دۇنياۋېي شۆھرەتلىك گىتارچى – ئەرمىك

ahmatjan

دۇنياۋېي شۆھرەتلىك گىتارچى – ئەرمىك

   


غېنى سەمەت


ئەرمىك زامانىمىزدا ئىخلاسمەنلىرى  ئەڭ كۆپ بولغان دۇنياۋېي گىتارچى بولۇپ تۇرماقتا.  خەلقىمىزدىمۇ ئۇنىڭ گىتار كۈيلىرىگە مەستانە بولغان گىتار ھەۋەسكارلىرى ۋە كۈي زوقمەنلىرى ئاز ئەمەس.
بۈگۈنكى زامان مۇزىكا دۇنياسىدىكى ‹‹ يېڭى فىلەمېنكو گىتار ئېقىمى ›› نىڭ ئەڭ مەشھۇر ۋەكىلى ئەرمىك ئىراندا ئەرمىنىيەلىك كۆچمەن ئائىلىسىدە  تۇغۇلغان . دادىسى ساز دوكىنىنىڭ خۇجايىنى ئىدى. بالىلىق دەۋرىدىلا مۇزىكا تالانتى بايقالغان، گىتارغا چۇڭقۇر مۇھەببەت باغلىغان  ئەرمىك يەتتە يېشىدا ئەتىۋارلىق قول سائىتىنى قىلچە ئىككىلەنمەي گىتارغا تېگىشىپ، قازناقتا يۇشۇرۇن گىتار مەشق قىلىشقا كىرىشىدۇ. دادىسىنىڭ قىزغىن رىغبەتلەندۈرىشى ۋە قوللىشى بىلەن مۇنتىزىم ھالدا گىتار دەرسىگە قاتنىشىپ، ئىككى يىلدا گىتارنىڭ ئاساسىي بىلىملىرى ۋە ماھارەتلىرىنى دېگۈدەك ئىگىلەپ بولىدۇ. ئۇنىڭ دەسلەپتە ئىخلاس قويغىنى جاز مۇزىكىلىرى بولۇپ ،12 يېشىدا گىتارنى كىشىنىڭ مەستلىكى كەلگۈدەك دەرىجىدە ماھارەتلىك چېلىش سەۋىيىسىگە يەتكەندىن باشقا، مۇزىكا ئىجاد قىلىپ، باشقىلارنى تاڭ قالدۇرىدۇ.
ئۇ 1970-يىللارنىڭ دەسلىپىدە گىتارنىڭ مۇقەددەس ماكانى ئىسپانىيەگە سايەھەت ۋە ئۆگىنىشكە كېلىپ، ئىسپانىيەنىڭ فىلەمېنكو مۇزىكىلىرىدىن زىلزىلىگە كېلىدۇ. بولۇپمۇ، ئىسپانىيەلىك مەشھۇر گىتار ئۇستازى پېكودولوكىيانىڭ ئۇسلۇبى ۋە ماھارەتلىرىدىن چۇڭقۇر ئىلھام ئېلىپ، فىلەمېنكو گىتار كۈيلىرىنى ئۆگىنىشكە كىرىشىدۇ، زور ئىجتىھات ۋە جاپالىق مەشق  گىتار ئاساسى ۋە بىلىمى پۇختا بولغان ئەرمىكنى ئۇزۇنغا قالماي، بۇ ئۇسلۇبتىكى يېتۈك ئىجراچى ۋە ئىجادىيەتچىگە ئايلاندۇرىدۇ.