يىراقلارغا كەتمە ، ئەزىزىم

مۇھەممەدجان راشىدىن

يىراقلارغا كەتمە ، ئەزىزىم،
يىراق يەرنىڭ تەشۋىشى تولا.
ياخشى ئەمەس ئايرىلىپ ياشاش،
ئايرىلغاننىڭ كۆزيېشى تولا.

يىراقلارغاكەتمە ، ئەزىزىم،
بارالمايمەن كەينىڭدىن ئىزدەپ.
يىراق يەردە سىنى دۈشمەنلەر،
ئازدۇرىدۇ : «ئاشىقىڭ بىز »دەپ،

يىراقلارغا كەتمە ، ئەزىزىم،
يىراق يەردىن كەلمىكىڭ تەستۇر،
غەملىرىڭدە مىنىڭ بۇ كۆڭلۈم،
سەن كەلگىچە تىنچ ئەمەستۇر.

يىراقلارغا كەتمە ، ئەزىزىم،
بارالمايمەن،يوللىرى يىراق.
چۈشلىرىمگە كىرگىنىڭ بىلەن،
ئويغانسام يوق ئوڭۇمدا بىراق.

--ئاينىڭ-كۈنى، غۇلجا .