ماتېرىيال سۈرەت: دېھقان رەسساملار نەق مەيداندا رەسىم سىزماقتا

    شىنجاڭ ‹‹ دولان يۇرتى ›› ، ‹‹ دولان رەسساملىق يۇرتى ›› مەنزىرە رايونى 13-ئىيۇل ئايرىم-ئايرىم ھالدا مەكىت ناھىيەسىنىڭ يانتاق يېزىسى بىلەن قۇمقۇسار يېزىسىدا قۇرۇلدى . بۇ مەنزىرە رايونى مەزكۇر ناھىيەنىڭ ‹‹ دولان مەدەنىيىتى ›› نامىدا قۇرۇپ چىقىۋاتقان يۈرۈشلۈك ساياھەت تۈرلىرىنىڭ يادرولۇق مەزمۇنى بولۇپ ، بۇ ناھىيەنىڭ يالغۇز دېھقانچىلىقنىلا تەرەققىي قىلدۇرۇشتىن دېھقانچىلىق بىلەن ساياھەتچىلىكنى بىرلىكتە تەرەققىي قىلدۇرۇشقا باشلىغانلىقىنىڭ ئىپادىسى .

    يانتاق يېزىسى دولان مۇقاملىرىنىڭ ۋارىسى ھەسەن يەھيا ، ھۈسەن يەھيا قاتارلىق بىر تۈركۈم ‹‹دۆلەت دەرىجىلىك›› غەيرىي ماددىي مەدەنىيەت مىراسلىرىنىڭ ۋارىسلىرىنىڭ يېزىسى .دولان مەدەنىيىتىنى تارقىتىش ۋە ۋارىسلىق قىلىش ئۈچۈن ، مەكىت ناھىيەسى بۇ يىل ئىچكىرىدىكى كارخانىلارنى جەلپ قىلىپ ، يانتاق يېزىسىدا دولان مۇقاملىرى ، دولان مەشرەپلىرى ، دولان دېھقانلار رەسىملىرىدىن ھۇزۇرلىنىش ، شۇنداقلا دولانلىقلارنىڭ مىللىي ئۆرپ-ئادەتلىرى ، بوستانلىقتىكى دېھقانچىلىقنى بېشىدىن ئۆتكۈزۈپ بېقىش قاتارلىقلار بىر گەۋدىلەشكەن ‹‹دولان يۇرتى›› مەنزىرە رايونىنى بەرپا قىلىپ چىقتى . بۇ مەنزىرە رايونىغا 30 مىليون يۈەندىن ئارتۇق مەبلەغ سېلىنغان بولۇپ ، دۆلەتنىڭ 3A دەرىجىلىك مەنزىرە رايون ئۆلچىمى بويىچە قۇرۇلۇش قىلىنغان، قۇرۇلۇش تاماملانغاندىن كېيىنكى يىللىق ساياھەتچى كۈتۈۋېلىش مىقدارى 200 مىڭ ئادەم (قېتىم) غا يېتىشى مۇمكىن .

    تەكلىماكان قۇملۇقىنىڭ چېگرىسىغا جايلاشقان قۇمقۇسار يېزىسى مەكىت دولان دېھقان رەسساملىرىنىڭ ماكانى . دولان دېھقان رەسساملىرى ئالدىنقى ئەسىرنىڭ 70-يىللىرىدا بارلىققا كەلگەن بولۇپ ، ئەۋلادمۇ ئەۋلاد دېھقانچىلىق بىلەن شۇغۇللىنىپ كەلگەن دولانلىقلار ئارىسالدى ۋاقىتلىرىدىن پايدىلىنىپ قورال-سايمانلارنىڭ رەسىمىنى سىزىپ چىققان . 40 نەچچە يىلدىن ئارتۇقراق ۋاقىتتىن بۇيانقى تەرەققىيات ۋە ئۆزگىرىش ئارقىلىق بۇ خىل مۇستەقىل ئەنئەنىۋى رەسىم سىزىش سەنئىتى گۈزەل سەنئەت ساھەسىدىكىلەرنىڭ دىققىتىنى تارتقان.