گىتار ئۇستىلىرى توپلاشقان ئىسپانىيەدە ناھايىتى تېزلا كۆزگە كۆرۈنىدۇ. بۇ ئۇنىڭ كەسپىي ھاياتىنىڭ بۇرۇلۇش نۇقتىسى بولۇپ قالىدۇ.1975-يىلى تۇنجى پىلاستىنكىسى《Faramarz Aslani》 نەشىردىن چىقىپ، ئۆزىنىڭ فىلەمېنكو ئۇسلۇبىدىكى ئىستىداتىنى دەسلەپكى قەدەمدە نامايەن قىلىپ، مۇئەييەن ئېتىراپقا ئېرىشىدۇ. 1981-يىلى ئامېرىكىغا بېرىپ، كەسپىدە تېخىمۇ  تەرەققى قىلىش پۇرسىتىگە ئېرىشىدۇ.بۇ مەزگىلدە  بىر تەرەپتىن ئامېرىكىدا كەڭ تارقالغان زامانىۋېي مۇزىكا ۋە گىتار ماھارەتلىرىنى پىششىق ئۆگەنگەچ،يەنە بىر تەرەپتىن  كىلاسسىك ،جاز ، فىلەمېنكو ، سىگان ئۇسلۇبىدىكى كۈيلەرنى بىرلەشتۈرۈپ يېڭى ئۇسلۇب يارىتىش ئۈسىتىدە چۇڭقۇر ئىزدىنىدۇ، بۇ ئۇسلۇبتا مۇزىكا ئىجاد قىلىدۇ ۋە گىتارغا دادىل بىرلەشتۈرىدۇ. ئۇزۇن مەزگىللىك جاپالىق مەشق،ئەستايىدىل ئۆگىنىش، چۇڭقۇر ئىزدىنىش،سىناق،ئەتىراپلىق تەتقىقات، قىزغىن ئىجادىيەت ئۇنى قاتتىق تاۋلايدۇ.ئۇ ئاخىرى پارتلاپ، 1994-يىلى ئامېرىكىدا تۇنجى مۇنتىزىم  پىلاستىنكىسى - ‹‹ يامغۇردىكى ئۇسسۇلچى ›› نەشردىن چىقىشى بىلەن گىتار ساھەسىنى تىترىتىۋىتىدۇ. 1995-يىلى ‹‹سىگانغا مۇھەببەت ›› ، 1997-يىلى ‹‹ مالاگا ›› ناملىق پىلاستىنكىلىرى  ئېلان قىلىنىپ، تېخىمۇ زور ئالقىشقا سازاۋەر بولىدۇ ۋە دۇنيا فىلەمېنكو ساھەسىدە ئورتاق ئېتىراپ قىلىنغان گىتارچىغا ئايلىنىدۇ. 2002-يىلى ‹‹ جەننەتتىكى ئېزىقىش ›› ناملىق پىلاستىنكىسى تارقىتىلىپ، دۇنيا گىتار ساھەسىدە سىلكىنىش خاراكتېرلىك تەسىر قوزغايدۇ.ئاجايىپ تېز سۈرئەتتە دۇنياغا تاراپ كېتىدۇ. بۇ پىلاستىنكا ئىجادىيەت ۋە ئۇرۇنلاش جەھەتتىن يىپيېڭى بىر ئۇسلۇبنىڭ مەيدانغا كەلگەنلىكىنىڭ ئىپادىسى سۈپىتىدە ، ئۇنىڭغا ئالەمشۇمۇل شۆھرەت ئېلىپ كېلىپ، گىتار ساھەسىدىكى تەۋرىمەس ئورنىنىڭ بەلگىسى بولۇپ قالىدۇ. دەرۋەقە ، ئەرمىك بۇ پىلاستىنكىسى بىلەن ‹‹ جاز، سىگان، فىلەمېنكو ئاھاڭلىرى ›› نىڭ گىتاردىكى ھەقىقىي جىپىسلىشىشى بولغان ‹‹ يېڭى فىلەمېنكو  گىتار ئېقىمى›› نىڭ دۇنياۋېي ۋەكىلى ئىكەنلىكىنى دۇنياغا جاكارلايدۇ. ئۇنىڭ پىلاستىنكىلىرى كەينى-كەينىدىن ئېلان قىلىنىپ ،ئاجايىپ كەڭ تارقىلىدۇ.
