يالغۇز ياشايمەن 

مۇھەممەتجان راشىدىن

بىلەر بولساڭ كۆڭۇل ئاياشنى،
تېڭىپ يۈرمە تاياققا تاشنى.
خارلانغاندىن بىۋاپالارغا،
ئەۋزەل كۆردۈم يالغۇز ياشاشنى.

پىيالەڭدە شەربەتمەن، چايمەن،
ياقتۇرمىساڭ يالغۇز ياشايمەن.

ئىشەنگەنلەر تاپقان پۇلىغا،
ئوخشاتمىسۇن مېنى قۇلىغا.
تىكەن دەيمەن تەكەببۇرلارنى،
رايىم بارماس تۇتقان يولىغا.

ئاسماندىكى شۇنداق بىر ئايمەن،
مەنمۇ ئايدەك يالغۇز ياشايمەن.

سوراپ يۈرمە مەن سۆيگەنلەرنى،
سۈرۈشتۈرمە مەن كۆيگەنلەرنى.
ئىزدەپ يۈرەر مېنىڭ يۈرىكىم،
ئۆزى بىلەن تەڭ كۆرگەنلەرنى.

پۇلغا گاداي، ۋىجدانغا باي مەن،
ۋىجدان بىلەن يالغۇز ياشايمەن.