كەتمەن ساداسى

版权声明：转载时请以超链接形式标明文章原始出处和作者信息及本声明
logs/87938130.html

مەتبۇئاتلاردا ئىلان قىلىنغان شېئىرلىرىم(7)

ساداقەتجان ھاجى


ئۇيغۇر تىلىم

دۇنياغا ئېچىلغاندا مېنىڭ كۆزۈم،
ئېيتىلغان سېنىڭ بىلەن تۇنجى سۆزۈم.
ئەي مېنىڭ ئانا تىلىم-ئۇيغۇر تىلىم
سەن بىلەن يورۇق بولۇپ كەلدى يۈزۈم.

سەن بىلەن قىلدىم بايان پىكرىمنى مەن،
سىڭدۈرۈپ پىكرىمگە دىل مىھرىمنى مەن.
قاناتقا ئىگە قىلدىم سۇنمايدىغان،
سەن بىلەن تەپەككۇرۇم-زېھنىمنى مەن.

سەن بىلەن سىرلىرىمنى ساقلاپ كەلدىم.
سەن بىلەن ھەقىقەتنى ياقلاپ كەلدىم.
سەن بىلەن ئىجات قىلىپ ئاز بولسىمۇ،
خەلقىمنىڭ ئۈمىدىنى ئاقلاپ كەلدىم.

سەندىدۇر ئەجدادلارنىڭ يۈرەك سۆزى.
سەندىدۇر بەختىمىزنىڭ بىر يۇلتۇزى.
بەختىمنى تىلەر ئىدى كىچىكىمدە،
سەن بىلەن ئەللەي ئېيتىپ ئانام ئۆزى.

سەنسىز مەن ئېيتالمايمەن ناخشىلارنى.
سەنسىز خۇش قىلالمايمەن ياخشىلارنى.
خەلقىمگە چۈشەندۈرۈپ ئادالەتنى،
سەنسىز پاش ئېتەلمەيمەن ۋەھشىلەرنى.

سەنسىز مەن ئۇيغۇر بولۇپ يۈرەلمەيمەن.
جەننەتكە ئۇيغۇر بولۇپ كىرەلمەيمەن.
سەن ماڭا ئاتا-ئانام ئامانىتى.
يوقاتسام سېنى جاۋاپ بېرەلمەيمەن.
٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭
(1992-يىل 8-مارت. «شىنجاڭ مائارىپى» ژورنىلى 1997-يىللىق 10-سان)
٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭


كامال تاپ

نىمىكى تاپمىغىن ھالال تاپقايسەن.
ھالالدىن يول تېپىپ كامال تاپقايسەن.
ھارامدىن ھالۋا يەپ كەچۈرسەڭ ھايات
ئاخىرى بىر كۈنى زاۋال تاپقايسەن.

نىمىكى تاپمىغىن ئەجرىڭ بىلەن تاپ.
يامانغا يېلىنما، قەدرىڭ بىلەن تاپ.
ياخشىنى پۇتلىما يول ئېچىش ئۈچۈن،
سەمىمىي ۋىجدانلىق قەلبىڭ بىلەن تاپ.

ھالالدىن تاپساڭلا رۇخسەتتۇر ساڭا.
كۆپ تاپساڭ كۆپ كىشى ئۈلپەتتۇر ساڭا.
قولۇڭدا بولمىسا قەدرىڭمۇ بولماس،
يوقسۇزلۇق ئەڭ ئېغىر كۈلپەتتۇر ساڭا.
٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭
(1992-يىل 8-ئاۋغۇست. «شىنجاڭ گېزىتى» 1997-يىل 6-ئاينىڭ 7-كۈنى)
٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭


ئانا، ئېيتىپ بەرگىن بىر چۆچەك

ئانا، ئېيتىپ بەرگىن بىر چۆچەك.
بۇرۇنلاردا نىمىلەر بولغان؟
بەلكىم بىزنىڭ قۇملۇقلىرىمىز
نۇرغۇن-نۇرغۇن گۈللەرگە تولغان...

ئانا، ئېيتىپ بەرگىن بىر چۆچەك.
بوۋام ئەلگە قانداق تونۇلغان؟
ئېغىر كۈنگە قالغاندا ۋەتەن،
بەلكىم ئۇ بىر قەھرىمان بولغان...

ئانا، ئېيتىپ بەرگىن بىر چۆچەك.
راست بارمىتى ۋەھشى يالماۋۇز؟
ئانا، ئاشۇ يالماۋۇز بىلەن
ئېلىشقانمۇ چىنتۆمۈر يالغۇز؟...

