2 – ئاينىڭ 6 – كۈنى، قازاقىستان زوڭتوڭى نەزەربايوف دۆلەت نامىنى ئۆزگەرتىش توغرىسىدا تەكلىپ بەردى، بۇ تەكلىپ شۇ ھامان شۇ يەردىكى تاراتقۇلار قاتتىق كۆڭۈل بۆلۈدىغان مەسىلىگە ئايلىنىپ قالدى.
6 – چىسلا، نەزەربايوف غەربتىكى ئاتىرائۇ شەھىرىنى كۆزدىن كەچۈرۈشكە بېرىپ، شۇ يەردىكى ئاۋام ۋەكىللىرى بىلەن يۈز كۆرۈشكەندە، نەزەربايوف مۇنداق دەپ ئوتتۇرىغا قويدى، «ھازىرقى قازاقىستان دېگەن نامنى ‹قازاق ئېلى› دەپ ئۆزگەرتىشنى ئويلىشىپ كۆرۈش كېرەكمۇ قانداق؟»
ئۇ مۇنداق دېدى، «ھازىر ئېلىمىزنىڭ نامى ئوتتۇرا ئاسىيادىكى باشقا نۇرغۇن دۆلەتلەرگە ئوخشاشلا، ئاخىرى ‹ستان› بىلەن ئاخىرلىشىدۇ. بىراق ئىككى مىليوندىن كۆپرەك نوپۇسى بار موڭغۇل دۆلىتىنىڭ نامىدا ‹ستان› دېگەن سۆز يوق. شۇڭا چەتئەللىكلەر موڭغۇل دۆلىتىگە بەكرەك قىزىقىدۇ. شۇڭا، بىز چوقۇم دۆلەت نامىنى ‹قازاق ئېلى› دەپ ئۆزگەرتىشنى ئويلىشىپ كۆرۈشىمىز كېرەك».
بۇ تەكلىپنىڭ ئاخىرقى نەتىجىسىگە قارىتا، نەزەربايوف مۇنداق دېدى، «بىز چوقۇم ئاۋۋال خەلق بىلەن بىرگە بۇ مەسىلىنى ئوبدان پىكىرلىشىشىمىز كېرەك». شۇنىڭ بىلەن بىر ۋاقىتتا، نەزەربايوف مىللەتلەرنىڭ كۆپ خىللىقى قازاقىستاننىڭ ئەۋزەللىكى، پەقەت مىللەتلەر ئىتتىپاق، دۆلەت بىرلىككە كەلگەن ئاساستىلا ئاندىن دۆلەتنى تەرەققىي قىلدۇرۇش ۋەزىپىسىنى ئىشقا ئاشۇرغىلى بولىدۇ، دېدى.
قازاقىستان زوڭتوڭىنىڭ دۆلەت نامىنى «قازاق ئېلى» دەپ ئۆزگەرتىش توغرىسىدا تەكلىپ بېرىشىدىكى سەۋەب، «ئېلى» دېگەن گەپ قازاقچىدا «دۆلەت، ۋەتەن، يۇرت» دېگەن مەنىلەرنى بىلدۈرىدۇ. شۇڭا «قازاق ئېلى» دېگەن سۆزنىڭ مەنىسى «قازاقلار دۆلىتى» دېگەن مەنىنى كۆرسىتىدۇ. ھازىر قازاقىستان زوڭتوڭىنىڭ بۇ يېڭى تەكلىپى جامائەتچىلىكنىڭ دىققىتىنى تارتتى، بولۇپمۇ ئاتىرائۇ شەھىرىدىكى يەرلىكلەر زوڭتوڭنىڭ بۇ تەكلىپىنى راسا ماختاشتى.
بىراق شۇ يەردىكى خېلى كۆپ تاراتقۇلار مۇنداق دېيىشتى، نەزەربايوفنىڭ تەكلىپى قازاقىستاننى ئوتتۇرا ئاسىيادىكى بەش دۆلەتنىڭ ئىچىدە ئۆز ئالدىغا ئايرىلىپ، كۆزگە بەكرەك چېلىقىش پۇرسىتى بىلەن تەمىنلەپلا قالماستىن بەلكى يەنە بۇ خىل «باشقىلارغا زادى ئوخشىمايدىغان» ئالاھىدىلىك قازاقىستانغا نۇرغۇن نەپ ئېلىپ كېلىپ، چەتئەلدىكى نۇرغۇن مەبلەغ سالغۇچىلارنىڭ قازاقىستانغا بولغان قىزىقىشىنى تېخىمۇ قوزغايدۇ.