يىغلايمەن

مۇھەممەدجان راشىدىن

سەن يوق يەردە يىغلايمەن گۇلۇم.
كۆرسەتكۇم يوق ساڭا يېشىمنى،
راست ئەمەسمۇ ئوتتۇزغا يەتمەي،
ئاقارتقىنى دەردىڭ بېشىمنى.

داغدا قويدۇڭ مېنى بىر ئۆمۈر،
كىرمەيدىغۇ ئىنسان مىڭ ياشقا،
بۇ دەرتلىرىڭ ئۆزەڭدىن ئاندىن،
داۋاسى يوق ئۆزەڭدىن باشقا.

بىراۋ سېنى ‹سۆيمەيدۇ› دىسە.
ئەجەپ باشتا ئىشەنمەپتىمەن.
ئەمدى بىلسەم سېنى يايرىم دەپ،
تىكەنلىكتىن گۇل ئىزدەپتىمەن.

ئەلگە يىغلاش مۇمكىنمۇ بۇنى
ئەل گېپىگە كىرمىگەن تۇرسام.
ساڭا يىغلاش ئۇياتقۇ ئاندىن.
ئل يوق يەردە قۇراي ئاھ ئۇرسام.