ئانا، ئېيتىپ بەرگىن بىر چۆچەك.
ئاڭلىۋالاي ھەممىنى تولۇق.
بۇنداق ئېسىل چۆچەكلەر تۇرسا،
مېنىڭ ھەرگىز ئۇخلاپ قالغۇم يوق ...
٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭
(1992-يىل 20-ئاۋغۇست. «ئىشچىلار ۋاقىت گېزىتى» 2000-يىل 29-نويابىر)
٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭


ۋاپادارلىق ۋەدىسى

سېنى كۆرۈپ بىر ئوت ياندى يۈرەكتە.
ئىشقىڭ دىلغا ئورناشتى بۇ كۆيەكتە.
شېئىر قايناپ چىقتى دەردلىك دىلىمدىن.
مۇھەببەتنىڭ كۈچى دىگەن بۆلەكتە!

پىراقىڭدا تاشتەك باغرىم ئېزىلدى.
ئەمدى مېنىڭ ئاشىقلىقىم سېزىلدى.
ئىلھامىمنى دولقۇنلاتتى ئازابىم،
شېئىرلىرىم ساڭا ئاتاپ يېزىلدى.

سېنى ئويلاپ كېچىلىرى ئۇيقۇم يوق.
سېنى خىيال قىلمايدىغان تۇيغۇم يوق.
ۋىسالىڭنى بەرگىن ماڭا ئەي جانان،
يۈرىكىمنى ھەرگىز دەردتە قويغۇم يوق.

مەن بىلىمەن، مۇھەببەتتە جاپا بار.
سانسىز غەيۋەت، تالاي تەنە-تاپا بار.
لىكىن ئىشەن ئىشقىمغا سەن ئەزىزىم،
مەندە ساڭا بىر ئۆمۈرلۈك ۋاپا بار.
٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭
1992-يىلى 22-ئاۋغۇست. «قەشقەر گېزىتى» 1994-يىل 6-فىۋرال)
٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭


ئاشىق سادالىرى
             
(1)
مېنى غەمدە قويۇپ تەڭرىم، نىگارىم كۆڭلىنى شاد قىل.
مېنى خار ئەيلىسەڭ مەيلى، ئۇنىڭ قەددىنى شەمشاد قىل.
مېنى چۆللەردە سەرسان قىل، ئۇنى ئۆز يۇرتىدا خان قىل.
مېنى ئىشقىدا بىدار قىل، ئۇنى ھىجراندىن ئازاد قىل.
(1990-يىل 12-ئىيۇل)

(2)
ئۇيغۇر قىزى ياسىنىپ چىرايلىق جامال ئەتتى.
ئىپار چېچىپ ھۆسنىدىن خۇشپۇراق شامال ئەتتى.
ئوتلۇق ئاھۇ كۆزلىرى ئىشقىمنى قامال ئەتتى.
يۈرىكىمدە ئۈمىدلىك بىر شىرىن خىيال ئەتتى.

(3)
ئەجەپ بىر ئاشىقى شەيدا ئىرۇرمەن ئول پەرىۋەشكە.
ماڭا ئۇيقۇ ھارام بولدى قاراپ ئول يارغا-مەھۋەشكە.
ئۇنىڭ ئىشقى پىراقىدا يېزىپ غەمكىن شېئىرلارنى
بولۇپ ئىشقى بىدار، ئاخىرى ئايلاندىم قەلەمكەشكە.

(4)
ئايدەك ئاپئاق يۈزۈڭگە ئايدەك قارا قاش ئەتتى.
قىزىل گۈلدەك لېۋىڭگە قەننى ئارىلاش ئەتتى.
لېكىن سېنى خۇدايىم يەنە باغرى تاش ئەتتى.
ۋەسلىڭ ئۈچۈن جان بېرىپ كىم مۇرادىغا يەتتى؟

(5)
قارا ئىكەن يارىمنىڭ قاشى بىلەن قاراقى.
قارا قىلدى ئالەمنى يارنىڭ ئىشقى-پىراقى.
ھىجران دەردى سالسىمۇ ئاق كۆڭلۈمگە قارا داغ،
يېنىپ تۇرار قەلبىمدە نۇرلۇق ئۈمىد چىراقى.

