كېتەر بولساڭ ، خوش ئېيتماي كەتمە

 ( مۇھەممەتجان راشىدىن )

ئايرىلغاندا ئاغرىنما يارىم
كېتەر بولساڭ ،  << خوش  &t;&t; ئېيتماي كەتمە .
ياخشى چاغدا ياخشى يارىڭنى
ئايرىلغاندا گۇناھكار ئەتمە .

مەندىن ئۆتكەن گۇناھ ، سەۋەنلەر
يوق ئەمەستۇ سەندىمۇ بەلكىم .
رەنجىگەندە كېرەكقۇ ئويلاش
ئۆز - ئۆزىنى  ئەڭ ئاۋۋال ھەركىم .

تارتىلمىسۇن ، ئايرىلغاندا بىز
ياخشى ئۆتكەن كۈنلەر جازاغا .
نامەردلىكتۇر <<  خوش &t;&t; دېمەي كەتكەن
ئۇچرىغاندا سۆيگۈ قازاغا .

قاتتىق ياپما چىققان ئىشىكنى
يېنىپ قايتا كىرىپ قالىسەن .
ئېيتقانلىرىم توغرىمۇ ، خاتا
بىر كۈنلىرى بىلىپ قالىسەن .