ئاناڭنىمۇ سېغىنىپ قويغىن

ئابدۇرىھىم مۇھەممەت

جاھان كەزگەن  بەڭۋاش بالىلار،
ئاناڭنىمۇ سېغىنىپ قويغىن.
غەم كۆرمىگەن، ئەقلى چالىلار،
ئاناڭنىمۇ سېغىنىپ قويغىن.

پۇللىرىڭنى كۈتمەس مەزلۇمكەن،
سەن بولمىساڭ كۆنمەس مەزلۇمكەن،
سەن كۈلمىسەڭ كۈلمەس مەزلۇمكەن،
ئاناڭنىمۇ سېغىنىپ قويغىن.

شەھەرلەردە ئوينايدىغانسەن،
ئاۋاتلىققا تويمايدىغانسەن،
«ئانام...» دەپمۇ قويمايدىغانسەن،
ئاناڭنىمۇ سېغىنىپ قويغىن.

جاھان تۇتقان سەن ئۈچۈنلا ئۇ،
قازان ئاسقان سەن ئۈچۈنلا ئۇ،
داۋان ئاشقان سەن ئۈچۈنلا ئۇ،
ئاناڭنىمۇ سېغىنىپ قويغىن.

ئەسلەر سېنى ئۈنگەندە كۆكلەر،
باچكىلارغا چىققاندا تۈكلەر،
جۇۋازچىغا ئاپارسا يۈكلەر،
ئاناڭنىمۇ سېغىنىپ قويغىن.

كەل، «ئانام غەم يىمىسۇن» دېسەڭ،
غەمسىز ياشاپ قېرىسۇن دېسەڭ،
بىر نەچچە يىل چىدىسۇن دېسەڭ،
ئاناڭنىمۇ سېغىنىپ قويغىن.