ھەر تاڭ ئاتقاندا ئەسلەرسەن مېنى

مۇھەممەتجان راشىدىن

يالغۇز ياتقاندا ئەسلەرسەن مېنى،
ئۇيقۇڭ قاچقاندا ئەسلەرسەن مېنى.

گۇلنى يايرىم دەپ باھاردا بۇلبۇل،
قوشاق قاتقاندا ئەسلەرسەن مېنى.

يالغۇز ھوجراڭدا باشلىنىپ كېچە،
چىراق ياققاندا ئەسلەرسەن مېنى.

ئويغانساڭ سەھەر يىنىڭدا مەن يوق،
ھەر تاڭ ئاتقاندا ئەسلەرسەن مېنى.

يامغۇر سۆزلىرىم يادىڭدا بولسۇن،
يامغۇر ياققاندا ئەسلەرسەن مېنى.

تاھىر ئاققاندەك ئەزىم دەريادا
مەنمۇ ئاققاندا ئەسلەرسەن مېنى.

سۈرەتلىرىمنى ساقلاپ قوي يايرىم،
ئەلبۇم ئاچقاندا ئەسلەرسەن مېنى.

مەندىن ئايرىلىپ ئېتىڭ تارتالماي
ھارۋاڭ پاتقاندا ئەسلەرسەن مېنى.

ئىزدەپ تاپالماي مەندىن ياخشىنى
بېشىڭ قاتقاندا ئەسلەرسەن مېنى.

مەندىن ياخشى دەپ يۇرگەن ئاشىقىڭ
تاشلاپ قاچقاندا ئەسلەرسەن مېنى.