مىڭ ئۆرتەپ سۆيۈك دەسمايىسى بولدى.

تىنىقتا ‹‹ئاھ››لىرىم قۇتراپ پەلەكنى ئوتقا يەم قىلسا،
يۈرەككە تىغ ئۇرۇپ ھىجران جۇدالىق پايىسى بولدى.

گۈرىستان جىملىقى قەلبىم، لەۋزگە مەندە نە قۇدرەت؟
كېسىلگەن ئۈمىدىم بەربادلىقىمنىڭ بائىسى بولدى.

كېچەم ئەفغان يۇتۇپ چۈش بەرگىدە غەمكىن ئەلەڭگىيدۇ،
كۆزۈمدىن دەۋرىگەن دەريا پىغانىم نالىسى بولدى.

ئەجەپكى، بىداۋادۇرمەن،ئەجەل يەتكەيمۇ تەقدىردىن،
ئىشقنىڭ زەنجىرى چىرماپ جېنىم پەيمانىسى بولدى.

بوغۇلغان روھ قۇشۇم قاقماس قانات سەۋدايى رەۋىشتە،
كۈيۈم ئىزھارىدا سۆيگۈ ئۈلۈم ئەفسانىسى بولدى.

كېزىپ چۆللەرنى بۇ سەلكىن ساراڭ-سەۋداغا ئايلاندى،
مۇھەببەت شەھرىنىڭ ئاشىق گاراڭ دىۋانىسى بولدى.
  2
ئاھ،‹‹ئىشق›› دەپ كۈيلىرىمنىڭ شىددىتى تۆكتى ناۋا،
سۆيدى مەڭزىمگە سەھەرنىڭ سەلكىنى-دىلكەش سابا.

توختىماس بارماقلىرىمدا سۇيلىغان تار مەرغۇلى،
ھەم ئۈزۈلمەس تۈننى تاڭغا ئۇلىغان ياڭراق سادا.

مەن نىتەي، بولدۇم گاراڭ، ئىشقىم نەپەستە ئۇلغىيىپ.
چالمىسام تاڭ ئاتقىچە، دەردىمگە يوقتۇر ھىچ داۋا.

بۇ كۈيۈك ئۆرتەپ مېنى، ئەرۋاھقا ئايلاندىم تۈگەل،
يىغلىغاي ئاسمان-زېمىن بىر كۈن كېلىپ يەتسە قازا...

ئىسكىلىتنىڭ سۈرىتىنى بەلكى بۇ تەندىن كۆرۈڭ،
بىر تېرە، بىر ئۇستىخاننى ئەيلىدى تەڭرىم راۋا.

لېك، ماڭا پەرياد ئۇرۇپ پەرىشتىلەر سالدى چۇقان،
ناپىسەنت ئىشرەتكە مەپتۇن ئوتقا سالغان دىلرەبا.

كۈل بولۇپ تۇپراققا چۆكسەم قەبرىسىز قالدى دېمەڭ،
ھەر كېمەرسە باشىدا باردۇر ئەجەل، ئاچماڭ ھازا!...

مەنبە: ئۆزەم

نۇرلان

ھەۋەسكارلارغا ئۈلگە  بولغىدەك يېزىلغان ياخشى  شېئىركەن. قەلىمىڭىز يەنىمۇ بەرىكەتلىك بولسۇن.

WOLKANI

يېڭى غەزىلىڭىزگە مۇبارەك بولسۇن !

نەۋرۇز

ياشاڭ سەلكىن ، غەزەل دىگەننى ئاجايىپ ياخشى يازىسىز جۇمۇ!!! ھارماڭ ئاغىنەم

HIRISTAL

يېڭى غەزىلىڭىزگە مۇبارەك