ئۇ ئۇرۇنلىغان ‹‹ ئالتۇن – كۆمۈش ئارىلى ››، ‹‹ يامغۇردىكى ئۇسسۇلچى ››، ‹‹ يامغۇرلۇق يەكشەنبە ››، ‹‹ روسسېنىڭ يېڭى يۇلتۇزى ››، ‹‹ سېنىڭ تەپەككۇرۇڭ ›› ، ‹‹ چۆچەكلەردەك ئاي نۇرى ›› ، ‹‹ يالقۇنلۇق ھېسسىيات ››، ‹‹ كېلەنتې ›› ،‹‹ مالاگا ››،‹‹ جەننەتتىكى ئېزىقىش ›› ، ‹‹ قىزىل ئەتىرگۈل ›› ، ‹‹ پىيانىنو كېچىسى ›› ، ‹‹ خىيال ›› ،‹‹ رۇمانتىك چۈش ››، ‹‹ رۇمانتىك قەھۋە ›› ، ‹‹ ئەتىرگۈلدەك يار ››..قاتارلىق گىتار مۇزىكىلىرى دۇنيادىكى ، كۈي سۈيەرلەر تولىمۇ سۆيۈپ ئاڭلايدىغان، ئاڭلىغانسېرى قانمايدىغان ، گىتار ئەھلى ئۈلگە قىلىدىغان كۈيلەرگە ئايلىنىپ كېتىدۇ.ئەرمىك قىزغىنلىقى  پەيدا قىلىپ، گىتارنىڭ سېھرى كۈچىنى قايتىدىن تونۇتىدۇ. ئۇنىڭ ھازىرغىچە ‹‹ رۇمانتىك چۈش ›› ( 2004)، ‹‹ بىرازىلىيەدىكى بىر كۈن ›› ( 2007)، ‹‹ بارسېلونا ›› ( 2008 )، ‹‹ قايناق سېرېنادا ›› ( 2009)، ‹‹ سۆيۈش ›› ( 2010 )، ‹‹ ئەرمىك كۈيلىرىدىن تاللانما ›› ( 2008 )، ، ‹‹ يېڭى فىلامېنكو كۈيلىرىدىن جەۋھەرلەر ›› ( 2008 )، ‹‹ گىتار قەھرىمانى ›› ( 2007 )، ‹‹ مېنىڭ قىزغىنلىقىم ›› ( 2006)، ‹‹ دېڭىزنىڭ چۈشى ›› (2005 ) ، ‹‹ گۆھەر ›› ( 2004 )، ‹‹ پىيانىنو كېچىسى ›› ( 2004)، ‹‹ گىتارغا مۇھەببەت ›› ( 2003 )، ‹‹ جەننەتتىكى ئېزىقىش ›› ( 2003 )،‹‹ يامغۇردىكى ئۇسسۇلچى ›› ( 1994)، ‹‹ سىگان يالقۇنى ›› ( 1995)، ‹‹ رۇبىيە ›› (1996 )، ‹‹ مالاگا ›› ( 1997 )، ‹‹ قۇياش ئارىلى ›› (1999 )، ‹‹ ئەتىرگۈلدەك يار ›› ( 2001 )، ‹‹ رۇژدېستۋولىق تىلەك ›› (2006 )، ‹‹ رۇمانتىك قەھۋە ››( 2004 )...قاتارلىق مەخسۇس پىلاستىنكىلىرى نەشىر قىلىنغان بولۇپ،ھەر بىرسى دېگۈدەك ئابىدە خاراكتېرلىك پىلاستىنكا بولۇپ قالىدۇ.



