ئۆزىگە تايانغان ھەممىدىن ئەلا

ئەنجۈر

بىر قورۇدا ئىككى دەرەخ بار ئىكەن. بىر دەرەخ ئېگىز تامنىڭ يېنىدا بولغاچقا، تامنىڭ ھىمايىسىدە تۈز ھەم ئېگىز ئۆسۈپتۇ. يەنە بىر دەرەخ ئۇنىڭغا تۈپتىن ئوخشىمايدىكەن، چۈنكى ئۇ دائىم بوراننىڭ ۋە يامغۇرنىڭ زەربىسىگە ئۇچراپ تۇرغاچقا، ھەم قىڭغىر ھەم سەت ئۆسۈپتۇ.
   بىر يىلى يازدا ئاز ئۇچرايدىغان تەيفېڭ بورىنى بۇ شەھەرگە ھۇجۇم قىپتۇ. تەيفىڭ بورىنى ئۆتۈپ كەتكەندىن كېيىن، كىشىلەر كۆز ئالدىدىكى مەنزىرىدىن ھەيران قاپتۇ، يەنى ئېگىز تام ئۆرۈلۈپ كەتكەن بولۇپ، ئۇنىڭ يېنىدىكى چوڭ دەرەخمۇ سۇنۇپ كېتىپتۇ، لېكىن ھېلىقى قىڭغىر دەرەخ شۇ پېتى تۇرغان ئىكەن.
   سىز بۇ ھېكايىدىن نېمىنى چۈشەندىڭىز؟ مېنىڭچە، بىر ئادەم ھەر دائىم پاناھلىنىدىغانلا جاي ئىزدەپ، شۇنىڭغىلا تايىنىۋالسا، ئۇنداقتا ھەقىقىي بوران - چاپقۇن ئالدىدا ھېچنىمىگە يارىماي قالىدۇ. ئادەم يەنىلا ئۆزىگە تايانغىنى تۈزۈك.

ھاياتنىڭ ماھىيىتى

تۇرمۇشتا خاتالىقتىن ساقلانغىلى بولمايدۇ. بىلىپ - بىلمەي ئۆتكۈزگەن خاتالىقلىرىڭىزنى ئۆزىڭىز ياكى باشقىلار سېزىپ قېلىشى مۇمكىن، شۇنى بىلىڭكى، ياخشى ئادەم بىلەن يامان ئادەمنىڭ پەرقى، ياخشى ئادەمنىڭ خاتالىقىنىڭ ئاز، يامان ئادەمنىڭ خاتالىقىنىڭ كۆپ بولغانلىقىدا ئەمەس، بەلكى ياخشى ئادەمنىڭ خاتالىقىنى سەزگەن ھامان تۈزىتىشكە تىرىشىدىغانلىقى، يامان ئادەمنىڭ خاتالىقىنى بوينىغا ئالمايدىغان، ھەتتا قايتا خاتالىق ئۆتكۈزۈشتىن قورقمايدىغانلىقىدا.
   مۇبادا بىراۋ: ‹‹خاتالىقىڭىز بىلەن كۈرەش قىلىشقا ئەرزىمەيدۇ، چۈنكى ھەرقانچە تىرىشچانلىق كۆرسەتسىڭىزمۇ خاتالىق ئۆتكۈزۈشتىن خالىي بولغىلى بولمايدۇ›› دېسە، ئۇ خۇددى: ‹‹ماڭا ئاش - تاماق بەرمەڭ، چۈنكى يەپ بولسام، يەنە قورسىقىم ئاچىدۇ›› دېگەندەك بىر گەپ بولۇپ قالىدۇ. ھاياتنىڭ ماھىيىتى دەل خاتالىقىڭىز ۋە ئاجىزلىقىڭىز بىلەن كۈرەش قىلىشتا. ئۆزىڭىزگە ھەقىقىي باھا بەرگەن ۋاقتىڭىزدا، خىزمەتتە، ئائىلىدە ۋە ئىجتىمائىي مۇناسىۋەتتە نۇرغۇن ئاجىزلىقىڭىزنىڭ بارلىقىنى ھېس قىلالايسىز، بىراق پەقەت ھېس قىلىشلا كۇپايە قىلمايدۇ، مۇھىمى ئاشۇ ئاجىزلىقلارنى تۈگىتىش ئۈچۈن توختاۋسىز كۈرەش قىلىشتا.

9004

ياىشى بىر تىما ئىكەن.