كەتمەن ساداسى

版权声明：转载时请以超链接形式标明文章原始出处和作者信息及本声明
logs/87939478.html

مەتبۇئاتلاردا ئىلان قىلىنغان شېئىرلىرىم(8)


ساداقەتجان ھاجى


دوستۇڭ كىم؟

يالغۇزلۇققا چىدىمايدۇ بۇ يۈرەك.
ھەممىمىزنىڭ دىلىدا بار بىر تىلەك.
شۇ تىلەككە يېتىش ئۈچۈن دوست كىرەك.
كەل يېنىمغا، مەن سېنىڭ چىن دوستۇڭمەن.
 
تەنھالىقتا تەستۇر تاڭنى ئاتقۇزماق،
ئاسان ئەمەس دەرتنى دىلغا پاتقۇزماق.
مەقسەت بولسا دىلنى ئارام تاپقۇزماق،
كەل يېنىمغا، مەن سېنىڭ چىن دوستۇڭمەن.
 
ئارمانلىرىڭ چېچەكلەيدۇ دوست تۇتساڭ.
سېنى ئالغا يېتەكلەيدۇ دوست تۇتساڭ.
بۇ سۆزۈمنىڭ مەنىسىنى سەن ئۇقساڭ،
كەل يېنىمغا، مەن سېنىڭ چىن دوستۇڭمەن.

دوستلۇق بىزنى ئىگە قىلار قاناتقا.
دوستلۇق بىزنى يەتكۈزىدۇ مۇراتقا.
سۆيگۈمىزنى ئاشۇرىدۇ ھاياتقا.
كەل يېنىمغا، مەن سېنىڭ چىن دوستۇڭمەن.
٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭
(1994-يىل 5-ئۆكتەبىر. «قەشقەر گېزىتى» 1995-يىل 16-دىكابىر)
٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭


گۈل كېلۇر

گۈل ئېچىلىپ گۈلىستاندا گۈل كەلدى يار. گۈل كېلۇر.
زىمىستاندەك قەلبىمىزنى ئەيلەپ باھار گۈل كېلۇر.
چۆللەر بولدى چىمەنزارەي، ئويناڭ خۇشال كۈلۈپ يارەي.
بۇ زىمىندا بىزنىڭمۇ ھەم بەختىمىز بار. گۈل كېلۇر.
نۇرلار ھەريان چېچىلار ھەم. نۇرغا تولدى كېچىلەر ھەم.
نۇر قوينىدا غۇنچە-غۇنچە گۈل ئېچىلار. گۈل كېلۇر.
سۇلار ئاقار شىر-شىر قىلىپ، كۆڭۈللەرگە ئارام بېرىپ.
سۇغا قېنىپ بولدى زېمىن گۈل-لالىزار. گۈل كېلۇر.
قۇشلار ئۇچار ناۋا قىلىپ، غەمكىن دىلغا داۋا قىلىپ.
قۇشلار بىلەن بىللە ئۈچۈپ قاتار-قاتار گۈل كېلۇر.
تاغ-دالانى بويلاپ كېلىپ، سۆيدى شامال ئويناپ كېلىپ،
بەختىمىزگە تەبىئەتتىن پۈتۈپ تۇمار گۈل كېلۇر.
تاغدا-باغدا، ئېگىز-پەستە، ئېچىلغانچە دەستە-دەستە،
ۋىسالىغا زوق-ھەۋەستە قىلىپ خۇمار گۈل كېلۇر.
ئىشقى بىدار يار-جانانلار، ئۈمىدلىك بول دوست-يارانلار.
باغ بولىدۇ تاغ-داۋانلار. بىز ئىنتىزار گۈل كېلۇر.
٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭
(1994-يىل 8-ئۆكتەبىر. «قەشقەر گېزىتى» 1995-يىل 7-يانۋار)
٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭


