ئەسسالامۇ ئەلەيكۇم كۆپچىلىك قانداق ئەھۋالىڭلار ؟!
نەچچە كۈنلەردىن بىرى ئالدىراشچىلىقتا سىلەرگە تۈزۈكرەكمۇ سالام بېرەلمەپتىمەن ،قارىسام بلوگىم تېخى رەسمىي ئېلان قىلىنماي تۇرۇپلا دوستلاردىن تەبرىك ،تىلەكلەر كېلىپ مېنى خىجالەت قىلىپ قويغىلى تۇردى .شۇڭا ئالدىراپ -تىنەپلا ئاددىي داستۇرخاندىن بىرنى سېلىپ كۆپەرەك سالام-سائەت ، ئېزگۈتىلەكلەرنى يىغىۋالاي دېدىمغۇ …
شۇنداق قىلىپ گەپنىڭ ئۆزىگە كەلسەك ،مەن بىر ئايچە ۋاقىت مۇقەددەم ،بلوگباستا قۇرغان «مۇئەللىم تورپۈتۈكلىرى»گە :«GOODBYE BLOGBUS» دەپ ،چاپاننى مۈرەمگە ئارتىپ چىقىپ كەتكەندىن كېيىن ،دوستلارنىڭ ماختاشلىرىغا زەن سالغاچ ، WORDPRESS مەملىكىتىنى زىيارەت قىلىپ ،يېڭى ماكان ئىزلەشكە باشلىغان ئىدىم ، كېيىن پېرىستان بلوگىنىڭ قۇرغۇچىسى نىجاتۇللانىڭ زىرىكمەي -تىرىكمەي ،يېپىدىن -يېڭنىسىغىچە ھەممە ئىشقا ئارىلىشىشى بىلەن يېڭى نام ،يېڭى پىروگراممابىلەن مەنمۇ ئۆزۇمچە WORDPRESSلىكلەر تەبىقىسىگە سوقۇنۇپ كىرىۋالدىم ..
«ۋەتەن» دېگەن يېزىلىشى شۇنچە ئوماق ، ئوقۇلىشى شۇنچە يېقىملىق ئەمما ۋەزنى شۇنچە ئىغىر نام . مەن بۇ نامنى ئىشلتشنى قارار قىلىپ بولغاندىن كېيىن ،ئۆزۇمدىن بىرمۇنچە سۇئاللارنى سوراپ كەتتىم ،بىراق قانائەتلىنەرلىك جاۋاب بىرەلمىدىم .. لېكىن شۇنىڭغا ئىشەنچىم باركى ۋە بۇ مۇبارەك نامغا لايىق ھالدا كۆپچىلككە شۇنداق ۋەدە بىرىمەنكى «ۋەتەن»بلوگى مېنىڭ تىرىشچانلىقىم ،سىزنىڭ قوللىشىڭىز بىلەن ،بۇ مەۋھۇم دۇنيادىكى ھەربىر مەرىپەت ئىزدىگۈچىنىڭ كىچىككىنە ،ئىللىق «ۋەتەن»نى بولۇپ قالغۇسى !
ئاخىرىدا «ۋەتەن»بلوگىنىڭ بارلىققا كېلىشىدىكى تېخنىكىلىق ئىشلاردا مىنى باشتىن -ئاخىر قوللاپ كېلىۋاتقان ئىنىمىز نىجاتۇللا (پېرىستان)غا ئالاھىدە رەھمىتىنى بىلدۈرىمەن (قۇرۇقلا) ۋەبارلىق بلوگپۇرۇش ،تورخۇمار دوستلارغا «ۋەتەن» بلوگىدىن قىزغىن سالام يوللايمەن .كۆپچىلىككە رەھمەت ! (چاۋاك)