يۇقارقى رەسىمدىكىسى بولسا 6-ئاينىڭ 23-كۈنى تارتىلغان تىك نۇسخىدىكى ‹جۇڭخۇا خەلق جۇمھۇرىيىتى خەرىتىسى› بولۇپ، مۇخبىرنىڭ يېقىندا خۇنەن خەرىتە نەشرىياتىدىن ئەھۋال ئىگەللىشىچە، خۇنەن خەرىتە نەشرىياتى بىلەن خۇبېي كارتوگرافىيە (ئۆلچەپ سىزىش) ئىلمىي جەمئىيىتى بىرلىكتە تەھرىرلەپ تۈزۈپ چىققان تىك نۇسخىدىكى ‹دۇنيا ۋەزىيىتى خەرىتىسى›، ‹دۇنيا بىلىم خەرىتىسى› شۇنداقلا خۇنەن خەرىتە نەشرىياتى مۇستەقىل ھالدا تەھرىرلەپ تۈزۈپ چىققان ‹جۇڭگو ۋەزىيىتى خەرىتىسى›، ‹جۇڭخۇا خەلق جۇمھۇرىيىتى خەرىتىسى› قاتارلىق خەرىتىلەر ئاللىقاچان دۆلەتلىك كارتوگرافىيە ۋە جۇغراپىيىلىك ئۇچۇرلار ئىدارىسىنىڭ تەستىقىدىن ئۆتكەن بولۇپ، يۇقارقى خەرىتىلەر ئاللىقاچان نەشرىيات نومۇرى، خەرىتە تەھقىقلاش نومۇرى قاتارلىقلارنى قولغا كەلتۈرۈپ، رەسمىي ھالدا نەشرىياتتىن چىقىپ تارقىتىلغان. خۇنەن خەرىتە نەشرىياتىنىڭ تونۇشتۇرۇشىچە، بۇ قېتىم ئېلان قىلىنغان تىك نۇسخىدىكى ‹ جۇڭخۇا خەلق جۇمھۇرىيىتى خەرىتىسى› بولسا دۆلەت ئىچىدىكى تۇنجى كەڭ دائىرىلىك تىك نۇسخىدىكى خەرىتە بولۇپ ھېساپلىنىدىكەن. بۇ تىك نۇسخىدىكى ‹جۇڭخۇا خەلق جۇمھۇرىيىتى خەرىتىسى› دە نەنخەي دېڭىزى شۇنداقلا ئاراللارغا جۇڭگو چوڭ قۇرۇقلۇقى بىلەن ئوخشاش بولغان ماسىشتاب ئىشلىتىلگەن بولۇپ، ئۇنىڭدىن باشقا نەنخەي ئارىلىدىكى نۇرغۇنلىغان ئاراللار بۇرۇنقىغا ئوخشاش خەرىتىگە قىستۇرما رەسىم شەكلىدە قىستۇرۇلماي بەلكى پۈتۈنلەي خەرىتىگە كىرگۈزۈلگەن ھالدا ئىپادىلەنگەن.
