شىنخۇا تورىنىڭ 9- ماي ۋاشىنگتوندىن ئەۋەتكەن تېلېگراممىسى (مۇخبىر رەن ۋېي، يى ئەيجۈن): ئامېرىكىدىكى ئاقساراي 9- ماي بايانات ئېلان قىلىپ: رۇسىيەنىڭ يېڭى پرېزىدېنتى پۇتىن ئامېرىكا ئۇيۇشتۇرغان سەككىز دۆلەت ئۇچرىشىشىغا قاتناشمايدىغان بولدى، دېدى.باياناتتا مۇنداق دېيىلدى: ئامېرىكا پرېزىدېنتى ئوباما پۇتىن بىلەن شۇ كۈنى ئەتىگەنرەك تېلېفوندا پاراڭلاشتى. پۇتىن تېلېفوندا ئوباماغا: ئۇنىڭ كابېنت تەشكىللەش ۋەزىپىسى بولغاچقا، مۇشۇ ئاينىڭ 18-، 19- كۈنلىرى ئامېرىكىنىڭ مارىلاند شىتاتىدا ئۆتكۈزۈلىدىغان سەككىز دۆلەت ئۇچرىشىشىغا قاتنىشالمايدىغانلىقىنى ئېيتتى.
باياناتتا مۇنداق دېيىلدى: رۇسىيە زۇڭلىسى مىدىۋىدىۋ پۇتىنغا ۋاكالەتەن سەككىز دۆلەت ئۇچرىشىشىغا قاتنىشىدۇ. ئۇنىڭدىن باشقا، ئوباما بىلەن پۇتىن يەنە 6- ئاينىڭ ئاخىرىدا مېكسىكىدا ئۆتكۈزۈلىدىغان 20 دۆلەت گۇرۇھى ئۇچرىشىشىدا ئىككى تەرەپ سۆھبىتى ئۆتكۈزۈشكە قوشۇلدى.
باياناتتا مۇنداق دېيىلدى: ئوباما بىلەن پۇتىن ئۆتكەنكى ئۈچ يىلدىن بۇيان ئامېرىكا بىلەن رۇسىيە مۇناسىۋىتىدە قولغا كەلتۈرۈلگەن ئەمەلىي نەتىجىلەردىن رازىلىقىنى بىلدۈردى، ئىككىيلەن ئورتاق ئىستراتېگىيەلىك مەنپەئەت ئاساسىدا ئىككى تەرەپنىڭ ھەمكارلىقىنى داۋاملىق كۈچەيتىشكە ۋەدە بەردى.
باياناتتا مۇنداق دېيىلدى: ئىككى رەھبەر يۇقىرى قاتلام سۆھبىتىنى داۋاملاشتۇرۇشقا قىزىقىدىغانلىقىنى قايتا تەكىتلىدى. ئىككى كىشى يەنە: ئامېرىكا بىلەن رۇسىيە يادرو بىخەتەرلىكى، يادرو كېڭىيىشنىڭ ئالدىنى ئېلىش، ئافغانىستان، دۇنيا سودا تەشكىلاتى ۋە ئىقتىساد، سودا مۇناسىۋىتىدە زور ئىلگىرىلەشنى قولغا كەلتۈردى، دەپ قارىدى.
ئەسلىدە سەككىز دۆلەت ئۇچرىشىشىغا قاتناشماقچى بولغان پۇتىن 7- ماي قەدەم بېرىپ رۇسىيەنىڭ پرېزىدېنتلىق ۋەزىپىسىگە ئولتۇردى. رۇسىيە ۋە ئامېرىكا ئوتتۇرىسىدا ئىزچىل تۈردە شىمالىي ئاتلانتىك ئەھدى تەشكىلاتىنىڭ ياۋروپادا باشقۇرۇلىدىغان سىنارەدكە قارشى تۇرۇش سىستېمىسى ئورۇنلاشتۇرۇش مەسىلىسى ئۈستىدە ئىختىلاپ ساقلانماقتا. گەرچە ئىككى تەرەپ كۆپ قېتىم سۆھبەتلەشكەن بولسىمۇ، ئەمما ئىختىلاپ ئازايغىنى يوق.