ئوخشىماي قالدى...

ئابدۇقادىر جاللالىدىن 

شۇنچە ئاختۇرسام تۇزۇك قاپاق يوق
باراڭ - باراڭغا ئوخشىماي قالدى...

ھىچكىم لەۋزىدە ئەمدى ۋاپا يوق ,
پاراڭ - پاراڭغا ئوخشىماي قالدى...

تەمە ئوتى ياقتى كۆڭۈل كۆزىگە
سالام - سالامغا ئوخشىماي قالدى...

ئۆزگىرىپ تۇردى يارنىڭ قارارى
جانان - جانانغا ئوخشىماي قالدى...

مېھراپتىن چايان چىققىنى قىززىق
پالان - پالانغا ئوخشىماي قالدى...

دەلدۇش  تۇرۇپمۇ  بىرەر  پەتىۋا
ساراڭ - ساراڭغا ئوخشىماي قالدى...

ئېشىڭنى يەپمۇ ، بېشىڭنى يەيدۇ،
بالاڭ - بالاڭغا ئوخشىماي قالدى...