ئەزان

كەلدى دەم ئۇپۇقتىن شۇنداق بىر سادا ،
ئاڭلاندى غايىپتىن بىر مۇڭلۇق ئەزان .
ئەگدى دەم بېشىنى بارچە مەۋجۇدات ،
ئەگدى ھەم زىمىنمۇ بولۇپ سىڭايان .

رەببىمنى سېغىنغان بىر يىتۈك نامە ،
ئىگىلدى مەجنۇنمۇ ئوغاق باشىدەك .
غەپلەتتە ياتقاننى ئويغاتماق بولۇپ ،
ئوقۇلغان ئىلاھى سىرلىق ناخشىدەك .

تولماقتا ئىنسانلار ئاللا ئۆيىگە ،
ھەقلىقنىڭ يولىدا بولۇپ بىر ئېقىن .
قوشۇلدۇم شۇ سەپكە ئىمان نۇرىدا ،
پاكلىماق بولۇپ مەن جىسمىمنى لېكىن .

ئىسلامنىڭ نۇرىدا يۇيۇنغان تىلەك .
قىلماقتا مۇقەددەس پەرزنى ئادا .
قايسىدۇر زىمىندا تەلپۈنگەن يۈرەك ،
كىرىسنىڭ قولىدا قىلماقتا نىدا .

تارقالدى جامائەت قالغاندا ئۆزۈم ،
قايتىدىن قىلۋىگە قويۇپتىمەن باش .
ئاھ - ئاللا .. بىر نۇردىن ئىرىدى تىنىم ،
سىرغىدى كۆزۈمدىن ئىككى تامچە ياش .

تىلىمەك بولغىنىم ئانامنىڭ ئۆمرى ،
ئاتامغا بەرسىكەن دەپ گۈزەل جەننەت .
بولسىمۇ گۇناھىم ئىھ ئۇلۇغ ئاللا ،
قىلسىكەن تىلەكنى ئىجاۋەت بىر رەت .

*****************

مۇسۇلمان چىھرىدىن تۆكىلىدۇ نۇر ،
يار - يۆلەك قېرى - ياش ئىزدىنىپ ساۋاپ .
نۇر ياغسۇن دىلىڭدىن پاكلانماق بولساڭ ،
ئىسلاملا ھەققانى بىرىدۇ جاۋاپ .

ئولتۇردۇم يۈكۈنۈپ ئۇزاقتىن - ئۇزاق ،
بىناماز تىنىمنى يۈتۈپ كەتسۇن يەر .
ئىماننىڭ نۇرىدا باغلىغان جىسمىم ،
سىڭمەكتە تۇپراققا شۇڭا بۇ قەدەر .

- - - كۈنى ، مالايسىيا .

مەنبە : قاشتېشى ئۇيغۇر مۇنبىرى سەنئەت يازمىسى