رىشتە تور خاتىرىسى

قارا ئوغلۇم چەكسىز دالاغا،
ئۇ  چەكسىزدۇر، چەكسىز ئۇ ئەبەد.
ئۇندا باردۇر شادلىق ھەم ئازاب،
سەبىي تۇيغۇ، ئوتلۇق مۇھەببەت.
ئۇندا باردۇر شىردەك ھۈركىرەش،
ئۇندا باردۇر غەزەپ ۋە نەپرەت.

قارا ئوغلۇم چەكسىز دالاغا،
ئۇ چەكسىزدۇر، چەكسىز ئۇ ئەبەد.
چەكسىزلىكنى ئۆگەن ئۇنىڭدىن،
تىك تۇرۇپ ئۆل تىلىمە شەپقەت.
دۇنيا شۇنچە گۈزەل بولسىمۇ،
گۈزەللىككە يەتمەك مۇشەققەت.

قارا ئوغلۇم چەكسىز دالاغا،
مۇز تېگىدە دولقۇن ئەۋجى بار.
روھلىرىڭنى قۇياشقا تەڭ قىل،
قىش قوينىدىن ئىزدىسەڭ باھار.
بۈركۈتلەرنىڭ پەرۋازىدا بول،
ئۇندا ھايات كۆرۈنمەيدۇ تار.

قارا ئوغلۇم چەكسىز دالاغا،
ئۇ چىلتەكتەك ھەممىگە تۇتاش.
ھايات تۆسە گاھىدا كۈلكە،
گاھى تۆكەر ئازابلىق كۆز ياش.
گاھى چاقسا ئاسماندا چاقماق،
گاھى پارلار ئۇپۇقتا قۇياش.
..................................................................

مەنبەسى: تارىم ژورنىلى. 1993-يىللىق 5- سانىدىن. ئاپتۇرى: ئۆمەر

مەتنۇرى