ھەر ئىككىمىز غەمكىن يوپۇرماق

نىمىگە ئامراقسەن، نىمىدىن بىزار؟
نىمىگە ئۆچ بولدۇڭ ۋە نىمىگە زار؟
ئېيتمىساڭ بىلمەسمەن، بىلمىسەم ئەگەر،
قانداقمۇ بولىمەن ساڭا غەمگۇزار؟

بەلكىم يامغۇر بولۇپ سەن تۆكۈلگەنسەن.
بەلكىم يامغۇر سىڭگەن زىمىندۇر قەلبىڭ.
بەلكىم شۇ زىمىندا گۈل بوپ ئۈنگەنسەن.
بەلكىم بىر كۈن گۈلدەك ئېچىلار ۋەسلىڭ.

بەلكىم ئارامىڭنى بۇزار ئويغاق تاڭ.
بەلكىم ئويغا سالار سېنى جىمجىت تۈن.
بەلكىم سېنى سۆيۈپ يۈرگىنىم بىلەن،
سۆيگۈ ئەرزىمەستۇر بەلكىم سەن ئۈچۈن.

بەلكىم يوقتۇر سېنىڭ ئامراق نەرسەڭمۇ.
بەلكىم ئۆچ ئېلىشنى قالغانسەن ئۇنتۇپ.
بەلكىم چىن كۆڭلۈڭدىن كەتمەسسەن خالاپ،
بەلكىم ياشاي دىسەم غەمغۇزار بولۇپ.

بەلكىم ھىچنىمىنى ئېيتىپ يۈرمەسسەن.
بەلكىم شۇنچە تەستۇر سىرنى يوشۇرماق.
بەلكىم ھىچنىمىنى مەنمۇ بىلمەسمەن.
بەلكىم ھەر ئىككىمىز غەمكىن يوپۇرماق ...
٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭
(1995-يىل 26-ئاپرىل. «تارىم» 1996-يىللىق 10-سان)
٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭


يۈرەكتىكى يارقىن تىلەكلەر

دوستۇم ياخشى كۆڭلۈمدىن ساڭا ئامەت تىلەيمەن.
ئۆزۈم جاپا چەكسەممۇ ساڭا راھەت تىلەيمەن.
بەختىڭ ئۈچۈن باش ئەگمەي ياشىغۇم بار يول ئىزدەپ،
ساڭا مەڭگۈ ئېگىلمەس قەددى-قامەت تىلەيمەن.
قانات بولۇپ قايرىلماس پەرۋازىڭغا ھەر ۋاقىت،
ئارزۇيۇڭغا مۇناسىپ شانۇ-شەۋكەت تىلەيمەن.
گۈللەر ئۈنسۇن يولۇڭدا، بەختىڭ بولسۇن قولۇڭدا.
ئۆمۈرۋايەت غولىماس تاجۇ-دۆلەت تىلەيمەن.
ئامەت دىگەن ئىنسانغا يەتتە نۆۋەت كىلەرمىش.
لىكىن ساڭا تەڭرىمدىن يەتمىش نۆۋەت تىلەيمەن.
٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭
(1995-يىل 12-ماي. «تۇرپان گېزىتى» 1997-يىل 6-ئاينىڭ 20-كۈنى)
٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭


كۆرۈنگەن تاغ يىراق ئەمەس

يولۇمدا داۋانلار بار، توزاق ئەمەس.
ئالدىمدا جەننىتىم بار، دوزاق ئەمەس.
جەننەتنى ئارزۇ قىلىپ ياشاپ كەلدىم،
كۆزۈمگە كۆرۈنگەن تاغ ئۇزاق ئەمەس.

بېغىمدا گۈللىرىم بار غۇنچە-غۇنچە.
بۇلدۇقلار بۇلاقتا سۇ چېچىپ ئۈنچە.
جەننەتنىڭ ۋىسالىغا يەتمەك ئۈچۈن
ئىشەنچىم ئۇرغۇپ تۇرار مېنىڭ شۇنچە.
٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭
(1995-يىل 24-ئاۋغۇست. «شىنجاڭ گېزىتى» 1997-يىل 6-ئاينىڭ 7-كۈنى)
٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭


ئويلىرىم

سۈكۈت ئىچىدە ئويغا پاتىمەن.
خىيال سۈرىمەن بۈيۈك تۇيغۇدا.
ئويلىرىم ئىچىدىن بەخت تاپىمەن.
گۈزەل چۈش كۆرىمەن شىرىن تۇيغۇدا.
 
