يەر شارى خەۋەر تورى 8-ماي خەۋىرى؛ لەگلەك تورى تەرجىمىسى: نىپالدا يەر تەۋرەشتىن كېيىن تەكشۈرۈش ئارقىلىق ئۆلگەنلەرنىڭ سانى 8 مىڭ ئەتراپىدا بولۇپ، ئۆي-ماكانلىرىدىن ئايرىلىپ قالغان 650 مىڭ كىشى باشقا يەرلەرگە كۆچۈشكە مەجبۇر بولماقتا. نىپال تارىخىدا ئىككىنجى قېتىم ئ‍ەڭ ئېغىر يەر تەۋرەشكە دۇچ كەلدى، نىپالدىكى خەلقئارا ياردەم ئورگانلىرىنىڭ ئىزدەش-قۇتقۇزۇش خىزمىتى داۋاملاشماقتا. نىپالدىكى قىزىل كېرسىت جەمئىيتى ۋە نىپال ھۆكۈمىتىنىڭ يېقىندا ئېلان قىلغان ئۇچۇرىدا، «يەر تەۋرەشتە ئۆلگەنلەرنىڭ سانى 7 مىڭ 696 كىشىگە يەتكەن، يارىلانغانلارنىڭ سانى بولسا 16 مىڭ 727 گە يەتتى. يەر تەۋرەشتىن كېيىن يۇقاپ كەتكەن كىشىلەرنىڭ سانى بولسا 452 نەپەر. يەر تەۋرەشتە ئۆي-ماكانلىرىدىن ئايرىلىپ باشقا يەرلەرگە كۆچۈشكە مەجبۇر بولغانلارنىڭ سانى 649 مىڭ 798 كىشى. يەر تەۋرەشتە 502 مىڭ 708 ئۆي تامامەن ۋەيران بولغان، نىپال مىقياسىدا يەر تەۋرەشنىڭ تەسىرىگە ئۇچرىغانلارنىڭ سانى 1 مىليۇن 91 مىڭدىن ئارتۇق» دەپ ئېلان قىلىندى. يەر تەۋرەشنىڭ تەسىرىگە ھىمالايا تېغىمۇ ئۇچرىغان بولۇپ، تاغ ئەتراپىدىكى بىر قىسىم يېزىلاردىكى ئۆيلەر ۋەيران بولغان، نىپالنىڭ جۇڭگو چېگرىسىدىكى سىندىپالچوك رايۇنىدا 2 مىڭ 939 كىشى ھاياتىدىن ئايرىلغان، 1 مىڭ 824 كىشى يارىلانغان.
پايتەخت كاتماندۇ ۋە 20 كىلومىتىر يراقلىقتىكى باكزاپۇر رايۇنىدا قۇتقۇزۇش خادىملىرى يىتەرسىز بولغاچقا يەرلىك خەلقلەر قۇتقۇزۇش خىزمىتىنى داۋاملاشتۇرماقتا. ئۆيلىرى تامامەن ۋەيران بولغان بىر قىسىم ئائىلىلەر ئىبادەتخانىلاردا پاناھلانماقتا. نىپالنىڭ بىر قىسىم رايۇنلىرىدا ياردەم خىزمىتى تېخىچە يىتىپ بارمىغان بولۇپ ، بولۇپمۇ ھىمالايا تېغى ئەتراپىدىكى يېزىلاردا ياشاۋاتقان خەلقلەر ياردەم كۈتىۋاتىدۇ.