چوڭ مۇدىر(ساتىرا)-ئەنگەر

angar

ئۇ ئەمەسمۇ «چوڭ مۇدىر»

ساتىرىك مۇخەممەس

تارتساڭمۇ گەر مالامەت،چالۋاقىماي قىل سەۋىر،
كۆرمەك بولساڭ ھالاۋەت،قىلغىن مەندەك كۆپ ئەجىر،
بەرسەڭ ماڭا ئىجازەت ،تۈزۈپ بېرەي مەن تەدبىر،
تەر ئاققۇزۇش بىھاجەت،«خو››دىسىلا شۇ مۇدىر،
بار ئۇنىڭدا كۆپ خىسلەت،ئۇ بولغاچقا« چوڭ مۇدىر››.

مەكتەپلەرنىڭ خاقانى مۇدىر دىگەن بىلىۋال،
ئەۋلىيا دەپ بىلىپ ھەم قوللىرىغا سۆيىۋال،
ئاداشتۇرماي باشقىغا ئۇنى ئوبدان تۇنىۋال،
كەلسە ئەگەر ئۆيۈڭگە كالا –قوينى سويىۋال،
شۇندا بېرەر مۇكاپات ،ئۇ بولغاچقا «چوڭ مۇدىر».


قىلسۇن ئۆزى بىلگەننى بولماپتۇنى دەپ قويما ،
يۇمشاق دىسە كىرپىنى ئۇنداق ئەمەس دەپ قوپما،
لاتا قوزۇق قاق دىسە قانداق بولار دەپ تۇرما،
رۇخسەت ئالماي ئۇنىڭدىن دورا –ئوكۇل يەپ قويما ،
ساڭا بېرەي بىر ساۋات، ئۇ بولغاچقا «چوڭ مۇدىر››.

خاتىرجەملىك يار ساڭا شۇم ئاغزىڭنى چىڭ قىلساڭ،
بىر كۆزۇڭنى قىسىۋاپ ،يالغاننىمۇ جىڭ قىلساڭ،
پاشا بولغىن دەپ قالسا زۇۋان سۈرمەي غىڭ قىلساڭ،
ماختاپ كۆككە ئۈچۈرۈپ خوشامەتنى مىڭ قىلساڭ،
قىلار ساڭا ئىلتىپات ،ئۇ بولغاچقا «چوڭ مۇدىر››.

راسلاپ سورۇن -داستىخان،پات-پات مېھمان قىلىۋال،
ئىچەلمىسە ھۆ قىلىپ ،سەن يۇشۇرۇن ئىچىۋال،
رەھبەر دىگەن قىزلارغا ئامراق كېلەر بىلىۋال،
ناز كۆرسىتىپ دالدىدا كۆڭلىنىمۇ ئېلىۋال،
شەرەپ بېرەر قاتمۇ-قات ،ئۇ بولغاچقا «چوڭ مۇدىر››.

تەكشۇرۈشكە كەپ قالسا ياخشى باشلىق دەۋەرگىن،
يىگىن دىسە تاشنىمۇ مەززە قىلىپ يەۋەرگىن.
تەخسىكەشلىك دېپىنى قاملاشتۇرۇپ چەۋەرگىن،
نۇمۇس ئىش دەپ قارىساڭ بىر ئىزدىلا قەۋەرگىن،
ئۆتكەن ئىشقا سالىۋات ،ئۇ بولغاچقا ‹‹چوڭ مۇدىر››.

ئائىلەم دەپ بالام دەپ ياش ئاققۇزما ئالدىدا،
غەيۋىتىنى باشلىقنىڭ قىپ يۈرمىگىن ئارقىدا،
ساقلا دىسە چوغنىمۇ ساقلاۋەرگىن پاختىدا،
ئولتۇرىسەن بىر كۈنى سەنمۇ ئالتۇن تاختىدا،
بېرەلەيدۇ قەن-ناۋات ،ئۇ بولغاچقا‹‹چوڭ مۇدىر››.

يۇقىرىغا دەرت ئېيتساڭ سەن باشلىقنى چاققىنىڭ،
پىلىكىگە بومبىنىڭ ھەم ئوتلارنى ياققىنىڭ،
تويغۇزىدۇ قىلغانغا يوق بالانى تاپقىنىڭ،
ئازلىق قىلار گاھىدا سولاقتىمۇ ياتقىنىڭ،
تېنىچ كۈنلەر ساڭا يات،ئۇ بولغاچقا ‹‹چوڭ مۇدىر››.

