شىنخۇا تورى باغداد 12 – مارت تېلېگراممىسى :  12 – مارت ئىراق مەركىزىي جىنايى ئىشلار سوت مەھكىمىسى ھۆكۈم ئېلان قىلىپ ، ئامېرىكىنىڭ سابىق زۇڭتۇڭى بۇشقا ئاياغ ئېتىپ ، قارشىلىق كۆرسەتكەن ئىراقلىق مۇخبىر زاھىدقا ئۈچ يىللىق قاماق جازاسى بەردى .
 

  ئىراقلىق مۇخبىر زاھىد (ماتېرىيال سۈرەت)

      زاھىد سوتتا ئۆزىنىڭ گۇناھكار ئىكەنلىكىنى ئېتراپ قىلمىدى . مەسئۇل سوتچى لۇباي ئۇنىڭدىن :‹‹سەن گۇناھسىزمۇ ؟››دەپ سورىغاندا ، زاھىد دەرھاللا :‹‹ شۇنداق جاناپلىرى ، ئاياغ ئېتىش مەندىكى تەبىئىي ئىنكاس . ھەر بىر ئىراقلىقنىڭ ھەممىسى شۇنداق قىلىدۇ›› دەپ جاۋاب بەردى .

    زاھىدنىڭ 25 كىشىدىن تەشكىللەنگەن ئاقلىغۇچى ئادۋوكاتلار گۇرۇپپىسىنىڭ ۋەكىلى سائادى :‹‹زاھىدنىڭ ھەرىكىتى پەقەت ئۇنىڭ قېرىنداشلىرىغا زىيانكەشلىك قىلغۇچىغا نىسبەتەن قارشىلىق كۆرسىتىشى خالاس›› دېدى .