(6)
سەندەك بىر بالا بارمۇ؟ مەندەك مۇپتىلا بارمۇ؟
بۇ ئالەمدە ئىزدىسەم دەردىمگە داۋا بارمۇ؟
كۆڭلۈمنى شاد ئەتكىلى بۇلبۇلى ناۋا بارمۇ؟
غەمدىن ئازاد ئەتكىلى سەندەك دىلرەبا بارمۇ؟
(1992-يىل 8-ئاي)

(7)
سېنى بىر مەھلىقا دەرلەر، مېنى بىر مەھلىيا دەرلەر.
سېنى پارلاق زىيا دەرلەر، مېنى ئاددى گىيا دەرلەر.
كوچاڭنى ئايلىنىپ ھەر كۈن ئۆتەرمەن ئاھ ئۇرۇپ يىغلاپ،
ئەگەر ئاھ ئۇرمىسام بىر كۈن، شۇ كۈننى ئەل رىيا دەرلەر.
(1996-يىل 20-ئىيۇل)
٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭
(«ئىشچىلار ۋاقىت گېزىتى» 1996-يىل 14-دېكابىر)
٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭


بۇ جاھان-ئۇزۇن جاھان

كۈل بولار كۆيۈپ ئاخىر كۆمۈر دىگەن.
چىرىيدۇ دات بېسىپ ھەم تۆمۈر دىگەن.
تۈگەيدۇ ياشاپ بولسا ئۆمۈر دىگەن.
بۇ جاھان-ئۇزۇن جاھان، ئۇزۇن جاھان.

گۈزەللىك باقى ئەمەس گۈلگە دىگەن.
ھەمىشە ياراشمايدۇ كۈلكە دىگەن.
ئىلىنار تۇمشۇقىدىن تۈلكە دىگەن.
بۇ جاھان-ئۇزۇن جاھان، ئۇزۇن جاھان.
 
يول دىگەن كەڭمۇ بولار، تارمۇ بولار،
بەزىدە يوقمۇ بولار، بارمۇ بولار،
ئالدىڭدا گۈلمۇ بولار، دارمۇ بولار.
بۇ جاھان-ئۇزۇن جاھان، ئۇزۇن جاھان.
 
شامالدەك ئۇچۇپ تۇرار ئاتاق دىگەن،
ساڭىمۇ كېلىپ قالار تاۋاق دىگەن،
ئىزدىسەڭ تېپىلىدۇ ساۋاق دىگەن.
بۇ جاھان-ئۇزۇن جاھان، ئۇزۇن جاھان.
 
ھەر كويغا كۆڭۈل سېنى باشلاپ تۇرار،
ئاپىرىپ چۆلگە ھەتتا تاشلاپ تۇرار،
ئۈمىدۋار كۆزلىرىڭنى ياشلاپ تۇرار.
بۇ جاھان-ئۇزۇن جاھان، ئۇزۇن جاھان.
 
ئانچىلا يىراق ئەمەس ئاسمان دىگەن،
ياخشىدۇر ئالغا قەدەم باسقان دىگەن،
قاناتسىز بولۇۋەرمەس ئارمان دىگەن.
بۇ جاھان-ئۇزۇن جاھان، ئۇزۇن جاھان.
 
مەڭگۈلۈك ئەمەس ھەرگىز تۆرە بولۇش،
ئۆمىلەپ مېڭىش ياكى ئۆرە بولۇش.
خۇيۇڭدىن قوي بولۇش يا بۆرە بولۇش.
بۇ جاھان ئۇزۇن-ئۇزۇن جاھان، ئۇزۇن جاھان.
 
بۈگۈنگە ئوخشىمايدۇ ئەتە دىگەن.
يۆتكىلىپ تۇرار سازدا پەدە دىگەن.
ئالدىڭدا پەيدا بولار... نەدە دىگەن.
بۇ جاھان-ئۇزۇن جاھان، ئۇزۇن جاھان.
 
يامانلار ياخشىلارنى قەستلەپ تۇرار.
قىممەت ئۇ، ئۆرلەپ تۇرار، پەسلەپ تۇرار.
ئەۋلاتلار ياخشىلارنى ئەسلەپ تۇرار.
بۇ جاھان-ئۇزۇن جاھان، ئۇزۇن جاھان.
 
