ئەنگلىيە «كۈندىلىك پوچتا گېزىتى»نىڭ 17-يانۋاردىكى خەۋىرىگە قارىغاندا، ئادەتتىكى نۇرغۇن قىزلارغا ئوخشاش كولۇمبىيەلىك ماگالى گونزالېز سىررامۇ (Magali)  ئۇسسۇل ئويناشنى، مۇزىكا ئاڭلاشنى، گىرىم قىلىشنى ياخشى كۆرىدىكەن. ئەمما ئۇنى ئۆزى بىلەن تەڭتۇش بالىلارغا سېلىشتۇرغاندا، ئۇ «90 ياشلىق» كىشىنىڭ دۇنياسىدا ياشىماقتا. دوختۇر ئۇنىڭ 13 ياشقىچە ئۆمۈر كۆرەلەيدىغانلىقىنى ئېيتقان، ئەمما ئۇ ھازىر دوختۇرنىڭ ئېيتقىنىدىن ئىككى يىل ئارتۇق ياشىغان، يېقىندا ئۇ ئائىلىسىدىكىلەر بىلەن بىرلىكتە 15 ياشلىق تۇغۇلغان كۈنىنى كۈتۈۋالغان.

       ماگالى بىر خىل كەم كۆرۈلىدىغان بالدۇر قېرىش كېسىلىگە گىرىپتار بولغان بولۇپ، بۇ بىر خىل جاننى ئالىدىغان ئىرسىي كېسەللىك ئىكەن. گىرىپتار بولغۇچىنىڭ بەدىنىنىڭ قېرىش جەريانى ئىنتايىن تېز بولىدىكەن. بۇ خىل كېسەلگەن گىرىپتار بولغان بالىلارنىڭ 13 ياشتىن ئارتۇق ياشىغانلىرى ئىنتايىن ئاز بولۇپ، تەخمىنەن ھەر سەككىز مىليون بوۋاقنىڭ ئىچىدە بىرى بۇ خىل كېسەلگە گىرىپتار بولىدىكەن. گەرچە بالدۇر قېرىش كېسىلى بىر خىل ئىرسىي كېسەللىك بولسىمۇ، ئەمما جەمەتتە ئىرسىيەت قېلىش ئېھتىماللىقى ئىنتايىن تۆۋەن بولىدىكەن.