كۆز ياشلىرىم

مۇھەممەتجان راشىدىن

ئادەم تولا جاھان دېگەندە ،
گۈزەللىكتە بىر - بىرىدىن ئۇز .
« جاھاندا مىڭ، كۆڭۈلدە بىر »  دەپ ،
بىر سېنى دەپ يۈرىمەن يالغۇز .

كۆز ياشلىرىم ئاقتى سەن ئۈچۈن ،
قان ئارىلاش، يىرىڭ ئارىلاش .
بولدى كەسپى دۈشمەنلىرىمنىڭ ،
سەن تۈپەيلىڭ مېنى قارىلاش .

سەن بارمىغان تويغا بارمىدىم ،
سەن ماڭمىغان يولدا سايەم يوق .
ئاخىر بىر كۈن سېنى سۆيمەكتىن ،
بۇ ئالەمدە ئۆزگە غايەم يوق .