ھەر ۋاقىت نىسىپ بولماس نەپمۇ ماڭا،
ئېيتساملا شېئىر بولماس گەپمۇ ماڭا،
جاي بېرەر ئەل قاتارى سەپمۇ ماڭا.
بۇ جاھان-ئۇزۇن جاھان، ئۇزۇن جاھان.
٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭
(1992-يىل 8-ئاي. «قەشقەر ئەدەبىياتى» 1993-يىللىق 4-سان)
٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭


يەركەندە بىر دىلرابا كۆردۈم

كېلىپ يەركەن دىيارىغا گۈزەل بىر دىلرابا كۆردۈم.
نازاكەتلىك بويىنى رەڭمۇرەڭ گۈللەر ئارا كۆردۈم.
ئاماننىسا خېنىم ئىسمى، مىسالى تاش گۈزەل جىسمى،
لېكىن روھى ئۇنىڭ قۇشتۇر، كۆيۈپ ئۆچمەس لاۋا كۆردۈم.
ئاجايىپ ئىشتىياق بىرلە ساتار چالمىش مۇقام توۋلاپ،
مۇقاملار سېھرىدىن قاخشال ۋۇجۇدۇمغا داۋا كۆردۈم.
تۇرۇپتۇ بەرق ئۇرۇپ گۈللەر بولۇپ كۈي ئەۋجىگە تەڭكەش،
نە گۈل. قۇشلار ناۋاسىدىن سېھىرلەنگەن ھاۋا كۆردۈم.
ئاسانمۇ روھىغا ئەلنىڭ سىڭىپ كەتمەك بولۇپ بىر كۈي؟
ئاڭا ئىشقى بىدار جەننەت ۋىسالىنى راۋا كۆردۈم.
٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭
(1993-يىل. «قەشقەر گېزىتى» 1998-يىل 15-ئاۋغۇست)
٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭


ياشا دوستۇم!

كۈندەك چاقناپ،
گۈلدەك ياشناپ،
مىھرىڭ بىلەن بۇ دۇنياغا
مۇھەببەتلىك نەزەر تاشلاپ
ياشا دوستۇم!
 
باغلار كېزىپ،
تاغلار ئېشىپ،
گۈزەل ياشلىق چاغلىرىڭدا
جاسارىتىڭ ئۇرغۇپ تېشىپ
ياشا دوستۇم!
 
كۆكتە ئۇچۇپ،
شەرەپ قۇچۇپ،
بۇ ھاياتتا ۋەتەن ئۈچۈن
بىر كىشىلىك تۆھپە قوشۇپ
ياشا دوستۇم!
٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭
(1993-يىل 12-نويابىر. «شىنجاڭ گېزىتى» 1997-يىل 23-ئاۋغۇست)
٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭


بۇ يوللار-ئۇزۇن يوللار

بۇ يوللار ئۇزۇن يوللار،
سېنىڭ بىلەن بىز ماڭغان.
چۆللەردە، داۋانلاردا
شانلىق ئىزىمىز قالغان.

بۇ يوللار ئۇزۇن يوللار،
ئېگىز-ئېگىز تاغلار بار.
ئەجرىمىزدىن ياشنىغان
گۈل-چېچەكلىك باغلار بار.

بۇ يوللار ئۇزۇن يوللار،
ماڭساق-ماڭساق تۈگىمەس.
يەتمىگۈچە مەنزىلگە
ئۈمىدىمىز ئۈزۈلمەس.

بۇ يوللار ئۇزۇن يوللار،
سەن بىلەن بىز ماڭغان يول.
بۇ يوللاردا ماڭغاندا
بەختىمىزگە ئامان بول.
٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭
(1993-يىل 13-نويابىر. «شىنجاڭ سەنئىتى» ژورنىلى 1999-يىل 1-سان)
٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭


ياشلىقىمنىڭ يۇلتۇزى سەن دىلبىرىم

يارىم قارا كۆزلىرىڭدىن ياش تۆكمە.
ئايرىلغانغا ئازاپلانما بىھۇدە.
سەن ئېسىمدىن مەڭگۈ-مەڭگۈ چىقمايسەن،
ياشلىقىمنىڭ يۇلتۇزى سەن دىلبىرىم.

تەقدىر بىزنى شۇنداق ئايرىپ تاشلىدى.
نۇر چاقنىغان كۆزىمىزنى ياشلىدى.
ئىككىمىزنى ئىككى چۆلگە باشلىدى.
ياشلىقىمنىڭ يۇلتۇزى سەن دىلبىرىم.

مۇھەببەتنىڭ گۈلى ھەرگىز سولمايدۇ.
ئايرىلىشمۇ ئەبەدىيلىك بولمايدۇ.
ئادەم دېگەن ئايرىلغانغا ئۆلمەيدۇ.
ياشلىقىمنىڭ يۇلتۇزى سەن دىلبىرىم.

