نىدائىي يانبىلوگى

ئۆزىڭىزنى تونۇشتۇرۇش پۇرسىتىنى قولدىن بەرمەڭ

*

*

    ئۆزىنى تونۇشتۇرۇشمۇ بىر خىل ئىقتىدار، شۇنداقلا بۈگۈنكى دۇنيا كىشىلىرىنىڭ ئىجتىمائىي ئالاقە ئىشلىرىدىكى مۇقەررەر باسقۇچ. ئۆزىنى تونۇشتۇرۇشنى ئەڭ ئاددىي قىلىپ ئېيتقاندا، ئۆزىنىڭ ئىسىم-فامىلىسى ۋە شۇغۇللىنىۋاتقان ئىشىنىڭ نېمە ئىكەنلىكىنى باشقىلارغا يەتكۈزۈشنى كۆرسىتىدۇ. ئۇنى كېڭەيتكەندە شۇ كىشىنىڭ ئۆزىنىڭ ئىسىم-فامىلىسى، شۇغۇللىنىۋاتقان ئىشى، يۇرتى، ئوقۇغان مەكتىپى، قىزىقىشى،  مىجەز-خاراكتېرى ۋە باشقا ئالاھىدە تەرەپلىرى ھەققىدە باشقىلارغا ئاغزاكىي ياكى يازمىچە ئۇچۇر يەتكۈزۈشتۇر. نۇرغۇن كىشىلەر بىرەر سورۇندا ئۆزىنى تونۇشتۇرۇشقا توغرا كەلگەندە، تىلىنى چايناپ ۋاقىتنى ئېلىپ كىشىنى بىزار قىلىدۇ ياكى ھەتتا ئۆزىنىڭ ئىسىم-فامىلىسى، شۇغۇللىنىدىغان كەسپىنىمۇ ئوڭلاپ دېيەلمەي كېكەچلەپ ئولتۇرىدۇ.        مەن ئادەتتە پائالىيەتلەردە، سورۇنلاردا تىلىنى چايناپ نۇرغۇن باشقىلارنىڭ ۋاقتىنى ئالغان كىشىلەردىن ئەڭ بىزار. بەزىلەر ئۆزىنى تونۇشتۇرۇشقا تەكلىپ قىلىنسا، ئىسمىنىلا دەپ قويىدۇ، قالغانلىرىنى رىياسەتچى بىرنى سورىسا بىرنى، ئىككىنى سورىسا ئىككىگە جاۋاب بېرىپ ۋاقىتقا خىيانەت قىلىدۇ، بەزىلەر ھەممىنى دېسىمۇ ئىسمىنى دېمەيدۇ، بەزىلەر پەلىپەتىش گەپلەرنى قىلىپ ئادەمنىڭ ئىچىنى سىقىدۇ، بەزىلەر ئۆزىنى تونۇشتۇرۇشنى ئۆزىنى كۆرسىتىش، ئۆزىنى كۆز-كۆز قىلىش دەپ ئويلاپ، ئۆزىنى تونۇشتۇرۇۋاتقانلارنى ھاكاۋۇر، مەنمەنچىگە چىقىرىۋېتىدۇ. ئۆزىنى تونۇشتۇرۇش بىلەن ئۆزىنى كۆرسىتىش ئىككى ئىش. ئىجتىمائىي پائالىيەتكە كۆپ قاتنىشىدىغانلار، ئاخباراتچىلار، كارخانىچىلار، رىياسەتچىلەر، لېكتور، لېكسىيەچىلەر، ئىستۇدېنتلار، مەسلىھەتچىلەر ئۆزىنى تونۇشتۇرۇشقا ماھىر بولۇشى، ئۆزى ھەققىدىكى بارلىق ئۇچۇرلارنى ئەڭ ئىخچام ھالەتتە يەتكۈزۈش ئىقتىدارىنى ھازىرلىشى كېرەك. ئۆزىنى تونۇشتۇرۇشنى بىلىش بۈگۈنكى زاماندا كىشىلەرنىڭ مۇۋەپپەقىيەت قازىنىشىدىكى تۇنجى قەدەم ھېسابلىنىدۇ. بۇ بەلكىم ھېچكىم دىققەت قىلمىغان مەسىلىلەرنىڭ بىرى بولۇشى مۇمكىن. مەن دوستلارنىڭ مۇشۇنداق پۇرسەت كەلگەندە دادىللىق بىلەن ئۆزىنى تونۇشتۇرۇشقا جۈرئەت قىلىشىنى تەۋسىيە قىلىمەن.