پەقەت پالتام بولسىلا

ئەنجۈر

تاغدا ئوتۇن كېسىپ تىرىكچىلىك قىلىدىغان بىر ئوتۇنچى بولۇپ، ئۇ ناھايىتى مۇشەققەتتە ئۆزىگە لايىق بىر ئۆي ساپتۇ. بىر كۈنى ئۇ بازارغا ئوتۇن ئەكىرىپ، سېتىپ، كەچقۇرۇن ئۆيىگە قايتىپ كېلىپ ئۆيىنىڭ بىر دۆۋە كۈلگە ئايلىنىپ قالغانلىقىنى كۆرۈپتۇ.
   ئەتراپتىكى قوشنىلارنىڭ ھەممىسى ئوت ئۆچۈرگەن بولسىمۇ، شامال كۈچلۈك بولغاچقا، ئوتنى ئۆچۈرۈۋالالمىغان ئىكەن. ئوتۇنچىنىڭ بىر تاياقنى ئېلىپ كۈل دۆۋىسى ئىچىدىن بىر نېمىنى ئىزدەۋاتقانلىقىنى كۆرگەن قوشنىلار ئۇنى قىممەتلىك بىر نەرسىنى ئىزدەۋاتقان ئوخشايدۇ دەپ، ئۇنىڭ ئەتراپىغا ئولىشىپتۇ. بىر مەھەل ئۆتكەندىن كېيىن، ئوتۇنچى خۇشال ھالدا ‹‹مەن تاپتىم، مەن تاپتىم›› دەپ ۋارقىراپ كېتىپتۇ.
   ھەيران قالغان قوشنىلار ئۇنىڭ قولىدا پەقەت بىر پالتىنىڭ تۇرغانلىقىنى كۆرۈپ تېخىمۇ ھەيران قاپتۇ. بۇ ۋاقىتتا ئوتۇنچى خۇشال ھالدا: ‹‹پەقەت مۇشۇ پالتام بولسىلا، بۇ ئۆيدىنمۇ مۇستەھكەم ئۆينى قايتا سالالايمەن›› دەپتۇ.
   مۇۋەپپەقىيەت قازانغان ئادەم ئەزەلدىن ئوڭۇشسىزلىققا ئۇچراپ باقمىغان ئەمەس، بەلكى ئوڭۇشسىزلىققا ئۇچرىغاندىن كېيىن، ئۆزىگە ئىشەنگەن ھالدا مۇۋەپپەقىيەت قازىنىش يولىغا قاراپ ئۈزلۈكسىز ئىلگىرىلەيدىغان ئادەم. پەقەت ياشاش ئېتىقادى بولسىلا، تېخىمۇ گۈزەل ھايات مۇساپىسىنى ياراتقىلى بولىدۇ.

ھازىرنىڭ ئۆزى بەخت

بىر باي بىلەن بىر كەمبەغەل نېمىنىڭ بەخت ئىكەنلىكى توغرىسىدا پاراڭلىشىپ قاپتۇ.
   كەمبەغەل ئادەم:
   ــــ ھازىرنىڭ ئۆزى بەخت، - دەپتۇ.
   باي كەمبەغەلنىڭ كەپىسى، جۇل - جۇل كىيىمىگە قاراپ چىققاندىن كېيىن:
   ــــ بۇنى قانداقمۇ بەخت دېگىلى بولسۇن؟ مەن دېمەكچى بولغان بەخت ــــ ھەشەمەتلىك تۇرالغۇ، مىڭلىغان چاكار، - دەپتۇ.
   بىر كۈنى باينىڭ ئۆيىگە ئوت كېتىپ ھەشەمەتلىك تۇرالغۇسى كۆيۈپ كۈل بولۇپ كېتىپتۇ، چاكارلىرىمۇ قېچىپ كېتىپتۇ. شۇنداق قىلىپ باي بىر كېچىدىلا دىۋانىغا ئايلىنىپ قاپتۇ.
   قاتتىق ئىسسىق بىر كۈنى چىلىق - چىلىق تەرگە چۆمگەن دىۋانە كەمبەغەلنىڭ كەپىسى يېنىدىن ئۆتۈپ كېتىۋېتىپ، كەپىگە ئۇسسۇلۇق سوراپ كىرىپتۇ. كەمبەغەل بىر پىيالە سۇنى ئۇنىڭغا بېرىپ، ئۇنىڭدىن:
   ــــ سەن ھازىر نېمىنىڭ بەخت ئىكەنلىكىنى بىلدىڭمۇ؟ - دەپ سوراپتۇ.
   ــــ بەخت دېگەن مېنىڭ قولۇمدىكى سەن بەرگەن مۇشۇ بىر پىيالە سۇ، - دەپتۇ.
   بۇ ھېكايىدىن نېمىنى چۈشەندىڭىز؟ مېنىڭچە، ھازىرنىڭ ئۆزى بەخت، ھازىرنى بىرمۇبىر ئۇلىسىڭىز، بىر ئۆمۈرلۈك بەختكە ئىگە بولىسىز. ھازىرنى قەدىرلەڭ، قولىڭىزدىكى بىر ئىستاكان سۇ، ئادەتتىكى تاماق، ئادەتتىكى خىزمىتىڭىزنىڭ ھەممىسى بەخت.

salaijan207

مېنىڭچە بۇمۇ بىر يەرلەردىن كۆچۈرۈپ ئېلىپ كېلىنگەن تېمىمىكىن دەيمەن. بولسا مەنبەسىنى ئەسكەرتىڭ، بولمىسا ئۆزىڭىزگە ياخشى ئەمەس.

ئەنجۈر

ئۈرۈمچى كەچلىك گېزىتى

سەلكىن01

ئىبرەتلىك تېمىڭىزغا ھەشقاللا. ئوڭۇشسىزلىق ئۈستىدىن غالىپ كېلەلىگەنلەر گىگانت كىشىلەرگە ئايلىنالايدۇ. بەختنىڭ نېمىلىكىنى ھەقىقىي تونۇپ يەتكەنلەر ھايات خۇشاللىقىدىن بەھر ئالالايدۇ. كىشىلەر ھەر كۈنى بۇ ئىككى جەۋھەرنى ئۆزىگە تىلتۇمار قىلىشى لازىم.