تۇيۇلار دەرتلىرىم تۈتۈندەك ماڭا.
تۇيۇلار ئاسمىنىم نۇرغا تولغاندەك.
تۇيۇلار شاتلىقىم پۇتۇندەك ماڭا.
تۇيۇلار ئىستىقبال كۈتۈپ تۇرغاندەك.
 
گۈللىرىم ئېچىلىپ تۇرار بېغىمدا.
كۈيلىرىم دالىلار قوينىدا ئۇچار.
قەلەمنى قولۇمغا ئالغان چېغىمدا،
ئويلىرىم بەختنىڭ ۋەسلىنى قۇچار.
٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭
(1995-يىل 25-ئاۋغۇست. «قەشقەر گېزىتى» 1995-يىل 16-دىكابىر)
٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭


نادان مەن

سەن كۈيلىمە بۇ تۇرقۇمنى شائىرىم.
كۈن ئەمەسمەن، نۇر چېچىشنى بىلمەيمەن.
بۇ ھاياتتا كۆڭلۈم تېخى بەك يېرىم.
گۈل ئەمەسمەن، ئېچىلىشنى بىلمەيمەن.

ئۇلۇغلارنىڭ ئالدىدا كۆپ نادان مەن.
چۈنكى روھىم ھىكمەتلەردىن يىراقتا.
سەن كۈيلىسەڭ مەيلى ئىدى شائىرىم،
پىلىك بولۇپ يانغان بولسام چىراقتا؟
٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭
(1995-يىل 28-ئاۋغۇست. «ئىشچىلار ۋاقىت گېزىتى» (2000-يىل 14-ئۆكتەبىر)
٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭


ۋاقىت …

ۋاقت ئاقىدۇ دەريادەك،
ئاقىدۇ توختىماي.
ئۇچىدۇ ئۇ قۇشتەك،
ئۇچىدۇ تىنماي.
سەن بىلەن بىز ئۇخلىغان بىلەن،
ۋاقت ياشايدۇ ئۇخلىماي.
 
ۋاقت ئۆزگەرتىدۇ ھەممىنى.
قايغۇنى شاتلىققا.
ئۆلۈمنى ھاياتلىققا.
ۋاقت يەتكۈزىدۇ بىزنى
ئارزۇ ۋەسلىگە،
باھار پەسلىگە.
 
ۋاقت ئاقىدۇ.
ۋاقت ئۇچىدۇ.
ۋاقت ئۇخلىمايدۇ سەن بىلەن بىزدەك.
ۋاقت ئۆزگەرتىدۇ ھەممىنى
ئارزۇيىمىزدەك ...
٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭
(1995-يىل 31-ئاۋغۇست. «تەڭرىتاغ» 1996-يىل 5-سان)
٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭


قار ياغدى بۇ يىلمۇ، سەن يوق يېنىمدا

قار ياغدى بۇ يىلمۇ، سەن يوق يېنىمدا.
پۈركەندىم شۇ قەدەر ئاپئاق چېچەككە.
ئۈن-تىنسىز ئايلىنىپ يۈردۈم بېغىمدا،
قار بولۇپ ياغسۇن دەپ سېنى يۈرەككە.
 
