ساتىمەن

لاتا شېئىرى

مەن يۈزلەندىم بازارغا ، دۇتتارىمنى ساتىمەن .
قالۇن – تەمبۇر راۋاپنى ، ساتارىمنى ساتىمەن

كۈنۈپ قالدىم جاڭ ، پىپا ، ساكس ، گىتتار ، دۇمباققا ،
غىجەك ، ساپاي ، ناغرا ، زىلتارىمنى ساتىمەن

دوستلۇق دىگەن يوق گەپتۇر ، قۇرۇق سۆزدۇر مۇھەببەت ،
پۇللا بولسا خوتۇنۇم ، دىلدارىمنى ساتىمەن

ھۇقۇق بەرسەڭ كۇپايە ، خۇشامەتكە مەن تەييار ،
ھۇقۇق ئۈچۈن قىزىمنى ، دىلپارەمنى ساتىمەن

كۆيدۈم – پىشتىم ، سۆيدۈم دەپ يار تۇتىدۇ ئەخمەقلەر ،
چىقسا ئەگەر پايدىسى ، مەن يارىمنى ساتىمەن

ھەشەمەتلىك ياشاشقا ، پۇل بولمىسا بولمايدۇ ،
پۇللا بەرسە جاڭ لوبەن ، گۈلزارىمنى ساتىمەن

ۋىجدان -غورۇر ، ئىماننى داۋراڭ سالار بەزىلەر ،
«قۇرساق بېقىش پەرىز » دەپ ئىمانىمنى ساتىمەن

پايدا چىقسا بىر تەڭگە ، ساتاي ئاتا- ئانامنى ،
ئايالىمنى – قىزىمنى ، ۋىجدانىمنى ساتىمەن

نان تىلەيمەن ئىبلستىن ، قۇلۇمدا بار ئالتۇن جام ،
تۆت بوتولكا  پىجۇغا ، بىنارىمنى ساتىمەن

ئانا تىل ۋە پۇقرا ، يۇمۇر كومنى تىنجىتتىم ،
ئىزدىنىش ۋە گۈلىستان ، دىيارىمنى ساتىمەن

مېنى ئەمدى دوزاختىن ، قورقۇتمىغىن موللاملار ،
مەن ئۆلگەندە نەزىر قىپ ، گۇناھىمنى ساتىمەن

قېرىغاندا ھەرەمگە يول ئالىمەن  غىپپىدە،
ھاجىم بولۇپ سالاپەت ، دۇئارىمنى ساتىمەن

ھالال ھارام ئايرىماي ، ياشىۋالاي لاتا بوپ ،
كىرسەم ئەگەر دوزاخقا ، دەرگاھىمنى تاپىمەن