ئوتلۇق قارا كۆزۈڭنى سەن ئاسرىغىن.
ئار-نۇمۇسلۇق يۈزۈڭنى سەن ئاسرىغىن.
بەختىم ئۈچۈن ئۆزۈڭنى سەن ئاسرىغىن.
ياشلىقىمنىڭ يۇلتۇزى سەن دىلبىرىم.
٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭
(1993-يىل 13-نويابىر. «شىنجاڭ سەنئىتى» ژورنىلى 1999-يىل 1-سان)
٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭


بۈيۈك ئاسمان

بىپايان باغرى ئىللىق بۈيۈك ئاسمان،
زىمىندا تۇرۇپ ساڭا تەلپۈنىمەن.
قۇش كەبى ئويناپ كەڭرى قۇچىقىڭدا،
گۈل كەبى شامىلىڭدا يەلپۈنىمەن.

چېچىلار قۇياشىڭدىن لاۋا دېگەن.
ياڭرايدۇ قۇشلىرىڭدىن ناۋا دېگەن.
تارايدۇ باغرىڭدىن ساپ ھاۋا دېگەن.
تېپىلار سەندىن دەردكە داۋا دېگەن.

ئۆگەندىم سەندىن خۇشال كۈلۈشنى مەن.
ئۆگەندىم سەندىن ئەركىن يۈرۈشنى مەن.
ئۆگەندىم سەندىن ئوتتەك كۆيۈشنى مەن.
ئۆگەندىم سەندىن يەرنى سۆيۈشنى مەن.

باقىمەن ساڭا دائىم بۈيۈك ئاسمان.
ئويلىرىم قۇچىقىڭدا قانات قاققان.
تەڭرىمۇ ئېلىۋالسۇن دەپ سېنىڭدىن،
بەختىمنىڭ يۇلتۇزىنى ساڭا ئاسقان.
٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭
(1994-يىل 19-فىۋرال. «قەشقەر گېزىتى» 1995-يىل 16-دىكابىر)
٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭


ئاسماندا ئاي

مەن زىمىندا تۇرىمەن، ئاسماندا ئاي.
شاتلىنىمەن نۇرىنى چاچقاندا ئاي.
تولىدۇ قەلبىم مۇھەببەت-سۆيگۈگە
ماڭا قاراپ خۇشچىراي ئاچقاندا ئاي.
ئۇكى ھەمراھتۇر ماڭا تۈن قوينىدا،
سىردىشىمدۇر مېنى غەم باسقاندا ئاي.
كېچىنىڭ كۆزى بولۇپ يول كۆرسىتەر،
مەن ھاياتتا گاڭگىراپ قالغاندا ئاي.
چۈنكى بەختىمنى تاپارمەن سۆيگۈدە
مېنى ئوتلۇق باغرىغا باسقاندا ئاي.
شۇ ئۈمىدتە ۋەسلىگە تەشنا بولۇپ،
مەن زېمىندا تۇرىمەن، ئاسماندا ئاي.
٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭
(1994-يىل 16-فىۋرال. «قەشقەر گېزىتى» 1994-يىل 9-ئاپرىل)
٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭


يار چېچەك

ئاق چېچەك، رەڭدار چېچەك، گۈلدار چېچەك.
سەن بىلەن بۇ يۇرتىمىز گۈلزار چېچەك.
سەندىكى رەڭ، سەندىكى خۇش جىلۋەلەر
دىلغا شاتلىق بەخش ئېتەر دىلدار چېچەك.
سەندە كۆكلەم ھۆسنى، كۆكلەم زىننىتى،
قەلبىمىزدە ساڭا سۆيگۈ بار چېچەك.
بەختىمىزدىن بىر نىشان رەڭدارلىقىڭ،
كۆڭلىمىزگە ئاقلىقىڭ ئوخشار چېچەك.
قالىدۇ سەندىن مېۋە كەتسەڭ توزۇپ،
ئاشۇ روھىڭ بىزگە بولسۇن يار چېچەك.
٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭
(1994-يىل 18-فىۋرال. «قەشقەر گېزىتى» 1994-يىل 9-ئاپرىل)
٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭


