رۇبائىيلار

( ئابدۇۋەلى ئەلى ) 

()  

جاننى  دەپ  بىر  نان  ئۈچۈن  ئاداشمايمەن ،
نائەھلى  بەدخۇي  بىلەن  قاراشمايمەن .
زاتىمنى  ئۇلۇغلايمەن  توھپەم  بىلەن ،
ئۆلسەممۇ  ياراشمايمەن   دۈشمەن  بىلەن .

()

كۈندۈزى شاپاشلايسەن  مەيخانىدا ،
كېچىسى  ھاپاشلايسەن  ئەمخانىدا .
شۇ كەبى مەسىتھۇشلۇقتا  يۈرىۋەرسەڭ ،
مەزگىلسىز  جان  ئۈزەرسەن غەمخانىدا .

()

مەينى  ئىچكىن سوز-ھەركىتىڭ   قولاشقىدەك ،
خۇش كەيپىڭدىن دوس -يارانلەر ئولاشقىدەك.
ئەدەتلەنمە  ئەيىش -ئىشرەت بوشاڭلىققا ،
توھپىكار  بول  رەقىپ كۆزى   تورلاشقىدەك .

()

خادا كەبى  گېدەيگەنلەر ئەرزانچىلىق ،
ئادەمدۇ دەپ سالام قىلساڭ  ئالماس ئىلىك.
نامى  ئۇلۇغ ، سۇپرا قۇرۇق بايۋەتچىنىڭ ،
قىممىتى  يوق ، ئادەم  تۈگۈل  بىر قىلچىلىك .

()

جەسۇر   ئىدىڭ  بىر چاغلاردا  قۇت كوزلىگەن ،
جاننى  تىكىپ  ھەر تەرەپتىن ھەق ئىزدىگەن .
بۇلۇپ  قاپسەن  ھالا بۈگۈن  تۇنىماسلا ،
ئازدۇردىمۇ  رىزقى شەيتان -پۇل ، نام  دىگەن ؟

()

كەلسە ئىلھام كېچە -كۈندۈز  يازمامدىمەن ،
دىل تورىنىڭ جەۋھىرىنى  قازمامدىمەن ؟
مەن شام تۇرۇپ مەرىپەتتىن نۇر  چاچمىسام ،
ئەلگە بەرگەن  ئەنىت - قەسەمدىن ئازمامدىمەن ؟

()

كۈتكىنىڭدەك راۋاج تاپتى  تاپاۋىتىڭ،
كۈۈرۈنمىدى كۆپكە قىلغان راپاۋىتىڭ .
مەيلى ئىدى تاپقىنىڭنى  ئۆزەڭلا  يەپ ،
شاھىدلارغا يۇقمىسا   ھىچ كاساپىتىڭ .

()

تۇزان باسسا موزىي ، كۇلۇب ،كۈتۈپخانا ...
بازار تاپسا رېستۇران  ھەم  ئىشرەتخانا .
نەسلىمىزنى مەھكۈم قىلماق ئۈچۈن ئاندىن -
يامان كۈچلۈك  روھىي ئىبلىس  بارمۇ يانا ؟
 
()

ئاۋۇپ كەتتى توي ، زىياپەت ،مۇراسىملار ،
ئەل ئىچىدە پەيدە  بولدى  سەراسىملار .
قۇتۇلالماي  سولەتۋازلىق ، نادانلىقتىن ،
كېتىۋەرسەك  ئەۋلات  قانداق كۈنگە  قالار ؟

()

نەگە  كەتتى  قۇشۇما قاش ، قەلەمقاشلار ،
نەدە قالدى قۇندۇز  كەبى سۇمبۇل  چاچلار ؟
نەسلىمىز ۋە ئەسلىمىزنى ئۇنتۇپ كەتسەك ،
ئاقىۋەتتە   تۈكۈلمەسمۇ   قانۇ  ياشلار  .

()

ياقا يۇرۇتتا  ئىپار  بولدى ئەڭلىمدىكى  چاڭ ،
چۈنكى بۇ چاڭ يۇرتۇمدىكى توپىدىن قونغان .
كوزگە  سۈرتۈپ ، ھىدلىغانتىم يېنىش-يېنىشلاپ ،
ئارام بەخىش ھۇزۇر بەردى  يايرىدى بۇ  جان .

()

قوشاق قېتىپ  يىغلىساڭ ئاڭلىماس ئاناڭ ،
يەرنى  قاساپ تىلغىساڭ تۇرالماس  ئاتاڭ .
كەتتى  ئۇلار  ، قەدرىنى بىلەلمىدىڭ سەن ،
مىڭ رازى  بول، ئىزىڭدىن ماڭمىسا بالاڭ .

()

ئۆڭۇڭدىمۇ   چۈشۈڭدىمۇ پۇل بىلەن قالساڭ ،
ھالالنىمۇ ، ھارامنىمۇ  چونتەككە  سالساڭ .
ياشىغاننىڭ نە قىممىتى  ، ھەق يولدىن ئېزىپ -
ئەل-يۇرت ئارا  " نائەھلى " دەپ نام -ئاتاق ئالساڭ ؟

()

ۋەزنى يوق  مىڭ سۆزنىڭ  نەرقى  بىر  تىيىن ،
چاك باسماس  گەپ - سۆزنى ئاقتۇرماق قىيىن .
ئون ئويلاپ  بىر  سۆزلە دىگەننى  ھەق بىل ،
قايمۇقساڭ  سىنالغان  داناغا  تىۋىن

()

ھەرقانداق سۇرۇندا توردىن قالمايسەن ،
بىرىلگەن سالامنى ئىلىك  ئالمايسەن .
پانىدا گېدىيىپ خادىدەك يۈرسەڭ ،
لەھەدنىڭ  تۆرى يوق قانداق ياتارسەن ؟

()

مەرتلەرگە بىباھا  نۇمۇس قىممىتى ،
ھاتتاكى  جان بىرىپ ئاقلايدۇ  ئۇنى .
شۇڭلاشقا چىن ئىنسان بولماق بەك قىيىن ،
ئار -نۇمۇس تاللايدۇ ئادەم  خىلىنى .

()

بەك ئاچچىق بولسىمۇ قىزىل مۇچ تەمى ،
يەيمىزكەن غىزادىن ئايرىماي ئۇنى .
دەرۋەقە  " ئاچچىقنى باسىدۇ ئاچچىق "
ھالبۇكى   كوپ يىدەك  چىقىدۇ دەردى .

()

ئوتقاشتەك  جەلىپكار   ئانار چېچىكى ،
ئەنجۈردە چىچەك  يوق شىرىن مىۋىسى.
بارچىدە خاس خىسلەت ، ئىنساندىمۇ ھەم ،
ئوخشىماس ھەركىمنىڭ  ئەجرى - شىرنىسى .