ئارام كۈنگە ئۆچ بولدۇم(ئەنگەر)

angar

ئارام كۈنگە ئۆچ بولدۇم

ساتىرىك مۇخەممەس

خىزمەتچى بوپ ئاتالغاچ مۇئاشىمىز بار بىر ئۇچۇم،
شۇنداق بولغاچ بويرۇققا بويسىنىمىز بىز چوقۇم،
بەزى ئىشلار ئۈستىدە كۆپلەپ قالدى ھەم ئويۇم،
سۆزلەپ بېرەي سىلەرگە تۇتۇپ قالدى بەك خۇيۇم،
ئۇزۇن گەپنىڭ قىسقىسى  ئارام كۈنگە  ئۆچ بولدۇم.

دۇشەنبىدە ياڭرىتىپ  ئوقۇتۇشنىڭ مارشىنى،
نادانلىققا ئاتىمىز ئىلىم -ئېرپان  ئوقىنى،
سەيشەنبىدە باشلايمىز تاپشۇرۇقنىڭ جېڭىنى،
تەكشۈرەيمىز زېرىكمەي بەرگەن بىلىم يۇقىنى،
كۆرۈنمەيدۇ قارىسى  ئارام كۈنگە  ئۆچ بولدۇم،

چارشەنبىدە ئۆگۈنۈپ سىياسەتنىڭ بېشىنى،
قىزىل قىلىپ كاللىنىڭ ئىچى بىلەن تېشىنى،
پەيشەنبىدە قىلىشىپ كەسپىي بىلىم گېپىنى،
سۆزلىشىمىز ئۆز ئارا يۇقۇرلىتىش ئېپىنى،
قالمىدى ھېچ  مەنىسى ئارام كۈنگە  ئۆچ بولدۇم.

جۈمە تىنەش بولىمىز تۈگمەي ئىشنىڭ چالىسى،
ئارام كۈنگە قېپ قالار تەكشۈرۈشنىڭ ئارخىپى،
بىرى تۈگسە بىرىگە كېلەر ئىشلەش نۆۋىتى،
ھارام بولار ئارام كۈن چىقماي ھېچكىم ھاردۇقى،
تۇگمەيدىغان بانىسى ئارام كۈنگە ئۆچ بولدۇم.

شەنبىلەردە تۈگەتسەك ئارخىپلارنى مىڭ تەستە،
يەكشەنبىدە كۆرىمىز ئۆزىمىزنى ئەمگەكتە،
دۇشەنبىدىن جۇمەگە يەنە ئوخشاش ھەركەتتە،
چۈشەنمدىم زادىلا قالدۇق قانداق قىسمەتكە،
بەكمۇ جىقكەن ئىگىسى ئارام كۈنگە ئۆچ بولدۇم.

ئېچىلىدۇ يىغىنلار شەنبە ياكى يەكشەنبە،
پات-پات كېلەر تەكشۇرۇش بەكمۇ ھەيۋەت دەبدەبە،
ئارام كۈندە ئىشلىمەك  ئىكەن ئېسىل ئەنئەنە،
بىز ئىشلىسەك ئۈن-تۈنسىز مۇدىر قىلار تەنتەنە،
تەكرارلانغان قىش-يېزى ئارام كۈنگە ئۆچ بولدۇم.

ئۆيدە خوتۇن سوقۇشار كۆچۈپ كەت دەپ مەكتەپكە،
جىدەل قىلار باللىرىم ئاپارغىن دەپ مەشرەپكە،
رەنجىپ ئاتا-ئاناممۇ قالدىم مانا ئەيىپكە،
كىمگە ئېيتاي دەردىمنى پاتتىم ئېغىر ھەسرەتكە،
قالدى گېپىم چالىسى ئارام كۈنگە ئۆچ بولدۇم.


چىدىماسكەن دەپ قالماڭ ئارام كۈندىن زارلىسام،
ھەرگىز ئىچىم بوشىماس ئويلىغاننى يازمىسام،
چوقۇم ساراڭ بولىمەن ئەمدى ئارام ئالمىسام،
ئارام ئالغان شۇ كۈنى ئىككى ئۈچ كۈن ياتمىسام،
يوقاپ كەتكەن خىسلىتى ئارام كۈنگە ئۆچ بولدۇم.

غۇنچە

بىزمۇ سىزگە ئوخشاش ئارام كۈنلىرىگە ئۆچ بولۇپ كەتتۇق .خىزمەتچىلەرنىڭ كۆڭلىدىكىنى يېزىپسىز .

pari

شېئىرىڭىز بەك ياخشى چىقىپتۇ ، دىمەك كۆڭۈلدىكى گەپكەن ، راست دەيسىز بۇ خىزمەتنىڭ كۆپلىكى .
بولۇپمۇ مۇنۇ مىسرالار ماڭا بەك ياقتى .رەھمەت داۋاملىق يېزىپتۇرۇڭ .

