رۇبائىيلار

مۇھەممەتئىمىن توختى گىياھى
(يىڭى قاشتېشى )

بىلمىگەننى دانادىن سورا ،
مەن-مەنلىكتە پىشمايدۇ « غورا » .
ئېگىشز تاغقا چىقماقچى بولساڭ ،
كەمتەرلىكتۇر ئەڭ ياخشى دورا .

بىلىم دىمەك - ئەقىل -كۈچ دىمەك ،
كۈچكە تۇلۇپ ئېگىز ئۇچ دىمەك .
ئانا ۋەتەن ، مىللەت ، خەلققە ،
 ئۆمۈر بويى شەرەپ قۇچ دىمەك .

پەرۋاز قىلار بۈركۈت سامادا ،
ياتار ئۇخلاپ ھۇقۇش كاماردا .
تىنىم تاپماس تۆھپىكار ئادەم ،
ھۇرۇن كىشى يۈرەر تامادا .

جاپالىق مېھنەتتىن ئايرىلماس ھايات ،
ئىلىم-پەن ئىنسانغا قايرىلماس قانات .
پولاتتەك ئىرادە -ئۇلۇغ مۆجىزە ،
قىلغاي ئۇ ، دۇنيانى گۈزەل ۋە ئاۋات .

« كېتىمىز دۇنيادىن ھامان » دەپ تۇرۇپ ،
توپلىدۇق مال دۇنيا ، پۇلغا باش ئۇرۇپ .
ئۆزىمىز ئۈچۈنلا بۇنداق ياشىساق ،
كەتمەسمۇ ئەۋلاتلار نېسىۋى قۇرۇپ .

غۇربەتلىك كۈن چۈشتى ئەمدى بېشىمغا ،
قېرىدىم ، ئاق كىردى ساقال -چېچىمغا .
بۇ كۈنلەر ياشلىقنى ئەسلەتتى ئەجەپ ،
قول سوزسام كەلمىدى ئامەت قېشىمغا.

ھۆسنىڭگە قارىسام ھەيرانۇ-ھەسمەن ،
كۆزۈڭدىن خىجىلمەن ، سۆزۈڭدىن مەسىت ، مەن.
قاشلىرىڭ يا كەبى ، كىرپىكلىرىڭ ئوق ،
« ئوۋچى » نىڭ سېھرىدىن بۇلاي پەخەس، مەن .

 بىلىمنى جېنىڭدىن ئەزىز كۆر جانان ،
 مۇناسىپ شۇچاغداتۆر ساڭا ،جانان.
«بىلىم-كۈچ » دىمەكتۇر قۇدرىتى چەكسىز،
ھاياتىڭ مەنىلىك تۇرمۇش ھۆر جانان.

ئۈزۈم پۇل ، قاپاق پۇل بىلسەڭ باراڭدىن ،
خەيرلىك ئىش ياخشى قۇرۇق پاراڭدىن .
غەيۋەتنى ئۈزىگە كەسىپ قىلغانلار ،
قىلچىمۇ كەم ئەمەس ئەقلى ساراڭدىن .

ئەجرىڭنىڭ مېۋىسى تاتلىق قىشمۇ-ياز ،
ياڭرايدۇ شەنىڭگە ئالقىش ناخشا ساز.
مېھرىڭدىن سۇغارغان گۈللەر توزىماس ،
بۇ تۆھپەڭ تارىختىن ئۆچمەيدۇ ئۇستاز .

ئەجرىمگە ئاش ئالاي دىسەڭ خاماندىن ،
ئايرىغىن سەلكىندە داننى ساماندىن .
ھەقىقى ۋاپادار دوسىتنى ئىزدىسەڭ ،
تاللىغىن ياخشىنى شاللاپ ياماندىن .