ئىلى دىيارى بلوگى

كەتتۇقمۇ ؟

ئەجدادىمىز ياراتقان ئىلىم ۋەئىھسان،

شۇ خىسلەتتىن بىردىنلا چېنىپ كەتتۇقمۇ ؟
جەننەت تۇرساتاشلاپ ئۇنى، دۇزاق تامان،

مۆئمىن تۇرۇپ ئەگىشىپ ئېزىپ كەتتۇقمۇ ؟

تارقىتىپ بىز ھىكمەتلەر دەۋران سۈرگەن ئەل،

يۈكسەلمەستىن ،مىراستىن تېنىپ كەتتۇقمۇ ؟

ئەزىز ماكان-يۇرتۇمىزنى گۈللەندۈرمەي،

غايىمىزھەم ئىستەكدىن قېيىپ كەتتۇقمۇ ؟

ھەسەتخورلۇق ھۆكۈمران بولغاچقا بىزگە،

كۆرەلمەسلىك ئۇرۇقى تېرىپ كەتتۇقمۇ ؟

قان قېرىنداش، يىتىمنى زارلىتىپ تۇرۇپ ،

غەمگۈزار دەپ مەيدىنى كېرىپ كەتتۇقمۇ ؟

قاتار چاي، رېستۇراندا مەزلۇملار يۈرۈپ،

بالا بېقىپ ئۆزىمىزھېرىپ كەتتۇقمۇ ؟

قىزارماستىن ئۆزگىنى دوراپ، دەپ" مودا"

ئېچىپ قويۇپ كاسسىنى يۈرۈپ كەتتۇقمۇ ؟

كۆڭلىمىزنى چىللىسا ئىشرەت ۋە خومار،

مال بىساتنى، ۋىژداننى سېتىپ كەتتۇقمۇ ؟

قاششاقلىقتىن بەختىمىز ۋەيران بولىدى دەپ،

موردا بولۇپ ئۈمۈدلەر سېسىپ كەتتۇقمۇ ؟

روھىمىزنى ئەپقاچقاچ ئادىمىي شەيتان،

"ياشىدىم" دەپ ساراڭدەك كۈلۈپ كەتتۇقمۇ؟

ئارمىنى كۆپ ، دەرمانى يوق،يىتەلمىگەن،

بەڭگىلەردەك خىياللار سۈرۈپ كەتتۇقمۇ ؟

ناخشا-ئۇسسۇل خۇمارخەق دەپ ماختاپ قويۇپ،

شەيتان سالسا ئۇسسۇلغا چۈشۈپ كەتتۇقمۇ؟

تۇرالماستىن ئاڭلانسا كۈلكە، ھاياجان ،

ئەسلىمىزنى ئۇنتۇپلا ئۇچۇپ كەتتۇقمۇ ؟

خۇراپىيلىق،نادانلىق چاپلاشقان بىزگە ،

دوزاق ئوتى كۆيدۇرمەي كۆيۈپ كەتتۇقمۇ ؟

يىقىلساقمۇ تۇرغانغۇ ،ئەتىمىز ئۈچۈن،

بۇ دۇنيادىن بىراقلا تويوپ كەتتۇقمۇ ؟

ئىزدەنسەڭلا بار يەنە ئىمكان كىيىنگە ،

يىقىلىپلا بىر قېتىم قېرىپ كەتتۇقمۇ ؟

تۆۋە قىلدۇق ،تۆۋىمىز بولارمۇ قوبۇل،

پۇشايماننىڭ تەپتىدىن ئېرىپ كەتتۇقمۇ ؟