     فىلەمېنكو –ئىسپانىيەنىڭ ئىككى دۆلەت مەدەنىيەت گۆھىرى ( يەنە بىرى  تەنھەرىكەت تۈرى – كالا سوقۇشتۇرۇش ) نىڭ بىرى . فىلەمېنكو ناخشا، مۇزىكا ، ئۇسسۇل بىرلەشتۈرۈلگەن ئۆزگىچە سەنئەت شەكلى بولۇپ، 15-ئەسىرلەردە ئىسپانىيەنىڭ جەنۇپ تەرىپىدىكى سىگانلار ئارىسىدا پەيدا بولۇپ راۋاجلانغان. 19-ئەسىرلەرگە كەلگەندە، لاتىن ئامېرىكىسىغا كىرگەن.كېيىن دۇنياۋېي خاراكتېرلىك مۇزىكا ئېقىمىغا ئايلىنىپ، دۇنياغا كەڭ تارالغان. فىلەمېنكونىڭ مۇزىكا تۈرى ئاساسەن گىتار بىلەن ئورۇنلىنىدىغان مۇزىكىلارنى كۆرسىتىدىغان بولۇپ ، ئىسپانچە ئالاھىدىلىكى قويۇق بولغان بۇ مۇزىكا ئۇسلۇبى ھازىرقى دۇنيادىمۇ گىتارچىلارنىڭ سەۋىيە ۋە ماھارىتىنى دەرىجىلەيدىغان ئاساسلىق ئۆلچەم بولۇپ قالدى.بۇ ئۇسلۇپ 7 ئەسىرلىك تەرەققىيات جەرىيانىدا ، شەكىللىنىش ۋە كىلاسسىك دەۋرىنى بېسىپ ئۆتتى. بۈگۈنكى كۈندە يېڭى فىلەمېنكو ئېقىمى ھاياتىي كۈچىنى نامايەن قىلىپ، دۇنيادىكى ئەڭ جەلىپكار مۇزىكا ئېقىملىرىنىڭ بىرى بولۇپ تۇرماقتا.
‹‹ يېڭى فىلەمېنكو مۇزىكا ئېقىمى ››  كىلاسسىك فىلەمېنكو كۈيلىرى بىلەن جاز ۋە سىگان كۈيلىرى ئاجايىپ جىپىسلىشىشىتىن خاراكتېرلەنگەن مۇزىكا ئېقىمىدۇر. ئەرمىك دۇنيا مۇزىكا ساھەسىدە ، گىتار ئورۇنلاشتا ‹‹ يېڭى فىلەمېنكو مۇزىكا ئېقىمى ›› نىڭ ئەڭ مەشھۇر ۋەكىلى ھېسابلىنىدۇ.ئۇنىڭ گىتار كۈيلىرىنىڭ خېلى كۆپ قىسمىنى ئۆزى ئىجاد قىلغان ياكى ئۆزگەرتكەن بولۇپ، ئاككوردلاشتۇرۇش، ئۈن ئېلىش قاتارلىقلارغىمۇ ئۆزى يېتەكچىلىك قىلىدۇ.بۇ كۈيلەر ئادەمگە ئاجايىپ زور كەيپىيات بوشلۇقى، تەسەۋۋۇر كەڭلىكى، ھېسسىيات پەرۋازى بەخش ئېتىدۇ. ئۇنىڭ كۈيلىرى ئاساسلىقى گىتار بىلەن ، ئۆز نۆۋىتىدە پىيانىنو، دۇمباق،ئىسكىرىپكا قاتارلىق كۆپ خىل ساز يانداشتۇرۇلغان ھالەتتە ئورۇنلىنىپ كەلدى.بۇ كۈيلەرنىڭ كۆپى ساپ مۇزىكىلا بولۇپ،تېكىست سېلىنىپ، ناخشا سۈپىتىدە ئورۇندالغانلىرى كۆپ ئەمەس. ئۇنىڭ گىتارلىرىدىن تۆكىلىۋاتقان كۈيلەر تولىمۇ سىرلىق روھ ۋە ھېسسىيات بىلەن سۇغۇرۇلغان ، لېرىك شېئىرلاردەك رۇمانتىك مېلودىيە ۋە جۇشقۇن ئۇسسۇللاردەك رېتمغا تۇيۇنغان. ئۇ گىتار ماھارىتىدە ئەقىلنى لال قىلغۇدەك سەۋىيەگە يەتكەن بولۇپ، تەبىئىي،نازۇك، ياۋايى ھېسسىيات بىلەن ئىنچىكە، پۇختا ماھارەت تەبىئىي رەۋىشتە بىرلىشىپ كەتكەن. ئۇنىڭ تولىمۇ نەپىس، لەرزان، جۇشقۇن كۈيلىرىنى ئاڭلىغىنىڭىزدا، ئۇ سىزگە يۈرەكنىڭ ئەڭ چۇڭقۇر قاتلاملىرىدىكى ئەڭ پىنھان، نازۇك ھېس- تۇيغۇلارنى سۆزلەپ بېرىۋاتقاندەك تۇيۇلىدۇ.ئۇنىڭ زەخمىكى شۇنچىلىك تېز ۋە لەرزان چېكىلىۋاتقان  گىتارىدىن تەبىئەتنىڭ ھاياتبەخش  پىچىرلىشى ۋە ھاياتنىڭ قانۇنىيەتلىرى يۇغۇرۇلغان قۇيۇق ھېسسىيات تېمىپ تۇرىدۇ.
رۇمانتىك، لەرزان ھېسسىيات بىلەن يۇغۇرۇلغان، سىرلىق روھ، ئەركىن تەسەۋۋۇر ، تېرەن مەزمۇن بىلەن يۇغۇرۇلغان كۈيلىرى ، كامالەتكە يەتكەن ئورۇنداش ماھارىتى بىلەن يېڭى فىلەمېنكو مۇزىكا ئېقىمىنى ،  دۇنيا گىتارچىلىقىنى يېڭى پەللىگە كۆتۈرگەن بۇ سەنئەتكار 2012-يىلى 1-ئايدا يېڭى پىلاستىنكىسى - ‹‹ سۆيگۈ قەسىرى ›› نى ئېلان قىلىپ، مۇزىكا ساھەسىدە تېخىمۇ زور زىلزىلە پەيدا قىلىپ، گىتار مۇزىكىلىرىنىڭ سېھرىي كۈچىنى دۇنيا ئەھلىگە يەنە بىر قېتىم چۇڭقۇر ھېس قىلدۇردى.

