كىچىك ئىشلارغىمۇ سەل قارىماڭ

ئەنجۈر

  بىر سودىگەر سودىسىنى تۈگىتىپ بولۇپ ئېتىنى مىنىپ ئۆيگە قايتىپتۇ. ئۆيگە ئاز قالغاندا چاكىرى ئاتنىڭ تاقىسىنىڭ بىر مىخىنىڭ چۈشۈپ قالغانلىقىنى بايقاپ ئۇنىڭغا ئېيتىپتۇ. لېكىن سودىگەر:
   ــــ كارىڭ بولمىسۇن، بەرىبىر ئۆيگە ئالتە سائەتلىك يول قالدى، - دەپتۇ.
   يولنىڭ يېرىمىغا كەلگەندە، ئۇنىڭ چاكىرى يەنە سودىگەرگە :
   ــــ ئاتنىڭ ئوڭ پۇتىدىكى تاقىسى چۈشۈپ قاپتۇ، تاقىلامدۇق؟ - دەپ سورىسا، سودىگەر:
   ــــ بولدى، مەن ھازىر ئۆيگە ئالدىراۋاتىمەن، ئۆيگە يېتىپ بارىدىغانغىمۇ ئۈچ سائەتلىك يول قالدىغۇ، - دەپتۇ.
   ئۇلار ئازراق ماڭغاندىن كېيىن ئات ئاقساشقا باشلاپتۇ ھەمدە ئۇزاق ئۆتمەيلا ئاتنىڭ پۇتى قاناپ، يىقىلىپ چۈشۈپتۇ.
   سودىگەرمۇ ئامالسىز چاكىرى بىلەن يۈك - تاقىلىرىنى كۆتۈرۈپ پىيادە ئون نەچچە سائەت يول يۈرۈپ ئۆيىگە كېلىۋاپتۇ.
   بۇ ھېكايىدىن نېمىنى چۈشەندىڭىز؟ مېنىڭچە، ئەمەلىيەت مۇشۇنداق، كىچىك خاتالىق ياكى سەۋەنلىك ۋاقتىدا تۈزىتىلمىسە، ئاستا - ئاستا ئورنىغا كەلتۈرگىلى بولمايدىغان چوڭ خاتالىق كېلىپ چىقىدۇ. شۇڭا بىز كىچىك خاتالىقلارغا سەل قارىماسلىقىمىز كېرەك.

ھەممە ئىشتا مەسئۇلىيەتچان بولۇش كېرەك

  بىر پىشقەدەم ياغاچچى دەمئېلىشقا چىقماقچى بولۇپ ، خوجايىنغا قۇرۇلۇش ساھەسىدىن ئايرىلىپ ، ئائىلىسىدىكىلەر بىلەن ئارامخۇدا تۇرمۇش كەچۈرىدىغانلىقىنى دەپتۇ .
   خوجايىننىڭ ئۇنىڭدىن ئايرىلىشقا كۆزى قىيماي ، ئايرىلىشتىن بۇرۇن ياغاچچىنىڭ ئۆزىنىڭ ئۇسلۇبىدا لايىھەلەنگەن بىر ئۆي سېلىشىنى ئېيتىپتۇ.
   ياغاچچى ماقۇل بوپتۇ ، لېكىن ئۇ ئۆينى سۈپىتى ناچار ماتېرىياللار بىلەنلا سېلىپ چىقىپتۇ. ئەسلىي بۇ خىل ئۇسۇل بىلەن ئۆزىنىڭ كەسپىي ھاياتىنى ئاخىرلاشتۇرۇش ھەقىقەتەن توغرا ئەمەس ئىدى.
   ئۆي سېلىنىپ بولغاندىن كېيىن ، خوجايىن ئۆينى تەكشۈرگىلى كېلىپ ، ئۆينىڭ ئاچقۇچىنى ياغاچچىغا تۇتقۇزۇپ تۇرۇپ: ‹‹سىزنىڭ شۇنچە يىللاردىن بۇيان ماڭا ئىشلەپ بەرگىنىڭىزگە رەھمەت ، ئۆزىڭىزنىڭ ئۇسلۇبى بويىچە سېلىنغان بۇ ئۆينى سىزگە سوۋغا ئورنىدا بەردىم ›› دەپتۇ.
   بۇ ھېكايىدىن نېمىنى چۈشەندىڭىز ؟ مېنىڭچە ، ئەگەر بۇ ياغاچچى ئۆينىڭ ئۆزىگە بېرىلىدىغانلىقىنى بىلگەن بولسا، ئۇ چوقۇم ئەڭ ياخشى ماتېرىيالنى ئىشلىتىپ ، ئەڭ ئىلغار تېخنىكا بىلەن سالغان بولاتتى. لېكىن ھازىر ئۇ باشقىلارغا مەسئۇلىيەتسىزلىك قىلغانلىقى ئۈچۈن ، ئۆزىمۇ ئولتۇرۇشنى خالىمايدىغان ئۆيدە ئولتۇرۇشىغا توغرا كەلدى. قارىغاندا ئادەم ھەر ئىشتا مەسئۇلىيەتچان بولۇشى كېرەككەن .

سەييارە

توغرا ھەرقانداق ئىشتىمۇ مەسئۇليەتچان بۇلۇش كىرەك،كىچىك ئىش  دەپ بىپەرۋالىق قىلىشقا بولمايدۇ.تىما ئىگسىگە رەخمەت تەربىيەۋې ئەھمىيتى زور بىلىملەرنى تەمىنلەپسىز.

9004

تەربىيە ئەھمىيەت ئىگە ئەسەر ئىكەن ، بۇ ئەسەرنى راسلا سىز يازدىڭىزمۇ ياكى باشقا تور بەتلەردىن كۆچۇرۇپ يوللاپ قويدىڭىزمۇ.