ئېسىمدىن چىقمىدىڭ يالغۇزلۇقۇمدا،
باھاردا گۈل بولۇپ، قىشتا قار بولۇپ.
قار ياغدى، سۆيگۈگە چۈمدى كەڭ دالا،
دىلدىكى نەپرىتىم كەتتى ئۇنتۇلۇپ.
٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭
(1995-يىلى 15-دىكابىر. «تەڭرىتاغ» 1996-يىل 5-سان)
٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭


كۆڭلۈم سەندىدۇر

ئەي گۈزەل، شۇدەم مېنىڭ كۆڭلۈم-خىيالىم سەندەدۇر.
سەندە بارچە شاد-خۇراملىق، بارچە قايغۇ مەندەدۇر.
گۈلگە ئوخشايدۇ بويۇڭ، بەكمۇ يېقىملىقتۇر خۇيۇڭ،
شۇڭا دەيمەن ھەر ۋاقىت: بەختىم مېنىڭ گۈلشەندەدۇر.
يۈزلىرىڭدىن نۇر تارايدۇ كۆزلىرىڭدىن كۈن چىقىپ،
سۆيگۈ ئاپتابىڭغا دەردمەن بۇ دىلىم پەيۋەندەدۇر.
رازىمەن ئەيلەپ ۋاپا چەكسەم جاپا ئىشقىڭ ئارا،
چۈنكى مېنىڭ بۇ ھاياتىم سەن ئۈچۈن بەخشەندەدۇر.
قىلسىمۇ باغرىمنى قان ۋەسلىڭگە زارمەن ھەر قاچان،
يانمىغايمەن بۇ يولۇمدىن تاكى جانىم تەندەدۇر.
مەن ئەمەس ئىشقى بىدار قويسام سېنى ئارماندا يار،
بولمىسام سادىق ساڭا، نامىم مېنىڭ شەرمەندەدۇر.
٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭
(1996-يىل 26-مارت. «قەشقەر ئەدەبىياتى» 1998-يىللىق 4-سان)
٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭


جىگدە دەرىخى

كۈمۈش ياپرىقىڭدا قۇياش جىلۋىسى،
خۇشبۇي چېچىكىڭدە باھارنىڭ ھىدى.
تۇتاشتۇر يىلتىزىڭ يىلتىزلىرىمغا
ئەي سۆيۈملۈك جىگدە دەرىخى.

ئالتۇن تۆكۈلىدۇ قوينۇمغا سەندىن،
گۈلشەندۇر سەن بىلەن چۆل-باياۋىنىم.
گۈلخان لاۋۇلدايدۇ كۆيگەن شېخىڭدىن
ئەي جىگدە دەرىخى-ئەزىز ۋەتىنىم!
٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭
(1996-يىل 4-ئاپرىل. «شىنجاڭ گېزىتى» 1997-يىل 23-ئاۋغۇست)
٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭


ئۆزۈمگە بېغىشلىما

قەلبىمدە ئەلگە باردۇر ساداقىتىم،
ئەل بىلەن بولار مېنىڭ پاراغىتىم.
ياشلىقىم چاپچىپ تۇرار تۇلپار كەبى،
دىلىمدا دولقۇنلايدۇ جاسارىتىم.
ئۆگەندىم ئەلگە ئۈمىد بولۇش ئۈچۈن،
ئەل ئۈچۈن بەخشەندىدۇر پاراسىتىم.
ئىناقلىق-مېنىڭ بۈيۈك شۇئارىمدۇر،
ھىچكىمگە يوقتۇر دىلدا ئاداۋىتىم.
تۈگەتسەم دەيمەن ئەلنىڭ ئىللىتىنى،
بىر كۈندە بولسا ئەگەر كارامىتىم.
ئارمىنىم ئەلنى ئۇلۇغ ئەل قىلىشتۇر،
يازغىنىم ئەلگە قىلغان دالالىتىم.
ئەرزىسە ئەلگە دىلدىن خۇش بولارمەن،
ئىجادتىن ئالغان ھوسۇل-دارامىتىم.
شېئىردىن ئۆزگە ئارتۇق بايلىقىم يوق،
شېئىرىم ئەۋلاتلارغا ئامانىتىم.
بىدارمەن ئەل ئىشقىدا كېچە-كۈندۈز،
قەلبىمدە ئەلگە باردۇر ساداقىتىم.
٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭
(1996-يىل 10-ئاپرېل. «قەشقەر ئەدەبىياتى» 1997-يىللىق 5-سان)
٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭


