مۇئەللىمنىڭ دەردى بار
سورىقى بار ھايات بۇ، ئۆلگەننىڭمۇ دەردى بار،
كۆكرەك كېرىپ ئۆلۈمگە كۈلگەننىڭمۇ دەردى بار.
ناخشىسىنى دۆڭ توۋلاپ يۈرگەننىڭمۇ دەردى بار،
قاپىقىنى زورىغا تۈرگەننىڭمۇ دەردى بار،
قوي ئۇ دەردنى بولدى بەس! مۇئەللىمنىڭ دەردى بار.
نامى ئۇنىڭ چىرايلىق ئېغىزغا لىق كەلگۈدەك،
شامدەك ئىرىپ يۈتكىلى شۇڭا كۆيۈپ تۇرغىدەك.
ئىشلىسىمۇ كۈنۇ-تۈن ئالماس ئۇچلۇق بۇرغىدەك،
كىمدۇر رازى ئەمەسمىش، يىلتىزىدىن يۇلغىدەك،
سۆزلىمەسكە نە چارە؟! مۇئەللىمنىڭ دەردى بار.
چۇرۇقلايدۇ باچكىلار دان چاچمىسا بولمايدۇ،
تىزدا يېرىم خاتىرە ئۆلچەمگە يا تولمايدۇ.
مۇدىر قىسىپ كۆزىنى نېمىنىدۇر ئويلايدۇ،
ئۇخلاشقىمۇ شەرت قويۇپ، ئىش ھەققىدىن كوملايدۇ،
ئۆيگە قايتقان قۇرۇق قول مۇئەللىمنىڭ دەردى بار.
گاھى تاتلىق خىياللار سۈرىشىگە رۇخسەت يوق،
تەكشۈرۈش بار كۈنلەردە ئۆلىشىگە رۇخسەت يوق.
كۇسۇرلىشىپ ئۆز-ئارا كۈلىشىگە رۇخسەت يوق،
كەلسە رەھبەر دەرت-ئەھۋال سۆزلىشىگە رۇخسەت يوق،
رۇخسەتلەرگە زار بولغان مۇئەللىمنىڭ دەردى بار.
تەتىل دېگەن قۇرۇق گەپ، يەكشەنبىمۇ يوق ئىمىش،
سۈپەت قالتىس ئۆسەرمىش ئىشلىگەندە يازۇ-قىش.
توۋا! ئۆكۈز بولغىنى ئۇنىڭ زادى نېمە ئىش؟!
يۇلىۋېتىپ ساق چىشنى قالغىنىدەك ئاغرىق چىش،
ئاغرىقلارغا چىدىغان مۇئەللىمنىڭ دەردى بار.
بۇيرۇق كەلدى يېزىدىن قۇرت تەرگىلى ئالدىرار،
گاھ ئېتىزدا كېۋەزنىڭ پايپىقىنى سالدۇرار.
تاپشۇرۇقنىڭ كېمىنى كەچتە ئۆيگە قالدۇرار،
غەم ئۈستىگە يەنە غەم ئۇنى بالدۇر تالدۇرار،
چۈشىدىمۇ ئالدىراش مۇئەللىمنىڭ دەردى بار.
بىرى دەيدۇ مۇئەللىم قىلنى قىرىق يارىدۇ،
بىرى دەيدۇ تەتىلدە نىچۈن ئارام ئالىدۇ؟!
بىرى ئۇنى داپ بىلىپ ئۆز كۈيىگە چالىدۇ،
مۇئەللىمسىز بۇ ھايات قاي قىسمەتكە قالىدۇ؟!
بۇنى بىلەر ھېچكىم يوق، مۇئەللىمنىڭ دەردى بار.
تىنىۋالاي بىر نەپەس سۆزۈمدە ھېچ يالغان يوق،
ئەجىر قىلماي ساماندىن داننى ئايرىپ ئالغان يوق.
مۇئەللىمى بار ئەلدىن نادانلىقتا قالغان يوق،
مۇئەللىم مەن، چاكارمەن! كىملىكىمدىن تانغان يوق،
قىسمەتلەردە تاۋلانغان مۇئەللىمنىڭ دەردى بار.
2015.02.08
ئىناۋەت
تەڭگە
بايلىق
تۆھپە
IP كارتىسى
ۋاقتى: 2015-2-27 14:16:15
كۆتۈرۈش كارتىسى
چوققىلاش كارتىسى
变色卡
ۋاقتى: 2015-2-27 17:55:41
ۋاقتى: 2015-2-27 19:24:14
ۋاقتى: 2015-2-27 23:40:26
/1 