تىگىپ قالساڭ چىشىغا باپلايدىغان پەمى بار،
يېقىتىپلا داق يەرگە دەسسەيدىغان چەمى بار،
پالىنىسەن يىراققا يولنىڭ ئاچچىق تەمى بار،
جەرىيمانە يىغىشتا كەسكىن دىگەن نامى بار،
قىلىپ تۇرار سېنى مات،ئۇ بولغاچقا‹‹چوڭ مۇدىر››.

كېرەك ئەمەس سەۋىيە،ئىتائەچچان بولساڭلا،
سىزىپ بەرگەن سىزىقتىن چىقىپ كەتمەي ماڭساڭلا،
ھېلى -مىكىر ،باپلاشتا مول بىلىمگە تولساڭلا،
پۇتلاش ئۈچۈن ياخشىنى پىيىدىلا يۇرسەڭلا،
ئاتا قىلار جۇپ قانات،ئۇبولغاچقا‹‹چوڭ مۇدىر››.

مېنى دىدى دىمەستىن ئەمەل قىلغىن سۆزۈمگە،
يول كۆرسەتكىن دەپ يەنە كىرىۋالما كۆزۈمگە،
ئارتۇق كەتسە گەپلىرىم قايتۇرۇپ بەر ئۆزۈمگە،
بىلىپ قالسا باشلىقىم مېنى بويرار ئۆلۈمگە
،ماڭا كېرەك بۇ ھايات ،ئۇ بولغاچقا ‹‹چوڭ مۇدىر››

.

زەھرا

ۋاھ...ئەنگەر ،ساتىرا ،مۇخەممەسلەرنىڭ قاتىلىنى يازىدىكەنسىزغۇ....ھە!  بەك ياخشى يېزىپسىز ،ئۆتكۈر تىل ،ئاچچىق كىنايە بىلەن تازا سۆكەپسىز  بىر قىسىم «چوڭ مودىر»لارنى ،ھەم غالچىلارنى ....
ئىجادىيەت قەلبىڭىز ،ئىجادىيەت قەلمىڭىز ھەرگىز توختاپ قالمىغاي!......

سەييارە0

ياخشى كەپتۇ،جەميىتىمىزدە بۇنداق كىشلەر كۆپ،

زەپەر

ياخشى يېزىلغان ساتىراكەن . مۇمكىن بولسا مەنبەسىنى ئەسكەرتىپ قۇيۇڭ

ئامان

angar ئەپەندىم، ياخشىمۇسىز؟
تەربىيەۋى ئەھمىيىتى يۇقۇرى، ئېسىل ساتىرالار ئارقىلىق بايقاش مۇنبىرىنى ئاۋاتلاشتۇرۇۋاتىسىز، رەھمەت سىزگە. تەكلىۋىم: تېما ئىگىلىرىنىڭ ئاپتورلۇق ھوقۇقىنى قوغداش ۋە قېرىنداش مۇنبەرلەر ئارا ئىناقلىققا كاپالەتلىك قىلىش ئۈچۈن يازمىلىرىڭىزنىڭ مەنبەسىنى ئەسكەرتىشنى ئۇنتۇمىغايسىز.

گۈلزار

« چوڭ مۇدىر » لارنىڭ خااكتىرىنى ئەينەن سۈرەتلەپ بېرىپسىز . رەھمەت سىزگە .

angar

زەپەر يوللىغان ۋاقتى  2013-6-12 15:29
ياخشى يېزىلغان ساتىراكەن . مۇمكىن بولسا مەنبەسىنى ئەسك ...

ئۆزۈم يازغان ئەسەرلەر بولغاچقا مەنبەسى «ئۆزۈم»ياكى «ئۆزۈم يازغان»دەپ ئىزاھلاشنىڭ ھاجىتى يوق دەپ ئويلايدىكەنمەن.كىيىنكى تېمىلىرىمدا ئىزاھلاپ قوياي.

زەپەر

بۇندىن كىيىنمۇ ئۈزىڭىزنىڭ ئىجادىي تىمىللىرىڭىزنى يوللاپ تۇرشىڭىزغان تىلەكداشمەن . بايقاشقا مۇشۇنداق ئىجادىي تىمىلار كىرەك . ئەتىكى ئۇرۇن يەنىلار سىزنىڭ ئىجادىي تىمىللىرىڭىزنى ساقلارۋاتىدۇ . قېنى ئەمسە

خۇمارى

سىزگە ئاپرىن ھەقىقەتەن ياخشى يېزىلغان شېئىركەن.

ئەزىزى

تولىمۇ ياخشى يېزىپسىز، ئىجادىيتىڭىزگە بەرىكەت تىلەيمەن.