ئۈمىدىمنى ئۈزگۈم يوق

«قىزىل گۈلنى دىمىسەم، غۇنچىسىنى ئۈزگۈم يوق»
ساڭا بېرەي دىمىسەم دەستە قىلىپ تۈزگۈم يوق.
گۈلمۇ بولار ۋە لېكىن سەندەك ئېسىل گۈل بولماس،
سەن بولمىغان باغ ئارا سەيلە قىلىپ يۈرگۈم يوق.
ھېچبىر گۈلنىڭ غۇنچىسى لېۋىڭ كەبى ئېچىلماس،
شۇڭا سەندىن باشقىنى ئۆمۈرۋايەت سۆيگۈم يوق.
مۇھەببەتلىك پۇرىقىڭ ئەسىر قىلدى دىلىمنى،
ئىشەنچىم بار دىمىسەم، ئوتلىرىڭدا كۆيگۈم يوق.
تىكەنلىرىڭ سانچىلىپ باغرىمنى قان قىلسىمۇ،
ئىشقىم بىدار، ۋەسلىڭدىن ئۈمىدىمنى ئۈزگۈم يوق.
٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭
(1996-يىل 10-ئاپرېل. «قەشقەر ئەدەبىياتى» 1998-يىل 4-سان)
٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭


ئۈنۈمدىن تونارسەنمۇ؟

«ناخشا ئېيتىپ ساز چالسام ئۈنۈمدىن تونارسەنمۇ؟»
تورغاي بولۇپ سازىمنىڭ تارىغا قونارسەنممۇ؟
ئاي پارلىغان ئاخشامدا شەرەت قىلسام ناخشامدا،
سۈزۈك بۇلاق بويىغا چىققىلى ئۇنارسەنمۇ؟
ئىشقىڭدا مەن خار بولدۇم، ۋىسالىڭغا زار بولدۇم،
مۇھەببەت شارابىدىن بىر قەدەھ سۇنارسەنمۇ؟
ياكى مۇپتىلا ئەيلەپ، بېشىمغا مىڭ بالا ئەيلەپ،
ئۆزۈڭنى تۇتىيا ئەيلەپ نائۈمىد قويارسەنمۇ؟
جېنىمنى خاراب ئەيلەپ، قېنىمنى شاراب ئەيلەپ
پىيالەڭنى تولدۇرسام، سەن ئىچىپ تويارسەنمۇ؟
ھىجرىڭدە گادا بولسام، دەردىڭدە ئادا بولسام،
دەردلىك بىر سادا بولسام، سەن ئاڭلاپ قانارسەنمۇ؟
ئىشقىڭدا بىدارىڭمەن، ئاشىقىي دىدارىڭمەن.
ئىشق ئوتىدا سەنمۇ ھەم بىر كۆيۈپ يانارسەنمۇ؟
٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭
(1996-يىل 12-ئاپرېل. «قەشقەر ئەدەبىياتى» 1998-يىل 4-سان)
٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭


جىمى ئالەمنى تەڭ كۆرسەم

«ئاسمىنىڭدا ئاي بولۇپ جىمى ئالەمنى تەڭ كۆرسەم»
جامالىڭغا كۆز تاشلاپ گۈزەللىك پەيزىنى سۈرسەم.
يۇلتۇزۇڭ بولۇپ يانسام، مۇھەببەت نۇرىنى چاچسام،
ياندۇرۇپ دىلىڭدا ئوت يۈرەك-باغرىڭنى كۆيدۈرسەم.
نۇرغا تولدۇرۇپ تۈننى كېچەڭنى ئايلىسەم ئايدىڭ،
ئاي نۇرى ئاراسىدا سۇنۇق كۆڭلۈڭنى كۈلدۈرسەم.
چاچسا خۇشپۇراق گۈللەر، بۇلاق ياڭراتسا ھەم كۈيلەر،
سەن بىلەن كۈلۈپ ئويناپ ئاشۇ گۈللەر ئارا يۈرسەم.
كۆكتە چاقنىغان يۇلتۇز جاھاننى ئەيلىسە كۈندۈز،
كۈن نۇرى ئارا سېنى ۋىسال پەيزىگە چۈمدۈرسەم.
قويمىسام سېنى داغدا، ئېچىلسا گۈللىرىڭ باغدا،
رازىمەن ئەشۇ چاغدا قۇياشنىڭ قوينىدا ئۆلسەم.
٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭
(1996-يىل 12-ئاپرېل. «قەشقەر ئەدەبىياتى» 1998-يىل 4-سان)
٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭


