شىنخۇا تورى چىكاگو 18–ئىيۇل تېلېگراممىسى : ئامېرىكا تاراتقۇلىرىنىڭ 18–ئىيۇل خەۋەر قىلىشىچە ، ‹‹ ئاپتوموبىل شەھىرى ›› دېگەن نامى بار دېترويت شەھىرى قەرزى 18 مىليارد ئامېرىكا دوللىرىدىن ئېشىپ كەتكەنلىكتىن ، ھۆكۈمەتكە ۋەيران بولۇشتىن ساقلىنىش ئىلتىماسى سۇنۇپ ، ئامېرىكىدىكى ھازىرغا قەدەر ۋەيران بولۇشتىن ساقلىنىشقا ئىلتىماس سۇنغان ئەڭ چوڭ شەھەر بولۇپ قالغان .

    خەۋەردە مۇنداق دېيىلگەن : دېترويتنىڭ مالىيە باشقۇرغۇچىسى Kevin Orr مىچىگان ئىشتاتىنىڭ باشلىقى Rick Snyder نىڭ قوشۇلىشى بىلەن دېترويتتىكى ۋەيران بولغان كارخانىلار سوتىغا ئىلتىماس سۇنغان . RickSnyder مۇنداق دېدى : ئەگەر ۋەيران بولۇش ئىلتىماسىنى سۇنمىساق ، دېترويتنىڭ مالىيە جىددىيچىلىكىنى ئوڭۇشلۇق بىر تەرەپ قىلغىلى بولمايدۇ . ۋەيران بولۇشقا ئىلتىماس قىلىش ناھايىتى قىيىن بولغان بىر قارار ، لېكىن يەنىلا قوللىنىشقا تېگىشلىك تەدبىر .

    دېترويت شەھىرى مىچىگان ئىشتاتىدا بولۇپ ، بۇ يەردە ئامېرىكىدىكى ئۇچ چوڭ ئاپتوموبىل ياساش كارخانىسى بولغاچقا ‹‹ ئاپتوموبىل شەھىرى ›› دەپ نام ئالغان . 20-ئەسىرنىڭ 50–يىللىرى دېترويتنىڭ نوپۇسى كۆپىيىپ 1 مىليون 800 مىڭغا يەتكەن ، لېكىن نۆۋەتتە نوپۇس ناھايىتى تېز ئازىيىپ 700 مىڭغا چۈشۈپ قالغان ، 2000–يىلدىن 2010–يىلغىچە تېخىمۇ ئازلاپ 250 مىڭغا چۈشۈپ قالغان . بۇ سەېەپتىن نۇرغۇن كارخانىلار دېترويتتىن ئايرىلغان ، شۇنىڭ بىلەن بۇ شەھەرنىڭ مالىيە ئەھۋالى كۈندىن–كۈنگە ناچارلاشقان .