نورۇز ھەققىدە ئىككى غەزەل

سەلكىن01

           نورۇز ھەققىدە ئىككى غەزەل

                ئەنۋەر ئابلا سەلكىن

                         1
كەل بوۋا-نورۇز ئەزىزىم، قوللىرىڭغا گۈل تۇتاي،
گۈل بىلەن خەستە دىلىڭنى خۇش قىلىپ، مەيلىڭ ئۇتاي.

سال جۇۋاڭنى، ئىل قۇزۇققا، ئارت يېڭى تون- ئۈستىباش،
داڭ قېتىپ قالسۇن جامالىڭ شەمئىگە ئاسماندا ئاي.

كۈندۈزى كۈننىڭ زىياسى قارچۇقۇڭدا پارلىسا،
چۈش كۆرۈپ تاڭ پەيتىدە قوينۇڭدا چولپان ئۇخلىغاي.

دالىلاردا تۇلپىرىڭنىڭ تۇيىقى ئوت چاچرىتىپ،
بەيگىدە ئوقتەك ئۇچۇپ، تىزگېن سېرىپ، شوق چاپچىغاي.

قوشقىرىڭنىڭ مۈڭگۈزى مىسران قېلىچنى ئەسلىتەر،
ئۈسسۈشۈپ مەيدان ئارا، تەلۋە خۇيىدىن قالمىغاي.

سوقۇشۇپ خورازمۇ ھەم قانغا بۇيالغاي تاجىسى،
ھەملە قىپ بىر-بىرىگە ئىتلارمۇ ئەنسىز قاۋىغاي.

يەتتە دان بەركاتىدىن تەييار ئەنە نورۇز ئېشى،
تەگكۈزۈپ ئەلكۈن ئېغىز، تەشنالىقىنى ئاشلىغاي.

سەن بىلەن كەتسۇن نىزاھ،ئۆملۈك داۋاملاشسۇن ئەبەد،
ئۆچ- ئاداۋەت يىلتىزىنى بارچە كېسىپ تاشلىغاي.

سەن دېمەك ئەجداد مىراسى يەتتە ئىقلىمدا يېتۈك،
خەلقىمىز باشقا ئېلىپ، يەلكىسىدە ھاپاشلىغاي!...
                          2   
سۆيدى مەڭزىمگە يېقىملىق نەۋباھار، نورۇز كېلىپ،
سۆيگۈسى قەلبىم قېتىدا بىغۇبار، نورۇز كېلىپ.

ئېرىدى مۇز، ئاقتى ئەگىز، قاندى يەر-ئېتىز، دالا،
قايتتى مەنزىلگە تۈزۈپ سەپ تۇرنىلار، نورۇز كېلىپ.

باش كۆتۈردى مايسىلار، يۈز ئاچتى كۆكلەم جىلۋىسى،
تارتتى مەيلىمنى يېشىللىق-لالىزار، نورۇز كېلىپ.

ئۇيقۇسىدىن ئويغىنىپ بار مەۋجۇدات ئېيتتى مۇقام،
مەرغۇلىغا بولدى تەڭكەش داپ، دۇتار...نورۇز كېلىپ.

تارىتىپ خۇشبۇي پۇراق شاخلاردا نازغىيدۇ چېچەك،
تەبىئەت توزدەك ياساندى گۈلئۇزار نورۇز كېلىپ.

بارچىنىڭ يازلىق كىيىملەر زەپ ياراشتى بەستىگە،
كېپىنەكلەر بولدى ئاشىق-بىقارار، نورۇز كېلىپ.

قاينىدى مەشرەپ-باراۋەت، سالدى داستخان يۇرتقا ئەل،
ئوخشىغان نورۇز ئېشىدىن بال تامار، نورۇز كېلىپ.

دىلنى مەپتۇن ئەيلىدى شائىر-ئەدىبلەر نەزمىسى،
شۇ قاتارى نەزمىگاھتا مەنمۇ بار، نورۇز كېلىپ.

تۈندە ئاي، يۇلتۇز بىلەن سىرداش خىيالىم سەلكىنى،
ھەر سەھەر بەكمۇ چىرايلىق تاڭ ئاتار نورۇز كېلىپ!...

مەنبە: ئۆزۈم

ئەركيۇرت

بۇ شېئىر تورداشلارغا نورۇزلۇق ئېسىل سوۋغا بولغۇسى!

ABDUXUKUR9130

رەھمەت سىزگە      ھەممەيلەننىڭ نۇرۇز بايرىمىغا مۇبارەك بولسۇن

مەمەت5

ياخشى يىزىلىپتۇ دەپلا قويساق بولامدۇ ؟ھەممەيلەننىڭ نورۇز بايرىمىغا مۇبارەك .

13239983181

ئۆزىمىزنىڭ بايرىمىمىزغا قانچە يازساق ئەرزىيدۇ

نۇرلان

نەۋرۇز بايرىمىغا ئاتاپ يېزىلغان بۇ شېئىر ھەقىقەتەن ياخشى چىقىپتۇ.

تۇرسۇن

سىزگە رەھمەت، جاپا چىكىپسىز جۇمۇ؟