ئاي كەلدى

قىلىپ مەستانە كۆزلەرنى تولۇپ ھۆسنىگە ئاي كەلدى.
گويا گۈلدەك قىلىپ جىلۋە جانانىم گۈلچىراي كەلدى.
يۈرەككە ئوت سېلىپ شەھلا كۆزىنىڭ سېھرىسى بىرلە،
قارا كىرپىكلىرى پەيكان، قارا قاشلارى ياي كەلدى.
تەبەسسۇم پارلىتىپ چېھرى، كۆڭۈلنى خۇش قىلىپ مېھرى
مۇھەببەت ئويغۇتۇپ دىلدا ئەدەب-ئەخلاققا باي كەلدى.
لېۋى خەندە قىلىپ شۇدەم دىلىمدا قويمىدى ھىچ غەم،
قېنىپ ئىچمەككە تەشنا دىل ۋىسال جامىدا چاي كەلدى.
خالاس بول ئەمدى سەن ئىشقى بىدار غەم-قايغۇ، ھىجراندىن،
كېچەڭنى تولدۇرۇپ نۇرغا تولۇپ ھۆسنىگە ئاي كەلدى.
٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭
(1996-يىل 13-ئاپرېل. «قەشقەر ئەدەبىياتى» 1998-يىل 4-سان)
٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭


ئىشق بالاسى

گۈل تۈۋىدە گۈلنى كۆردۈم، گۈلگە رەڭداش جۇلاسى.
مەھلىيا قىلدى كۆزۈمنى كۆزلىرىنىڭ خۇماسى.
كىرپىكى گويا بولۇپ ئوق تەگدى باغرىمغا مېنىڭ،
باغلىۋالدى بۇ كۆڭۈلنى بوينىدىكى تۇماسى.
پارلىدى ئايدەك يۈزى يۇلتۇز بولۇپ چاقناپ كۆزى،
تۈننى ھەيدەپ قوغلىۋەتتى ھۆسنىدىكى زىياسى.
قامىتى گۈل بەرگىدەك تىترەپ تۇرۇپتۇ ناز بىلەن،
مىسلى غۇنچە ياپرىقىدەك چاقنىتىپ نۇر لىباسى.
خۇشپۇراققا تولدى ئالەم گۈل يۈزى چاچقاچ ئىپار،
لەۋلىرىدىن كۈي تۆكۈلدى، ياڭرىدى خۇشناۋاسى.
مەن قاچان كۆردۈم ئاشۇ گۈليۇزنى گۈلنىڭ تۈۋىدە،
ئاشۇ كۈندىن بىرى بار كۆڭلۈمدە بىر ئىشق بالاسى.
نە قىلاي مەن بۇ بالاغا؟ نەگە باراي داۋاغا؟
بارمىدۇر مەن بىناۋاغا ئۇ گۈزەلنىڭ ۋاپاسى؟
ئىشقى بىدار بول ئاگاھ، سەن ئۇرما غەمدە تولا ئاھ.
ئىزدىسەڭ گەر ۋەسلىنى باردۇر ئۇنىڭ كۆپ جاپاسى.
٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭
(1996-يىل 13-ئاپرېل. «قەشقەر ئەدەبىياتى» 1998-يىل 4-سان)
٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭
(بۇ شېئىرلىرىمنى كۆچۈرۈپ باشقا توربىكەتلەرگە يوللىسىڭىز بولمايدۇ)
٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