metal

بۇ گىتتارچىنىڭ مۇزىكىلرنى تولىمۇ ياخـتۇرمەن ئۇيۇمدە بىر تال پىلاستىكىسى بار .

ئابدۇرىشىت

ھە.....ئىرانلىقكەندە بۇ ئادەم.....تېمىڭىزغا كۆپتىن- كۆپ رەھمەت!

m-k-music

مىنىڭ نەزىرىمدە بۇ ئادەم تۇغۇلغاندا گىتتار چىلىشقىلا يارالغاندەك بىلىنىدۇ.

letip

   بۇ مەشھۇر كىشىنىڭ پىلاستىنكىلىرىنى توردىن تاپقىلى بولامدۇ؟

ئىزنار

مەن كۆرۈپمۇ باقماپتىكەنمەن بۇ ئادەمنى.  مۇزىكىسىنىمۇ ئاڭلىماپتىكەنمەن..  تېمىڭىزغا رەھمەت

jam17

مىنىڭچە بۇ گىتارچىنىڭ مۇزىكىسىنى ئاڭلىمىغان ئۇيغۇر بولىمىسا كىرەك . چۇنكى شىنجاڭ تىلىۋزىيىسىنىڭ ئۇيغۇرچە ئېلانىلرىدا بەك كوپ ئىشلىتدۇ بۇ گىتارچنىڭ مۇزىكىسىنى .
مەن مۇشۇ گىتارچى بىلەن jesse cook ئىكككىسنىڭ مۇزىكىسىنى بەك ياختۇرىمەن .
رەھمەت يولىغان تېمىڭىزغا

PARUK213

ئەگەر چۈشۈرۈپ ئاڭلىماقچى بولسىڭىز ：http://www.xiaohx.com/search?key=ARMIK&cat=

muhtarmusic

مەندە 2 مۇزىكىسى بار ئىدى ،قالغان لىنتىلىرىنى تاپماكچى بولسام نەدىن ئىزدەيمەن؟ چۈشۈرۈش ئادىرسىنى ئېيتىپ بەرگەن بولساڭلار ،تېما ئىگىسىگە رەھمەت.

ＭぴSìＣ

ھەقىقەتەن تالانتى باركەن ..تېمائىگىسىگەرەھمەت...

halastan

تېمىڭىزغا رەھمەت مەنمۇ تۇنجى كۆرۇشىم جاپاچىكىپسىز

ئىزنار

halastan يوللىغان ۋاقتى  2013-5-14 22:18
تېمىڭىزغا رەھمەت مەنمۇ تۇنجى كۆرۇشىم جاپاچىكىپسىز

مۇبارەك بولسۇن ،،  ئالىي ئەزا بولۇپسىز

ئەكىرەم

   بۇ مەشھۇر كىشىنىڭ پىلاستىنكىلىرىنى توردىن تاپقىلى بولامدۇ

ئەكىرەم

مىنىڭچە بۇ گىتارچىنىڭ مۇزىكىسىنى ئاڭلىمىغان ئۇيغۇر بولىمىسا كىرەك . چۇنكى شىنجاڭ تىلىۋزىيىسىنىڭ ئۇيغۇرچە ئېلانىلرىدا بەك كوپ ئىشلىتدۇ بۇ گىتارچنىڭ مۇزىكىسىنى .
مەن مۇشۇ گىتارچى بىلەن jesse cook ئىكككىسنىڭ مۇزىكىسىنى بەك ياختۇرىمەن .
رەھمەت يولىغان تېمىڭىزغا

ahmatjan

ئەكىرەم يوللىغان ۋاقتى  2013-9-21 02:38
مىنىڭچە بۇ گىتارچىنىڭ مۇزىكىسىنى ئاڭلىمىغان ئۇيغۇر بو ...

شۇنداق . ئىشقىلىپ گىتتار چالىدىغانلىكى كىشى مۇشۇنىڭغا ئۇخشاش گىتتار پىرلىرىنى ئۆزىگە ئۈلگە قىلىپ ۋەكىللىك ئەسەرلىرىنى چېلىشنى ئۆگىنىپ تەرەققى قىلىدۇ. مەندە بۇنىڭ 8 دىن ئارتۇق پىلاستىنكىسى بار . قارىغاندا گىتتارچى بالىلار خېلى كۆپ ئوخشايدۇ بۇ ‹ماكان› نىمىزدا !