◆◆بەشتاش بالىلار مائارىپ تورى◆◆Http://Www.BaxTax.Cn◆◆维文专门教育教学资料，全册教案下载，全册课件下载，全册教科书下载，试卷，论文，儿歌，动画片，图片，教育信息网！◆◆

بالىڭىز نېمىشقا گەپ ئاڭلىمايدىغان بولۇپ قالدى ؟

بىر قىسىم ئاتا – ئانىلارنىڭ بالىلىرىنىڭ گەپ ئاڭلىمايدىغان بولۇپ قالغانلىقى ھەققىدىكى ئاغرىنىشلىق سۆزلىرىنى ئاڭلىغاندا ھەم بۇ ھەقتىكى تەپسىلاتلارغا ھەمسۆھبەت بولغىنىمىزدا  ھەممەيلەن ئۇلارنىڭ تەشۋىشلەنگەن غەمكىن ھالىتىنى كۆرۈپ ، ئۇلارغا ھېسداشلىق قىلىپ تەسەللى بەرسەك ، يەنە بىر تەرەپتىن ئۇلارغا مايىللىشىپ ئاشۇ گەپ ئاڭلىماس بالىلىرىدىن ئورتاق ئاغرىنىپ ، ئەگەر بىزنىڭ بالىمىزمۇ گەپ ئاڭلىماس بولۇپ قالسا زادى قانداق قىلارمىز ؟ دەپ ئويلىنىپ قالىمىز. كۆپ قىسىم ئاتا – ئانىلار بالىلىرىدىكى سەۋەنلىكلەرنىڭ ئىپادىلىنىش شەكلى ۋە ئالاھىدىلىكىگە ئاساسەن ، گەپ ئاڭلىماسلىقنىڭ سەۋەبىنى ئىلمىي يەكۈنلەپ ، مەسىلىنى مەنبەدىن قېزىشقا ۋە سەۋرچانلىق بىلەن تۈزىتىشكە ئالاھىدە كۈچ سەرپ قىلغاچقا ، ئۇزاققا بارماي بالىلىرىدا روشەن ئۆزگىرىشلەر بولغان بولسىمۇ ، يەنە قىسمەن ئاتا – ئانىلار گەپ ئاڭلىمايدىغان بالىلىرىنى ئۆزگەرتىش جەھەتتە كۆڭۈلدىكىدەك ئۈنۈمگە ئېرىشەلمىگەننىڭ ئۈستىگە ، ئاشۇ گەپ ئاڭلىمايدىغان بالىلىرىدىن ئۆزلىرىگە باش ئاغرىقى تېپىۋېلىشىپ يۈرمەكتە .

   مەيلى قايسى خىل مىجەز ، قانداق سەۋەنلىكلەرگە ئىگە ،  قانداق خىلدىكى گەپ ئاڭلىمايدىغان بالىلار بولسۇن ، ئۇلار ھامىنى مۇئەييەن جەمئىيەت ، مۇئەييەن شارائىت ئاستىدىكى ئائىلىلەردە ئۆسۈپ يېتىلىدۇ . دېمەك ، ئۇلاردا گەپ ئاڭلىماسلىقىنىڭ بىخلىنىشى ، يىلتىز تارتىشىمۇ دەل ئاشۇ ئائىلىدە بولىدۇ . شۇڭا بىز ئاتا – ئانىلار پەرزەنتلىرىنىڭ مەڭگۈلۈك بەخت يۇلتۇزى ۋە نىجادكارى بولۇش سۈپىتىمىز بىلەن ئۇلارنى جەمئىيەتكە ياراملىق ئادەم قىلىپ يېتىشتۈرۈشتىن ئىبارەت ئەڭ مۈشكۈل ۋە جاپالىق مەجبۇرىيەتنى ئۈستىمىزگە ئالغىنىمىز ئۈچۈن ، پەرزەنتتىمىز مەيلى ئائىلە ، مەكتەپ ياكى جەمئىيەتنىڭ قايسى بىر قاتلاملىرىدىن ،  ئوبيېكتىپ ياكى سۇبيېكتىپ ئامىلنىڭ تەسىرىدە بىلىپ – بىلمەي ، مەقسەتلىك ياكى مەقسەتسىز گەپ ئاڭلىمايدىغان بولۇپ قالسا ، ئاتا – ئانىلىق مەجبۇرىيىتىمىز ۋە ھېچكىم ئاتا قىلالمايدىغان مېھىر – مۇھەببىتىمىز بىلەن ئۇلارغا سەمىمىي ، ئىللىق مۇئامىلىدە بولۇپ ھەم كۆيۈنۈپ ئۇلارنىڭ ھالىغا يېتىشمىز ، ھەرگىزمۇ ئۇلارغا زەربە بولىدىغان ، روھىي بېسىم ئېلىپ كېلىدىغان گەپ – سۆز ، ئىش – ھەرىكەتلەرنى قىلماسلىقىمىز ، ئۇلارنى چۈشىنىشىمىز ،قوللىشىمىز ، دەردىگە يېتىشىمىز ، بولۇپمۇ ياش پەرقى ، جىنسى ، ئالاھىدىلىكى ، گەپ ئاڭلىماسلىقنىڭ شەكىللىنىشى ،  كونكرېت ئىپادىلىنىشى ، شۇ ۋاقىتتىكى ئىدىيەسى  ، ئىش – ھەرىكىتى ، ئۆگىنىشى ، ئىجتىمائىي پائالىيەتلەردىكى تىپىك ئۆزگىرىش ھالىتى  ، روھىي كەيپىياتى قاتارلىقلارنى ئىنچىكە كۆزىتىپ ، ئۇلارنىڭ پىسخىكىسىدا ، ئەمەلىيىتىدە كۆرۈلۈۋاتقان گەپ ئاڭلىماسلىققا سەۋەب بولغان كونكرېت سەۋەبلەرنى تېپىپ چىقىشىمىز كېرەك .

   بىز پەقەت ئاشۇ گەپ ئاڭلىمايدىغان بالىلىرىمىزغا كەڭ ، ئىللىق قۇچاق ئاچساقلا ، ئۇلارنى چۈشەنسەكلا بولىدۇ . مانا بۇ گەپ ئاڭلىمايدىغان بالىلار نۆۋەتتە ئەڭ مۇھتاج بولۇۋاتقان ۋە كەلگۈسىدىمۇ ئەڭ مۇھتاج بولىدىغان مەڭگۈلۈك مەنىۋى ئوزۇق .

مەنبە: ئۈرۈمچى كەچلىك گېزىتى