يېڭىدىن مىكرو بلوگ ئاچقۇچىلارغا ئۆز ئىسمىنى ئىشلىتىش تۈزۈمى قوللىنىلىدۇ

شىنخۇا ئاگېنتلىقىنىڭ 25-دېكابىر شاڭخەيدىن بەرگەن تېلېگراممىسى، مۇخبىرنىڭ نوپۇزلۇق تارماقلاردىن ئىگىلىشىچە، شاڭخەيدە 26-چېسلادىن باشلاپ يېڭىدىن مىكرو بلوگ ئاچقۇچىلار ئۆزىنىڭ ھەقىقىي سالاھىيەت ئۇچۇرلىرى بىلەن تىزىمغا ئالدۇرۇش تۈزۈمى سىناق تەرىقىسىدە يولغا قويۇلىدىكەن. پات ئارىدا بېيجىڭ، تيەنجىن، گۇاڭجۇ، شېنجېندىكى مىكرو بلوگ تور بىكەتلىرىمۇ يېڭىدىن مىكرو بلوگ ئاچقۇچىلار ئۆزىنىڭ ھەقىقىي سالاھىيەت ئۇچۇرلىرى بىلەن تىزىمغا ئالدۇرۇش تۈزۈمىنى يولغا قويىدىكەن.

　　ئىگىلىنىشىچە، نۆۋەتتە مىكرو بلوگ ئاچقۇچى ئۆزىنىڭ ھەقىقىي سالاھىيىتى بىلەن تىزىمغا ئالدۇرۇش تۈزۈمى پەقەت يېڭىدىن مىكرو بلوگ ئاچقۇچىلارغىلا قارىتىلىدىكەن. شەخسىي نامى بىلەن تىزىمغا ئالدۇرغۇچى ئۆزىنىڭ كىملىك نومۇرى قاتارلىق ئۇچۇرلىرىنى تەمىنلەپ بېرىشى، تەشكىلات، ئورگان، ئورۇن نامى بىلەن تىزىمغا ئالدۇرغۇچى تەشكىلات ياكى ئورگاننىڭ ۋاكالەت نومۇرى قاتارلىق ئۇچۇرلىرىنى تەمىنلەپ بېرىشى كېرەككەن. ئابونت تەمىنلىگەن كىملىك ئۇچۇرلىرىنى مىكرو بلوگ تور بىكەتلىرى دۆلەتنىڭ نوپۇزلۇق ئورگانلىرىغا يوللاپ ئىسپات ئالىدىكەن. تىزىمغا ئالدۇرۇپ بولغان مىكرو بىلوگ ئابونتلىرىغا قارىتا پەيدىنپەي قېلىپلاشتۇرۇش ئۇسۇلى قوللىنىلىپ، ھەقىقىي سالاھىيەت ئۇچۇرلىرى ئارقىلىق تىزىمغا ئالدۇرۇش بىر-بىرلەپ يولغا قويۇلىدىكەن. مىكرو بلوگ ئابونتلىرىنىڭ ھەقىقىي سالاھىيەت ئۇچۇرلىرىنى تىزىملاش ۋە سېلىشتۇرۇپ ئىسپات ئېلىش پەقەت ئارقا سۇپىدا ئېلىپ بېرىلىدىغان مەشغۇلات بولۇپ، ئابونت تور بىكەت يۈزىدە كىملىكتىكى ھەقىقىي ئىسمىنى قوللانسا، ياكى تور نامى، ئابونت نامىنى تاللىۋالسا بولىدىكەن، تور بېكىتى ئابونت ئارزۇسىغا تولۇق ھۆرمەت قىلىدىكەن. مىكرو بلوگ ئابونتلىرى ھەقىقىي سالاھىيەت ئۇچۇرلىرى ئارقىلىق تىزىمغا ئالدۇرۇش تۈزۈمى يولغا قويۇلغاندىن كېيىن، ئالاقىدار تارماقلار تور بېكەتلىرى ۋە ئىسپات بېرىش ئورگانلىرىنىڭ مۇناسىۋەتلىك تۈزۈم ۋە تەرتىپلەرنى تۈزۈش، مۇكەممەللەشتۈرۈشىگە ھەيدەكچىلىك قىلىپ، ئابونتلارنىڭ كىملىك ئۇچۇرى بىخەتەرلىكىنى ھەقىقىي قوغداپ، ئابونتلارنىڭ قانۇنىي مەنپەئىتى، جامائەت مەنپەئىتى ۋە دۆلەتنىڭ ئۇچۇر بىخەتەرلىكىنى قوغدايدىكەن.