تەڭرىتاغ تورى خەۋىرى، نۇر تورى تەرجىمىسى: 2014-يىلى 1-ئايدا 30 تۈرلۈك مەمۇرىي تەستىق ئىشلىرى ئەمەلدىن قالدۇرۇلغاندىن كېيىن، ئاپتونوم رايون يەنە بىر قېتىم 24 تۈرلۈك مەمۇرىي تەستىق ئىشلىرىنى ئەمەلدىن قالدۇردى. 20-يانۋار، ئاپتونوم رايونلۇق خەلق ھۆكۈمىتى توردا بۇ ئۇچۇرنى ئاشكارىلىدى.
بۇ قېتىم ئاپتونوم رايون جەمئىي 24 تۈرلۈك مەمۇرىي تەستىق ئىشلىرىنى ئەمەلدىن قالدۇرغان، ئالتە تۈرنى تۆۋەنگە چۈشۈرۈپ بەرگەن، ئىككى تۈرنى ئۆزگەرتكەن، 92 تۈرنى 26 تۈرگە ئىخچاملىغان. بۇ قېتىم ئەمەلدىن قالدۇرۇلغان مەمۇرىي تەستىق ئىشلىرى ئاپتونوم رايونلۇق سودا ئىشلىرى نازارىتى، پەن-تېخنىكا نازارىتى، ئۇچۇر باشقۇرۇش ئىدارىسى، سەھىيە نازارىتى، سۈپەت تېخنىكا نازارەتچىلىك ئىدارىسى، تەرەققىيات-ئىسلاھات كومىتېتى، مەدەنىيەت يادىكارلىقلىرى ئىدارىسى قاتارلىق سەككىز تارماققا چېتىلىدىكەن. بۇنىڭ ئىچىدە سەھىيە نازارىتى ئەمەلدىن قالدۇرغان تۈرلەر ئەڭ كۆپ بولۇپ، يودلۇق تۇز پىششىقلاپ ئىشلەش كارخانىلىرىنىڭ سەھىيە ئىجازىتى، 2-تۈردىكى يۇقۇملۇق كېسەللىكلەر باكتېرىيەسى (زەھەر) تۈرلىرىنى ئىشلىتىدىغان ئورۇنلارنىڭ تەستىقى، داۋالاش ئورگانلىرىدا ياسالما دورىلار ئىشخانىسى تەسىس قىلىش تەستىقى قاتارلىق جەمئىي 14 تۈرنى ئۆز ئىچىگە ئالىدىكەن.
تۆۋەنگە چۈشۈرۈپ ېبرىلگەن ئالتە تۈرنىڭ ئىچىدە تۆت تۈر سەھىيە نازارىتىنىڭ، بىر تۈر تەرەققىيات-ئىسلاھات كومىتېتىنىڭ، بىر تۈر ئاشلىق-يېمەكلىك ئىدارىسىنىڭ تۈرلىرىدىن ئىبارەت، بۇنىڭدىن باشقا ، ئۆزگەرگەن ئىككى تۈر ئىستاتىستىكا ئىدارىسىنىڭ تۈرى ئىكەن.
ئىخچاملانغان 92 مەمۇرىي تەستىق ئىشلىرى مەدەنىيەت نازارىتى، پەن-تېخنىكا نازارىتى، خەلق ھاۋا مۇداپىئە ئىشخانىسى، يېمەكلىك–دورىنى نازارەت قىلىش باشقۇرۇش ئىدارىسى، مەدەنىيەت يادىكارلىقلىرى ئىدارىسى، سەھىيەنازارىتى، ئورمانچىلىق نازارىتى، سۈپەت-تېخنىكا نازارەتچىلىك ئىدارىسى قاتارلىق سەككىز تارماققا چېتىلىدىكەن. بۇنىڭ ئىچىدە يېمەكلىك، دورىنى نازارەت قىلىش، باشقۇرۇش ئىدارىسى جەمئىي 35 تۈرنى ئالتە تۈرگە ئىخچاملىغان.