گىياھ قەسىدىسى

شۇنچە مەزمۇت چوقچىيىپ تۇرسا قىيا،
چىقتى ئۇنىڭ باغرىنى يېرىپ گىياھ.
ئۆستى ئۇ چۈمۈپ قۇياشنىڭ نۇرىغا،
ھەم تەبىئەت كۆكسىدىن ئېمىپ ھاۋا.
مەڭزىگە سۆيۈپ شاماللار قۇتلىدى،
كۆكتە قۇشلار ياڭرىتىپ ھەم شاد ناۋا.
جۇت-زىمىستان قار-بوراندا تىترىمەي
ئاخىرى ئۆستى بولۇپ ئۇ تۇتىيا.
بۇ ھاياتتا سەن شۇنى يەتكىن بىلىپ:
قىممىتىنى تاپتى ئاددى بىر گىياھ.
٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭
(1994-يىل 22-فىۋرال. «قەشقەر گېزىتى» 1994-يىل 9-ئاپرىل)
٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭


تەبىئەتنىڭ قانۇنى

ھەيۋەت بىلەن نەرە تارتىپ قىش كىلىپ،
توڭدۇرۇپ تەننى شۇدەم، جاننى ئېلىپ.
مۇزلىرى بىرلە جاھاننى مۇزلۇتۇپ
ھەم يۈرەكنى غەمدە مىڭ پارە قىلىپ.
شۇنچە مەغرۇر گىدىيىپ ھەيۋىسىدە
ئۆزىنى گويا بۈيۈك تەڭرى بىلىپ.
باقتى ئالەمگە سېلىپ تەكشى نەزەر،
تىرىسىگە پاتمىغاندەك كىرىلىپ.
باشلىدى ھەم سۆزىنى تەھدىت بىلەن:
«ئەمدى ياز كەلمەيدۇ قايتا تىرىلىپ.
بويسۇنۇشنى بىلىۋال پەرمانغا سەن،
كەتمىسۇن دىسەڭ بېشىڭنى يېرىلىپ.
مەنمۇ ئويلايمەن سېنىڭ بەختىڭنى كۆپ،
شۇڭا ئاڭلا سۆزلىرىمنى بېرىلىپ.
ئاچچىقىمنى كەلتۈرۈپ قويساڭ ئەگەر،
ھەممە شەيئىلەر تۈگەيدۇ قىرىلىپ.»
بولدى بەربات ۋەلىكىن قىشنىڭ چۈشى،
ئارقىدىن تاپ باستۇرۇپ باھار كېلىپ.
كۆزى كور بولدى قۇياشنىڭ نۇرىدا،
تۈگۈلۈپ كەتتى بوراندا شۈمشىيىپ.
ئىللىدى تەن، ئىللىدى قان، كۈلدى جان!
كۈلدى ئالەم زەر قۇياشتىن نۇر ئېمىپ.
جىلۋە قىلدى شاختا رەڭدار گۈل-چېچەك،
ئېسىمىزگە بەختىيار يازنى سېلىپ.
بۇ تەبىئەت ئادىتىدىن مەن شۇدەم
بىر ھەقىقەت سىرىنى يەتتىم بىلىپ.
٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭
(1994-يىل 19-ئاپرىل. «شىنجاڭ خەلق قۇرۇلتىيى» ژورنىلى 1997-يىللىق 4-سان)
٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭


خۇشاللىققا تويمايمەن

بۇ ھاياتتا مەن نىمىنى ئويلايمەن؟
تۇرۇپ خىيال دەرياسىنى بويلايمەن.
خىيالىمدا لەرزان ناخشا توۋلايمەن،
ناشام بىلەن كۆڭۈللەرنى ئوۋلايمەن.

مېنڭ ناخشام-مېنىڭ ئىزگۈ ئويلىرىم.
مېنىڭ ناخشام-تاپقان-تەرگەن شاتلىقىم.
مېنىڭ ناخشام-مېنىڭ ئىزگۈ كۈيلىرىم.
غەم-قايغۇمنى يوقتۇر خەققە داتلىغىم.

بۇ ھاياتتا مەن شاتلىقنى ئويلايمەن.
دوستلار بىلەن خۇشال-خورام ئوينايمەن.
تەڭرىم، ماڭا ئايىمىغىن شاتلىقنى،
قانچە بەرسەڭ، بەرگىنىڭگە تويمايمەن!
٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭
(1994-يىلى 7-ماي. «قەشقەر گېزىتى» 1994-يىل 3-سىنتەبىر)
٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭
(بۇ شېئىرلىرىمنى كۆچۈرۈپ باشقا توربىكەتلەرگە يوللىسىڭىز بولمايدۇ)
٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