تىرىشچانلار مارشى

بودەك

تىرىشچانلار مارشى
تۇرسۇنگۈل ئابدۇرىشىت

ھايات ماڭا كېلىدۇ بىر رەت،
گۈل تىزىمەن ئۇنىڭدىن رەت-رەت.
تەبەسسۇمدا ياشايمەن ھەيۋەت،
ئىشەنمىسەڭ كېلىپ كۆرۈپ كەت.

ياشلىق ماڭا كېلىدۇ بىر رەت،
پۈركىنىمەن گۈلگە مەن بۇ رەت.
ئۈندۈرمەيمەن قەلبىمدە نەپرەت،
يول قويمايمەن چېكىشكە ھەسرەت.

پۇرسەت ماڭا كېلىدۇ بىر رەت،
ئارزۇيۇمغا يېتىمەن شۇ رەت.
بوش قويمايمەن بىر مىنۇتنىمۇ،
ئۇنىمايمەن دېسە « قويىۋەت ».



باھار ئەلچىسى
تۇرسۇنگۈل ئابدۇرىشىت

باھاردا ئېرىقتا ئاققان شوخ سۇغا،
تەشەككۇر بىلدۈرۈپ قىلىدۇ تەزىم.
ھال سوراپ تۇرىدۇ يېنىك تەۋرىنىپ،
ھەر تامچە سۇلاردىن شۇنچە مۇلايىم.

ئۇنىڭ ياپرىقى ھەم غولى تامام،
ياپيېشىل كۆرۈنەر ياساپ دولقۇنلار.
بولغاچ ئۇ كۆكلەمنىڭ تۇنجى سىماسى،
ئاتالغان باھارغا ئەلچى مەجنۇنتال.

سوغ شامال ئۆتكەندە يۈزلەرنى سىپاپ،
تەۋرىنىپ تۇرىدۇ ئاستا دولقۇنلاپ.
ئىنچىكە ھەم گۈزەل يېشىل شاخلىرى،
شوخ گۈزەل بىر قىزغا كېتىدۇ ئوخشاپ.

تەۋرەنسە ئەۋرىشىم شاخلىرى ئۇنىڭ،
سۈپسۈزۈك سۇلارنى سۆيۈپ كېتىدۇ.
سۇلارنىڭ شىلدىرلاپ ئېقىشلىرىمۇ،
مەجنۇنتال جىسمىغا سىڭىپ كېتىدۇ.


مەنبەسى: شىنجاڭ يېزائىگىلىك ئۇنىۋېرىستېتى گېزىتى

ئىلغار

ياخشى شېئىركەن رەخمەت سىزگە

دىلرۇس

شۇ دەقىقىدە باھارغا ھەمرا بولۇپ، تىرىشچانلار مارشىنى ئېيتىپ كېلىۋاتقانلارغا زوقلۇنۇپ قاراپ قاپتىمەن...
ياخشى سوۋغىكەن، رەھمەت سىزگە.