ھەسەتخور-ئەنۋەر ئابلا سەلكىن

سەلكىن01

                                 ھەسەتخور

                        ئەنۋەر ئابلا سەلكىن

(ئابدۇرېھىم ئابدۇللانىڭ شۇ ناملىق غەزىلىگە تەخمىس)

‹‹ھەسەتخور›› دەپ ئاتالدىڭ سەن، سەۋەبى بارمۇ يادىڭدا؟
ساقايماس بۇ كېسەل ئەسلى ئاياندۇر كەيپىياتىڭدا،
ئۇنى ۋايىغا يەتكۈزدۈڭ كامالەت-كەشپىياتىڭدا،
دىلىڭدا كۈنۇ-تۈن ھەسرەت، ھەسەت قاينايدۇ باغرىڭدا،
زەھەر ئەمگەنمۇ ئوغۇز دەپ، نېمە بار جىسمىياتىڭدا؟

ئۆزۈڭنى بۇ جاھان ئادەملىرىنىڭ سەركىسى چاغلاپ،
بىرىنى چۆكۈرۈپ ‹‹جىن›› كۆرسىتىپ ۋە بىرىنى داڭلاپ،
بېسىقماس ئېغىزىڭ ئىتتەك قاۋاپ، ھەر كۈنى كاڭ-كاڭلاپ،
ئاقامدۇ قان ئەمەس زەرداپ ۋۇجۇدۇڭ دەشتىنى بويلاپ،
ھەسەلمۇ ئوغا تېتىيدۇ تائامىڭ، داستىخانىڭدا.

بىراۋنىڭ ئامىتى كەلسە ھەسەتكە چولغىنادۇرسەن،
تىلىڭ پىتنە-پاسات تېرىپ، ئېغىزدىن بۇلغىنادۇرسەن،
جىدەل-ماجرا ئۈچۈن مايسەن، چىراغدەك چوغلىنادۇرسەن،
ئەگەر شادلانسا تەقدىردىن قەلەندەر، تولغىنادۇرسەن،
كۈنۈڭ خۇش ئۆتتىمۇ بىر ئان، قېنى، ئېيت بولسا يادىڭدا؟

يېنىڭدا نەچچە نادانلار خۇشەمەت قىپ پالاقلايدۇ،
كۇسۇرلاپ، قاش ئېتىپ قويساڭ پىچاق-خەنجەرنى چاقلايدۇ،
كۈنۈڭ تەستۇر، ياشالمايسەن ئۇلاردىن ئايرىلىپ قالچۇ؟
ھەئە، خۇش ئۆتسە ئۆتكەندۇ چۈشۈپ ئۇشۇقلىرىڭ ئالچۇ،
ھايات دىشۋارىدىن بىرى كېلىپ ياش تۆكسە ئالدىڭدا.

شەھەر ئالدىڭ قۇرۇق گەپتە، ئادالەت بولدى لەت،ياپىر!
ئاتالدىڭ خەجلىمەي بىر پۇڭ بىراۋغا سېخى-مەرت، ياپىر!
يىگەنگە مىڭ ئېغىر كەلدى چىقاردا شۇ تەرەت، ياپىر!
بىراۋنىڭ تۇخۇسى تۇغسە ساڭا ئالەمچە دەرت، ياپىر!
ھەسەتتىن باشقا مۈلكۈڭ يوق ئەقىدەڭ، ئېتىقادىڭدا.

كىتىرلاپ تىنمىدىڭ ئوخشاپ گويا چاشقانغا ھەر دائىم،
ئۇرا قازدىڭ مىكىر بىرلە داۋان ئاشقانغا ھەر دائىم،
ئاراملىق بەرمىدىڭ قىرقىپ پېيىن ‹‹ئۇچقان››غا ھەر دائىم،
سالام، ھۆرمەتتە تاغ-دەريا زەپەر قۇچقانغا ھەر دائىم،
ئۇڭا سەن شول ھامان دۈشمەن ئىچىڭدە، قاتى-قاتىڭدا.

چۈشۈڭ تەتۈر كېلىپ قالسا گۇناھمۇ قالغىنىڭ ئۇخلاپ؟
كۆزۈڭگە داجىماس ئۇيقۇ كېچە-تۈن ھەپتىلەپ، ئايلاپ،
رەزىل مەخسەتلىرىڭ ھەر ئان تۇرار رەت-رەت بولۇپ ساخلاپ،
ئۈلەرسەن ھەر كۈنى بىر رەت قۇياش چىققاندا قان يىغلاپ،
ھۇقۇشقا ئۈلگە-ئۆرنەكسەن يارالمىش نەسلى زاتىڭدا.

ياشاشتىن مۇددىئا:ساقلىق تېلەپ تەنگە كۈتۈلمىشتۇر،
ئۆمۈرنىڭ دۇرىسى تاتلىق قاقاھلاپ كۈندە كۈلمىشتۇر،
ياراتقان تەڭرىگە سەندىن گۇناھ پاتمان ئۈتۈلمىشتۇر،
ئاشۇ قىسمەت، ئاشۇ تەقدىر پىشانەڭگە پۈتۈلمىشتۇر،
جىمى مەخلۇق ئارا تەگكەن نېسىۋە، تەقسىماتىڭدا.

مەنبە:ئۆزەم

alxir

ھەسەتخورلار ئۇرۇلغان قامچىدىن سۈيۈندۈم

نۇرلان

سەلكىن ئەپەندىمنىڭ پاساھەتلىك مىسرالىرىغا تەشەككۈر.

zaker219

سەلكن ئەپەندىنىڭ شئىرلىرنى سۆيۈپ ئوقۇيمەن جۇمۇ!!!!!!!!!!!!1

نەۋرۇز

ئەسسالامۇ ئەلەيكۇم قېرىندىشىم سەلكىن ئەپەندى. روھلاننى بەكلا تاشلىۋەتتىڭىزغۇ؟ ئەمما بۇ يازمىڭىز ئىستىداتىڭىزنى يەنە بىر قېتىم نامايان قىلىش بىلەن بىرگە يازمىللىرىڭىزنى سېغىنغان يەرگە باردى رەھمەت سىزگە.

zulpikar0997

سەلكىن ئاكامزە، يازغان مىسرالىرىڭىزغا ئاپرىن