چىدىماسكەن دەپ قالماڭ ئارام كۈندىن زارلىسام،
ھەرگىز ئىچىم بوشىماس ئويلىغاننى يازمىسام،
چوقۇم ساراڭ بولىمەن ئەمدى ئارام ئالمىسام،
ئارام ئالغان شۇ كۈنى ئىككى ئۈچ كۈن ياتمىسام،
يوقاپ كەتكەن خىسلىتى ئارام كۈنگە ئۆچ بولدۇم.

گۈلزار

شۇنداق بۇ ئارام كۈن ئەمەس بەلكى  ئارخىپ كۈنى ، باشلىقلارنى كۈتىۋېلىش كۈنى بولىۋاتىدۇ . بۇنداق بولىۋەرسە كىممۇ  بۇ كۈنگە ئۆچ بولمىسۇن .
رەھمەت سىزگە

ئالىم

بارىكاللا قېرىندىشىم!بىزلارنىڭ يۈرىكىدىكى گەپلەرنى دەپسىز! رەھمەت !مەن سىزنىڭ تىمىلىرىڭىزنى تولۇق كۈرۈپ كىلىۋاتىمەن، مۇنبىرىمىزدىن تىمىلىرىڭىز ئۈزۈلۈپ قالمىسۇن!
نىمە دىگەن ئۆتكۈرتىللىق،چۈشۈنىشلىك يېزىلغان شىئېر بۇ؟!

زەھرا

بىز ئوقۇتقۇچىلارنىڭ قاچانمۇ شەنبە -يەكشەنبە ئارامنى ياخشى ئېلىپ ،دۈشەنبە كۈنى جۇشقۇن كەيپىيات بىلەن ئىشقا چۈشىدىغان ۋاقتىمىز بولار -ھە!
بۇرۇن باشقا كەسىپتىكىلەر ئوقۇتقۇچىلارنىڭ تەتىللىك دەم ئېلشى بار دەپ بەك ھەۋەس قىلىشاتتىكەنتۇق،ئەمدى، بۇ تەتىلمۇ يوقاپ كەتتى....
   بەزىلەردىن ئاڭلىسام ،بۇنىڭدىن كىيىن شەنبە كۈنلىكى چوقۇم يېرىم كۈن ئوقارمىشمىز ......ھەي...
   دېمەك ،سىز،مەن ،ئۇ ...ھەممىمىز ئارام كۈنگە زار بوپتۇق.

زەھرا

تەتىل  ئىدى ئەڭ ياخشى ئارام ئېلىش كۈنىمىز ،
سىياسى ئاڭ بەك تۆۋەن ،شۇڭا ئۆگىنىش قىلىمىز ،
ئائىللەرگە سۆھبەتكە بېرىپ توختام تۈزىمىز ،
ئارام ئالىمىز دېيىشكە چوڭ ئەمەس يا يۈزىمىز ،
سەت كۆرنۈپ قالىمىز ئۆزىمىزگە ئۆزىمىز ،
نە ئامال بار ،نە چارە ،بۇنى ئوبدان بىلىمىز،
ئارام كۈنى قالمىغان  تەتىلگىمۇ ئۆچ بولدۇم.

سەييارە0

شەنبىلەردە تۈگەتسەك ئارخىپلارنى مىڭ تەستە،
يەكشەنبىدە كۆرىمىز ئۆزىمىزنى ئەمگەكتە،
دۇشەنبىدىن جۇمەگە يەنە ئوخشاش ھەركەتتە،
چۈشەنمدىم زادىلا قالدۇق قانداق قىسمەتكە،
بەكمۇ جىقكەن ئىگىسى ئارام كۈنگە ئۆچ بولدۇم.

ئوقۇتۇشقا مۇناسۋەتسىز ئارخىپلارنى  ئىشلەيدىغان  ۋاقىت قاچانمۇ تۇگەر.

بەختىيار(بايقاش

ئۆتكۈر شېئىرى مىسرالىرىڭىز ئارقىلىق بىزلەرنىڭ قانۇنلۇق دەم ئېلىش كۈنلىرىمىزنى ھەرخىل ۋەزىپە خاراكتىرلىك باش ئايىقى چىقماس ئىشلار بىلەن قۇربان قىلىۋاتقان بىر ئۇچۇملارغا ئاچچىق تەنقىد بېرىپسىز،بارىكاللا！
来自: Android客户端

زەپەر

يارايسىز قېرىندىشىم  بۇ ئارام كۈنلەردە  نۇرغۇنلىغان ئايىغى چىقماس خىزمەتلەرنى بىزگە ئۇرۇنلاشتۇرۇپ بىزنى ئەجىپا بىيزار قىلىۋەتتى . بىزنىڭ دەردىمىزگە كىممۇ يىتەر ھە