كېرەككەن

مۇھەممەتجان راشىدىن

ئىنسان كۆڭلى راھەتنى كۈندە ئىزدەپ ئاۋارە،
جاپانىمۇ بەزىدە ئويلاپ قويۇش كېرەككەن .
سەللەم بىلەن سەجدەمغۇ كاپالىتى جەننەتنىڭ ،
شۇنداقتىمۇ ئاز تولا ئويناپ قويۇش كىرەككەن .

ئىشلەتمىگەن ئەقىلنى چاينالمىغان تائام دەڭ ،
مەيلى ئۇماچ ئىچسەكمۇ چايناپ قويۇش كېرەككەن.;
جان بەرگەنلەر ھەق ئۈچۈن كەتتى ئۆچمەس شەرەپتە،
 ئەڭ بولمىسا ئىنساندەك قايناپ قويۇش كېرەككەن .

«دوست بار يەردە دۈشمەن بار»دىگەن گەپتە سەۋەن يوق ،
ياخشى گەپنى ناخشا ،دەپ ئاڭلاپ قويۇش كېرەككەن .
ئەھلى ئادەم بولماق تەس ،ئادىمىيلىك بولمىسا،
قۇشجانلارمۇ «قۇش بىز»دەپ سايراپ قويۇش كېرەككەن .

ئىچەرمەن دەپ ئات قويما ئىچكەنلەرگە ئالدىراپ ،
ئۇلارنىڭمۇ دەردىنى ئاڭلاپ قويۇش كېرەككەن .
ئاۋايلىماي سۆزلىگەن يېقىن ئىكەن بالاغا،
تەنتەك تىلنى بەزىدە باغلاپ قويۇش كېرەككەن.