بېرەي-ئەنۋەر ئابلا سەلكىن

سەلكىن01

                         بېرەي
   
                 ئەنۋەر ئابلا سەلكىن

سورىساڭ چوغ يۈرىكىمدىن كۆيگىلى گۈلخان بېرەي،
كۈلگە ئايلانساڭ تېرىلمەككە تېۋىپ-لوقمان بېرەي.

چۈشلىرىمدە ئەيلىگىن پەرۋاز سامادا قۇش بولۇپ،
قانىتىڭ قاتسۇن شاماللار ئەۋجىدە،جەۋلان بېرەي.

ساچلىرىڭ چىرماپ بەدەننى، رەنج-تالاپەت ئەيلىدى،
دار كېرەك بولسا، ئېشىپ رىشتىمدە يىپ-ئارقان بېرەي.

كىرپىكىڭ ئوق ياغدۇرۇپ قەلبىمنى پارە ئەيلىدى،
بىر تىنىقتا مىڭ قېتىم ئەرۋاھ بولۇپ، ئېھ! جان بېرەي...

قاپقارا قاشىڭدا ئۇخلايدۇ قارايغان كېچە-تۈن،
سۈبھىدەمدە كۆزلىرىڭدە پارلىسۇن چولپان بېرەي.

لەۋلىرىڭدە سۇيلىغان بىھۇش ئەسەبلەر چايقىلار،
خۇش ھىدىڭگە باغرى قانسۇن، سۇمبۇلى-رەيھان بېرەي.

سارغىيىپ ئاشىق نەپەستە كەتمىسۇن بەرگىڭ تۇزۇپ،
ياپيېشىل ئەسلىمىدىن گۈل ئۈندۈرۈپ، بوستان بېرەي.

يۇلتۇزۇڭ ئۆچكەن كېچە زۇلمەتتە يۈرگەيمەن ئەبەد،
تەپتى يالقۇنلۇق قۇياش بول،چېكى يوق ئاسمان بېرەي.

ئاي ساڭا باقتى ھەسەتتە، يۈزلىرىگە قوندى داغ،
ئاي جامالىڭ ئالدىدا يۈز ئاچمىسۇن، پەرمان بېرەي!

ئەستىلىكلەر سۆيگۈمىزنى ئەيلىدى ئىلھامغا باي،
بېيت-نەزمدە تەرىپىڭنى كۈيلىگەن داستان بېرەي.

مېھرىمىزدىن ئاقتى دەريا لەڭ ئۇرۇپ، تاشقىن ياساپ،
چۆمگىلى ئۆركىشىگە دەريا ئەمەس، ئوكيان بېرەي!...

مەنبە: ئۆزۈم

mewize

راستىنلا ياخشى يېزىلىپتۇ،ماڭا بەك يارىدى

نۇرلان

بۇ شېئىردا ئۇيغۇر تىلىنىڭ گۈزەللىكى، پاساھەتلىكى تولۇق نامايەن قىلىنىپتۇ. شېئىرنى قەلەم بىلەن ئەمەس، يۈرەك بىلەن يازغاندا مۇشۇنداق ئوقۇرمەنلەرنى ئالدىمايدىغان شېئىرلارنى يېزىپ چىققىلى بولىدۇ.
ئاپتورغا رەھمەت.

360

تېمىلىرىڭىز ئۈزۈلمىسۇن!!.

توغراق520

بەك ياخشى يېزىپسىز رەھمەت سىزگە.

zaker219

سىز بىلەن كۆرۈشمىگىنى ئۇزۇن بوپتىكەن  ئاخرى پەيدا بوپسىزدە ئادەمنى ئىنتىزار قىلىپ

Izqiman

شىئىرلىرىڭىز  بەدىلىك ياكى مەزمۇن جەھەتتە بولمىسۇن ۋايىغا يېتىدۇ-دە سىزنىڭ ،مەن سىزگە بەكلا قايىل ئاكا .

شاشتېكىن

بۇ شېئىر روھلان مۇنبىرىنى تېخىمۇ جۇلالاندۇرۇپتۇ.

نەۋرۇز

نەدىن كىلىدىغان ئىھامدۇ دەيمەن سەلكىنگە؟ بەزىدە ھەسەت قىلىپمۇ قالىمەن جۇمۇ سىزگە...................